2025 മേയ് 8-ന്റെ ആ നിർണായക സായാഹ്നം. രാജ്യം മുഴുവൻ കനത്ത നെഞ്ചിടിപ്പോടെയാണ് ടെലിവിഷൻ സ്ക്രീനുകളിലേക്ക് നോക്കിയിരുന്നത്. അതിർത്തി കടന്ന് ഇന്ത്യൻ വ്യോമാതിർത്തി ലക്ഷ്യമാക്കി പാകിസ്ഥാൻ ഒന്നിന് പുറകെ ഒന്നായി അയച്ച അത്യാധുനിക ഡ്രോണുകളും ക്രൂയിസ് മിസൈലുകളും ഇന്ത്യൻ സൈന്യം ആകാശത്തുവെച്ച് തന്നെ തകർത്തു തരിപ്പണമാക്കുന്ന ദൃശ്യങ്ങളാണ് ചാനലുകളിൽ ഫ്ലാഷ് ന്യൂസുകളായി മിന്നിമറഞ്ഞത്. ‘ഓപ്പറേഷൻ സിന്ദൂർ’ എന്ന് പേരിട്ട ഈ അതിതീവ്ര പ്രതിരോധ നീക്കം ഇന്ത്യൻ സൈന്യത്തിന്റെ ചരിത്ര വിജയമായി രാജ്യം മുഴുവൻ ആഘോഷിക്കുമ്പോൾ, തന്റെ സ്വീകരണമുറിയിലിരുന്ന് ആ ദൃശ്യങ്ങൾ കൺനിറയെ കണ്ട് നിശബ്ദനായി സന്തോഷാശ്രുക്കൾ പൊഴിച്ച ഒരു വയോധികനുണ്ടായിരുന്നു. ഡിആർഡിഒയിലെ (DRDO) വിരമിച്ച പ്രമുഖ ശാസ്ത്രജ്ഞനായ ഡോ. പ്രഹ്ലാദ് രാമറാവു ആയിരുന്നു അത്. ടിവിയിൽ കണ്ട ആ മിസൈൽ വേട്ട അദ്ദേഹത്തിന് വെറുമൊരു വാർത്തയായിരുന്നില്ല; മറിച്ച് തന്റെ ജീവിതത്തിലെ ഏറ്റവും പ്രധാനപ്പെട്ട 15 വർഷങ്ങൾ പകൽ വെളിച്ചം കാണാതെ കഠിനാധ്വാനം ചെയ്ത് വികസിപ്പിച്ചെടുത്ത ‘ആകാശ്’ മിസൈൽ പ്രതിരോധ സംവിധാനത്തിന്റെ വിശ്വരൂപമായിരുന്നു അത്. അന്ന് ആ ദൃശ്യങ്ങൾ കണ്ടുകൊണ്ട് “എന്റെ ജീവിതത്തിലെ ഏറ്റവും സന്തോഷം നിറഞ്ഞ ദിവസമാണിത്” എന്നാണ് അദ്ദേഹം വികാരാധീനനായി പ്രതികരിച്ചത്.
ഈ സമാനതകളില്ലാത്ത വിജയഗാഥയ്ക്ക് പിന്നിൽ നാല് പതിറ്റാണ്ടുകൾക്ക് മുൻപ് ഭാരതത്തിന്റെ മിസൈൽ മനുഷ്യൻ ഡോ. എ.പി.ജെ. അബ്ദുൽ കലാം വിതച്ച ഒരു വലിയ ദൂരക്കാഴ്ചയുടെ വിത്തുണ്ടായിരുന്നു. കഥ തുടങ്ങുന്നത് 1983-ലാണ്. വിദേശ രാജ്യങ്ങളിൽ നിന്നുള്ള മിസൈലുകളെയും സാങ്കേതികവിദ്യകളെയും ആശ്രയിക്കുന്നത് പൂർണ്ണമായും അവസാനിപ്പിച്ച്, ഇന്ത്യ സ്വന്തം കാലിൽ നിൽക്കണമെന്ന ലക്ഷ്യത്തോടെ ‘ഇന്റഗ്രേറ്റഡ് ഗൈഡഡ് മിസൈൽ ഡെവലപ്‌മെന്റ് പ്രോഗ്രാം’ (IGMDP) എന്ന അഭിമാന പദ്ധതിക്ക് രാജ്യം രൂപം നൽകിയ കാലം. അന്നത്തെ പ്രശസ്തനായ യുവശാസ്ത്രജ്ഞൻ ഡോ. എ.പി.ജെ. അബ്ദുൽ കലാമിനായിരുന്നു ഈ ബൃഹത്തായ പദ്ധതിയുടെ പൂർണ്ണ ചുമതല. ഈ പദ്ധതിക്ക് കീഴിൽ വിഭാവനം ചെയ്ത അഞ്ച് പ്രധാന മിസൈൽ പ്രോജക്റ്റുകളിൽ ഏറ്റവും സങ്കീർണ്ണമായ ഒന്നായിരുന്നു ശത്രുവിമാനങ്ങളെയും വായുവിലൂടെയെത്തുന്ന മറ്റ് അത്യാധുനിക ഭീഷണികളെയും അന്തരീക്ഷത്തിൽ വെച്ച് തന്നെ തകർക്കാൻ ശേഷിയുള്ള ഉപരിതല-വ്യോമ മിസൈൽ സംവിധാനമായ (Surface-to-Air Missile) ‘ആകാശ്’.
