നിയമസഭാ തിരഞ്ഞെടുപ്പ് കാലത്ത് കേരളത്തിലുടനീളം അന്നത്തെ മുഖ്യമന്ത്രി പിണറായി വിജയന്റെ ചിത്രം മാത്രം ഉൾപ്പെടുത്തി ഫ്‌ളക്‌സ് ബോർഡുകൾ സ്ഥാപിച്ചതിൽ പാർട്ടിക്കുള്ളിൽ ഉയർന്ന കടുത്ത വിമർശനങ്ങൾ പരസ്യമായി സമ്മതിച്ച് സി.പി.എം സംസ്ഥാന സെക്രട്ടറി എം.വി ഗോവിന്ദൻ. തിരഞ്ഞെടുപ്പ് പരാജയത്തിന്റെ പശ്ചാത്തലത്തിൽ സംസ്ഥാനത്തുടനീളമുള്ള പാർട്ടി കമ്മിറ്റികളിൽ പിണറായി വിജയന്റെ വ്യക്തിപൂജാ ശൈലിക്കെതിരെ അണികളും നേതാക്കളും ഒരേപോലെ രംഗത്തുവന്ന സാഹചര്യത്തിലാണ് പാർട്ടി സെക്രട്ടറിയുടെ നിർണായക പ്രതികരണം. കഴിഞ്ഞ നിയമസഭാ തിരഞ്ഞെടുപ്പുകളിലടക്കം പൊതുവായ മുദ്രാവാക്യങ്ങൾ മുന്നോട്ടുവെച്ചാണ് പാർട്ടി ഫ്‌ളക്‌സുകൾ തയ്യാറാക്കിയതെങ്കിലും അതിൽ മുഖ്യമന്ത്രി, പാർട്ടി നേതാവ് എന്നീ നിലകളിൽ പിണറായി വിജയന്റെ ഫോട്ടോ മാത്രമാണ് വന്നതെന്നത് വസ്തുതയാണെന്ന് അദ്ദേഹം വാർത്താ സമ്മേളനത്തിൽ സ്ഥിരീകരിച്ചു.
ഇതുമായി ബന്ധപ്പെട്ട് പാർട്ടിക്കുള്ളിലും പൊതുസമൂഹത്തിലും ഉയർന്നുവന്ന വിമർശനാത്മകമായ എല്ലാ കാര്യങ്ങളും സി.പി.എം ഗൗരവത്തോടെ പരിശോധിക്കുമെന്നും എം.വി ഗോവിന്ദൻ വ്യക്തമാക്കി. മുൻകാലങ്ങളിൽ പാർട്ടിയിലെ പ്രമുഖ നേതാവായിരുന്ന അന്തരിച്ച മുൻ മുഖ്യമന്ത്രി വി.എസ് അച്യുതാനന്ദന്റെ പേരിൽ സമാനമായ രീതിയിൽ ഫ്‌ളക്‌സ് ബോർഡുകൾ ഉയർന്നപ്പോൾ ‘വ്യക്തിപൂജ’ എന്ന് വിളിച്ച് പാർട്ടി ഔദ്യോഗികമായി തള്ളിപ്പറയുകയും തിരുത്തൽ നടപടികൾ സ്വീകരിക്കുകയും ചെയ്തിരുന്നല്ലോ എന്ന മാധ്യമപ്രവർത്തകരുടെ ചോദ്യത്തിന് മറുപടി നൽകുകയായിരുന്നു അദ്ദേഹം. വി.എസിന്റെ കാലത്തെ നിലപാട് ചൂണ്ടിക്കാട്ടിയുള്ള ചോദ്യത്തിന് മുന്നിൽ കൃത്യമായ മറുപടി നൽകാതെ, ഉയർന്നുവന്ന ആക്ഷേപങ്ങൾ പാർട്ടി ചർച്ച ചെയ്ത് പരിശോധിക്കുമെന്ന ഉറപ്പാണ് സംസ്ഥാന സെക്രട്ടറി നൽകിയത്.
തിരഞ്ഞെടുപ്പ് വിലയിരുത്താനായി ചേർന്ന വിവിധ ജില്ലാ കമ്മിറ്റികളിൽ മുഖ്യമന്ത്രിയുടെയും ഭരണത്തിന്റെയും ശൈലിക്കെതിരെ വലിയ രീതിയിലുള്ള പടയൊരുക്കമാണ് കഴിഞ്ഞ ദിവസങ്ങളിൽ ദൃശ്യമായത്. പാർട്ടിക്ക് മുകളിൽ ഒരു വ്യക്തി കേന്ദ്രീകരിക്കപ്പെടുന്ന രീതിയിലേക്ക് കാര്യങ്ങൾ പോയെന്നും, സാധാരണക്കാരായ വോട്ടർമാരെയും പാർട്ടി അണികളെയും അകറ്റാൻ പിണറായി വിജയന്റെ ഈ ശൈലി കാരണമായെന്നും തിരുവനന്തപുരം, ആലപ്പുഴ, എറണാകുളം ജില്ലാ കമ്മിറ്റികളിൽ രൂക്ഷമായ വിമർശനങ്ങൾ ഉയർന്നിരുന്നു. കണ്ണൂരിലടക്കം നേതൃത്വത്തിനെതിരെ അണികൾ പരസ്യമായി ഫ്‌ളക്‌സ് ബോർഡുകൾ സ്ഥാപിച്ചതും വലിയ വാർത്തയായിരുന്നു. ഈ പശ്ചാത്തലത്തിൽ, വ്യക്തി കേന്ദ്രീകൃതമായ പ്രചാരണ രീതികൾ പാർട്ടിയുടെ അടിത്തറ ഇളക്കിയെന്ന ആക്ഷേപം സംസ്ഥാന നേതൃത്വം ഗൗരവമായി കാണുന്നുവെന്നതിന്റെ ആദ്യ സൂചനയാണ് എം.വി ഗോവിന്ദന്റെ ഈ തിരുത്തൽ പ്രസ്താവന. വരും ദിവസങ്ങളിൽ സി.പി.എം സംസ്ഥാന സമിതിയിലും സെക്രട്ടേറിയറ്റിലും ഈ വിഷയം കൂടുതൽ വലിയ തർക്കങ്ങൾക്കും തിരുത്തൽ നടപടികൾക്കും വഴിതുറക്കുമെന്നുറപ്പാണ്.
