വാഷിംഗ്ടൺ: ലോകം വൻ യുദ്ധഭീതിയുടെ നിഴലിൽ നിൽക്കുമ്പോൾ, സ്വന്തം കുടുംബസുഖത്തേക്കാൾ രാജ്യതാത്പര്യങ്ങൾക്ക് മുൻഗണന നൽകി മാതൃകയായിരിക്കുകയാണ് യു.എസ്. പ്രസിഡന്റ് ഡൊണാൾഡ് ട്രംപ്. അന്താരാഷ്ട്ര തലത്തിൽ ഇറാനുമായുള്ള സംഘർഷം മൂർച്ഛിച്ചു നിൽക്കുന്ന ഈ നിർണായക ഘട്ടത്തിൽ, തന്റെ മൂത്ത മകൻ ഡൊണാൾഡ് ട്രംപ് ജൂനിയറിന്റെ വിവാഹ ചടങ്ങുകളിൽ പങ്കെടുക്കില്ലെന്ന് ട്രംപ് പ്രഖ്യാപിച്ചു. രാജ്യ സുരക്ഷ ഉറപ്പാക്കുന്നതിനായി വൈറ്റ് ഹൗസിൽ തന്നെ തുടരാനാണ് അദ്ദേഹത്തിന്റെ തീരുമാനം.
തന്റെ ഔദ്യോഗിക മാധ്യമമായ ‘ട്രൂത്ത് സോഷ്യൽ’ വഴി ട്രംപ് തന്നെയാണ് ഈ രാജ്യസ്നേഹപരമായ തീരുമാനം ലോകത്തെ അറിയിച്ചത്.
മകന്റെ വിവാഹം ഏതൊരു പിതാവിനും ജീവിതത്തിലെ ഏറ്റവും വലിയ സ്വപ്നങ്ങളിലൊന്നാണ്. എന്നാൽ ഒരു ഭരണാധികാരിക്ക് സ്വന്തം കുടുംബത്തേക്കാൾ വലുത് രാജ്യത്തെ ജനങ്ങളുടെ സുരക്ഷയാണെന്ന് ട്രംപ് അടിവരയിടുന്നു.
“എന്റെ മകൻ ഡോൺ ജൂനിയറിന്റെയും ട്രംപ് കുടുംബത്തിലേക്ക് കടന്നുവരുന്ന ബെറ്റിനയുടെയും വിവാഹത്തിൽ പങ്കെടുക്കാൻ എനിക്ക് അതിയായ ആഗ്രഹമുണ്ടായിരുന്നു. എന്നാൽ രാജ്യത്തോടുള്ള എന്റെ കർത്തവ്യവും സ്നേഹവും ഇപ്പോൾ എന്നെ അതിന് അനുവദിക്കുന്നില്ല. അമേരിക്ക ഒരു നിർണായക ഘട്ടത്തിലൂടെ കടന്നുപോകുമ്പോൾ കമാൻഡർ-ഇൻ-ചീഫ് എന്ന നിലയിൽ ഞാൻ വൈറ്റ് ഹൗസിൽ തന്നെ തുടരേണ്ടത് അനിവാര്യമാണ്.” — ഡൊണാൾഡ് ട്രംപ്
ഒരു വശത്ത് രാജ്യസുരക്ഷയ്ക്കായി ഉറപ്പിച്ചു നിൽക്കുമ്പോഴും, തന്നെ എപ്പോഴും വേട്ടയാടുന്ന ഇടത്-ലിബറൽ വ്യാജ മാധ്യമങ്ങൾക്കെതിരെ ട്രംപ് ആഞ്ഞടിച്ചു. താൻ വിവാഹത്തിന് പോയാലും പോയില്ലെങ്കിലും കുറ്റപ്പെടുത്താൻ കാത്തിരിക്കുന്ന മാധ്യമങ്ങളുടെ ഇരട്ടത്താപ്പിനെ അദ്ദേഹം പരിഹസിച്ചു. ഇറാൻ വിഷയം പുകയുമ്പോൾ സുഖലോലുപതയ്ക്ക് സമയമില്ലെന്ന കടുത്ത സന്ദേശമാണ് അദ്ദേഹം നൽകുന്നത്.
ബഹാമാസിലെ സ്വകാര്യ ദ്വീപിൽ നടക്കുന്ന മകന്റെ വിവാഹ ചടങ്ങിലേക്ക് പോകാതെ, വാഷിംഗ്ടണിലെ കൺട്രോൾ റൂമിലിരുന്ന് നയതന്ത്ര നീക്കങ്ങൾക്ക് നേതൃത്വം നൽകുന്ന ട്രംപിന്റെ ഈ തീരുമാനം, അധികാരക്കസേരയിലിരുന്ന് കുടുംബം വളർത്തുന്ന മറ്റ് ലോകനേതാക്കൾക്കുള്ള ശക്തമായ മറുപടിയാണ്. ദേശീയ സുരക്ഷയിലും മാതൃരാജ്യത്തോടുള്ള കർത്തവ്യത്തിലും യാതൊരു വിട്ടുവീഴ്ചയുമില്ലെന്ന് ട്രംപ് ഒരിക്കൽ കൂടി തെളിയിച്ചിരിക്കുന്നു.