അക്കാലത്ത് ഇന്ത്യക്ക് ഒട്ടും പരിചയമില്ലാത്ത, ആഗോള പ്രതിരോധ ശാസ്ത്രലോകം പോലും ‘ഇന്ത്യയെക്കൊണ്ട് സാധിക്കില്ലെന്ന്’ വിധിെഴുതിയ ആ അസാധ്യ ദൗത്യം കലാം തോളിൽ തട്ടി വിശ്വസിച്ച് ഏൽപ്പിച്ചത് യുവാവായ ഡോ. പ്രഹ്ലാദ് രാമറാവുവിനെയായിരുന്നു. ശാസ്ത്ര സാങ്കേതിക വിദ്യയിൽ ഇന്ത്യ ഇന്നത്തെപ്പോലെ വളർന്നിട്ടില്ലാത്ത, വിദേശരാജ്യങ്ങൾ സാങ്കേതികവിദ്യ കൈമാറാൻ വിസമ്മതിച്ച ആ കഠിനമായ കാലഘട്ടത്തിൽ പൂജ്യത്തിൽ നിന്നാണ് പ്രഹ്ലാദ് രാമറാവുവും സംഘവും തങ്ങളുടെ ഗവേഷണം ആരംഭിച്ചത്. നിരവധി പരാജയങ്ങളും കഠിനാധ്വാനത്തിന്റെ നാളുകളും ഉറക്കമില്ലാത്ത രാത്രികളും താണ്ടി 15 വർഷത്തോളം നീണ്ട അശ്രാന്ത പരിശ്രമത്തിനൊടുവിലാണ് ‘ആകാശ്’ എന്ന തദ്ദേശീയ മിസൈൽ സംവിധാനം അവർ യാഥാർത്ഥ്യമാക്കിയത്. ഒരേസമയം ഒന്നിലധികം ലക്ഷ്യങ്ങളെ കൃത്യമായി നിരീക്ഷിച്ച് തകർക്കാൻ ശേഷിയുള്ള ആകാശ്, ഇന്ന് ലോകത്തിലെ തന്നെ ഏറ്റവും മികച്ച മിസൈൽ പ്രതിരോധ സംവിധാനങ്ങളിലൊന്നാണ്. അന്ന് അബ്ദുൽ കലാം എന്ന ആചാര്യൻ കാണിച്ച ദൂരക്കാഴ്ചയും തന്റെ ശിഷ്യന്മാരിലർപ്പിച്ച വിശ്വാസവും, പതിറ്റാണ്ടുകൾക്കിപ്പുറം ഒരു യുദ്ധസമാന സാഹചര്യത്തിൽ ഇന്ത്യയുടെ കോടിക്കണക്കിന് വരുന്ന ജനങ്ങളുടെ ജീവന് കാവലായി മാറിയ ഈ അപൂർവ്വ ചരിത്രം പുറത്തുവന്നതോടെ സോഷ്യൽ മീഡിയയിൽ വൈകാരികമായ പ്രതികരണങ്ങളോടെയാണ് ജനങ്ങൾ ഈ വാർത്ത ഏറ്റെടുത്തിരിക്കുന്നത്.
