പ്രധാനമന്ത്രി നരേന്ദ്ര മോദിക്ക് രാജ്യത്തിനകത്തുനിന്നും വിദേശത്തുനിന്നും ഉപഹാരമായി ലഭിച്ച 1,498 അമൂല്യ സമ്മാനങ്ങളുടെ ഇ-ലേലം സെപ്റ്റംബർ 17 മുതൽ ആരംഭിക്കുന്നു. കേന്ദ്ര സാംസ്കാരിക മന്ത്രാലയത്തിന്റെ നേതൃത്വത്തിലാണ് ലേല നടപടികൾ സംഘടിപ്പിക്കുന്നത്. പ്രധാനമന്ത്രിയുടെ ജന്മദിനത്തോട് അനുബന്ധിച്ച് ആരംഭിക്കുന്ന ലേലത്തിന്റെ ആറാം പതിപ്പാണിത്. ലേലത്തിലൂടെ ലഭിക്കുന്ന മുഴുവൻ തുകയും ഗംഗാ നദിയുടെ ശുചീകരണത്തിനും സംരക്ഷണത്തിനുമായുള്ള ‘നമാമി ഗംഗെ’ പദ്ധതിക്കായി വിനിയോഗിക്കും. pmmementos.gov.in എന്ന ഔദ്യോഗിക വെബ്‌സൈറ്റ് വഴി പൊതുജനങ്ങൾക്ക് ലേലത്തിൽ പങ്കാളികളാകാം.
ലേലത്തിന് വെച്ചിരിക്കുന്ന വസ്തുക്കളിൽ അയോധ്യ രാമക്ഷേത്രത്തിന്റെ വെള്ളിയിൽ തീർത്ത മനോഹരമായ മാതൃക, രാമദർബാർ ചിത്രം, വിവിധ തരത്തിലുള്ള മാതൃകാ കപ്പലുകൾ എന്നിവ പ്രധാന ആകർഷണങ്ങളാണ്. ഇതുകൂടാതെ രാജ്യത്തിന്റെ വിവിധ ഭാഗങ്ങളിൽ നിന്നുള്ള കരകൗശല വസ്തുക്കൾ, തഞ്ചാവൂർ പെയിന്റിംഗുകൾ, പരമ്പരാഗത വസ്ത്രങ്ങൾ, വിവിധ ക്ഷേത്രങ്ങളിൽ നിന്നുള്ള മാതൃകകൾ എന്നിവയും ഉപഹാരങ്ങളുടെ കൂട്ടത്തിലുണ്ട്. ഇവയുടെ ലേലത്തുക 100 രൂപ മുതൽ ലക്ഷക്കണക്കിന് രൂപ വരെയായി നിരക്ക് നിശ്ചയിച്ചിട്ടുണ്ട്.
ന്യൂഡൽഹിയിലെ നാഷണൽ ഗാലറി ഓഫ് മോഡേൺ ആർട്ടിൽ ഈ സമ്മാനങ്ങളുടെ പ്രത്യേക പ്രദർശനം പൊതുജനങ്ങൾക്കായി ഒരുക്കിയിട്ടുണ്ട്. പ്രധാനമന്ത്രിയുടെ സമ്മാനങ്ങൾ പൊതുജനങ്ങൾക്ക് വാങ്ങാനുള്ള അവസരം നൽകുന്നതിനൊപ്പം ഗംഗാ ശുചീകരണം എന്ന സാമൂഹിക ലക്ഷ്യത്തിനായി പണം കണ്ടെത്താനും ഇതിലൂടെ സാധിക്കുന്നു. കഴിഞ്ഞ അഞ്ച് പതിപ്പുകളിലായി ആയിരക്കണക്കിന് സമ്മാനങ്ങളാണ് ഇത്തരത്തിൽ ലേലം ചെയ്തത്. ഒക്ടോബർ 2 വരെ നീണ്ടുനിൽക്കുന്ന ലേലത്തിൽ രാജ്യത്തെ ഏത് പൗരനും പങ്കാളികളാകാൻ സാധിക്കും.
