യുകെയിലെ ജൂത സമൂഹങ്ങൾക്ക് നേരെയുള്ള വിദ്വേഷ ആക്രമണങ്ങളും യഹൂദവിരുദ്ധതയും വർദ്ധിച്ചുവരുന്ന സാഹചര്യത്തിൽ, അവരെ സംരക്ഷിക്കുന്നതിനായി അടുത്ത മൂന്ന് വർഷത്തേക്ക് 250 ദശലക്ഷം പൗണ്ട് (ഏകദേശം 2700 കോടിയിലധികം രൂപ) ചെലവഴിക്കാൻ യുകെ സർക്കാർ പദ്ധതിയിടുന്നതായി റിപ്പോർട്ട്.
കമ്മ്യൂണിറ്റി സെക്യൂരിറ്റി ട്രസ്റ്റ് എന്ന സംഘടനയ്ക്കാണ് ഈ തുക കൈമാറുക. ജൂതന്മാരുടെ സ്കൂളുകൾ, സിനഗോഗുകൾ (ആരാധനാലയങ്ങൾ), മറ്റ് കമ്മ്യൂണിറ്റി സെന്ററുകൾ എന്നിവയ്ക്ക് സുരക്ഷയൊരുക്കാൻ ഈ ഫണ്ട് ഉപയോഗിക്കും.
:മുൻവർഷങ്ങളെ അപേക്ഷിച്ച് സുരക്ഷാ ഫണ്ടിൽ വലിയ വർദ്ധനവാണ് സർക്കാർ വരുത്തിയിരിക്കുന്നത്. സുരക്ഷാ ഗാർഡുകളെ നിയമിക്കുന്നതിനും, സിസിടിവി ക്യാമറകൾ, അലാറം സംവിധാനങ്ങൾ, സുരക്ഷാ വേലികൾ എന്നിവ സ്ഥാപിക്കുന്നതിനും ഈ തുക വിനിയോഗിക്കും. സമീപകാലത്തായി യുകെയിൽ ജൂത സമൂഹത്തിന് നേരെ വലിയ രീതിയിലുള്ള വിദ്വേഷ അതിക്രമങ്ങളും ഭീഷണികളും റിപ്പോർട്ട് ചെയ്യപ്പെട്ടിട്ടുണ്ട്. ഈ പശ്ചാത്തലത്തിലാണ് അടിയന്തരമായി സുരക്ഷ ശക്തമാക്കാൻ സർക്കാർ തീരുമാനിച്ചത്.
രാജ്യത്തെ എല്ലാ പൗരന്മാർക്കും ഭയരഹിതമായി ജീവിക്കാനുള്ള സാഹചര്യമൊരുക്കുക എന്നത് സർക്കാരിന്റെ ഉത്തരവാദിത്തമാണെന്നും, വിദ്വേഷം പടർത്തുന്നവർക്കെതിരെ കർശന നടപടി സ്വീകരിക്കുമെന്നും യുകെ ആഭ്യന്തര മന്ത്രാലയം വ്യക്തമാക്കി.സ്വന്തം രാജ്യത്തെ ഒരു ജനവിഭാഗത്തിന് നേരെ ഉയരുന്ന ഭീഷണികളെ ചെറുക്കാനും അവരുടെ ആഭ്യന്തര സുരക്ഷ ഉറപ്പാക്കാനും ലക്ഷ്യമിട്ടാണ് യുകെ ഭരണകൂടം ഈ വൻ തുക അനുവദിച്ചിരിക്കുന്നത്.
