വി.ഡി. സതീശന്റെ വിവാദ ചാർട്ടേഡ് വിമാനയാത്രയ്ക്ക് പിന്നിലെ സ്പോൺസർ ആരാണെന്ന് പരസ്യപ്പെടുത്താത്തതിൽ രൂക്ഷ വിമർശനവുമായി സി.പി.എം, സി.പി.ഐ സംസ്ഥാന സെക്രട്ടറിമാർ രംഗത്ത്. സ്പോൺസറുടെ വിവരങ്ങൾ ഒളിച്ചുവെക്കാൻ ശ്രമിക്കുന്നത് വലിയ രീതിയിലുള്ള ദുരൂഹത ഉള്ളതുകൊണ്ടാണെന്ന് സി.പി.എം സംസ്ഥാന സെക്രട്ടറി എം.വി. ഗോവിന്ദൻ ആരോപിച്ചു. ‘ലോകത്ത് ഒന്നും സൗജന്യമായി കിട്ടില്ല (There is no free lunch)’ എന്ന് ചൂണ്ടിക്കാട്ടിയ അദ്ദേഹം, കോടികൾ വിലമതിക്കുന്ന വിമാനയാത്രയും ആഡംബര വാഹനങ്ങളും മുതലാളിമാർ വെറുതെ വിട്ടുകൊടുക്കില്ലെന്നും വ്യക്തമാക്കി.
പിണറായി വിജയൻ മുൻപ് മുഖ്യമന്ത്രിയായിരുന്നപ്പോൾ വിമാനയാത്ര നടത്തിയിട്ടുണ്ടെന്ന സതീശന്റെ വാദം യഥാർത്ഥ വിഷയത്തിൽ നിന്ന് ഒളിച്ചോടാനുള്ള അടവ് മാത്രമാണ്. അങ്ങനെ എന്തെങ്കിലും ക്രമക്കേടുണ്ടെങ്കിൽ അതും അന്വേഷിക്കട്ടെയെന്നും, എന്നാൽ തങ്ങളുടെ ചോദ്യം നിലവിലെ സ്പോൺസർ ആരാണെന്നതാണെന്നും എം.വി. ഗോവിന്ദൻ പറഞ്ഞു. സ്പോൺസറുടെ പേര് ഒളിപ്പിച്ചു വെക്കുന്നത് ജനാധിപത്യവിരുദ്ധവും ഭരണഘടനാ വിരുദ്ധവുമാണ്. കെ.എം. ഷാജി ഉൾപ്പെടെയുള്ളവരുടെ കാര്യത്തിലും തട്ടിപ്പ് കേസുകളിൽ പ്രതികളായ ആളുകൾ വരെ സ്പോൺസർമാരായിട്ടുണ്ടെന്ന് അദ്ദേഹം കുറ്റപ്പെടുത്തി.
അതേസമയം, സർക്കാരിൻ്റെ സ്പോൺസർഷിപ്പ് സംസ്കാരത്തിനെതിരെ സി.പി.ഐ സംസ്ഥാന സെക്രട്ടറി ബിനോയ് വിശ്വവും കടുത്ത ഭാഷയിൽ പ്രതികരിച്ചു. പുറത്ത് പേര് പറയാൻ കൊള്ളാത്തവരായ ആളുകളാണ് പലരുടെയും സ്പോൺസർമാരെന്നും, പണക്കാരെ കാണുമ്പോൾ സന്മാർഗ്ഗത മറക്കുന്ന അവസ്ഥയാണ് നിലവിലുള്ളതെന്നും അദ്ദേഹം പരിഹസിച്ചു.
അതേസമയം, മാസപ്പടി കേസിൽ ഇ.ഡി അന്വേഷണം നേരിടുന്ന മുൻ മുഖ്യമന്ത്രി പിണറായി വിജയന് പൂർണ്ണ പിന്തുണ നൽകാൻ സി.പി.ഐ സംസ്ഥാന സെക്രട്ടറി തയ്യാറായില്ല എന്നത് ശ്രദ്ധേയമാണ്. സി.പി.എമ്മിനെയും എൽ.ഡി.എഫിനെയും രാഷ്ട്രീയമായി കടന്നാക്രമിച്ചാൽ ശക്തമായി പ്രതിരോധിക്കും, എന്നാൽ കേസിന്റെ നിയമപരമായ മറ്റു കാര്യങ്ങൾ വരും ദിവസങ്ങളിൽ നോക്കി പറയാമെന്നായിരുന്നു ബിനോയ് വിശ്വത്തിന്റെ പ്രതികരണം. വിഷയത്തിൽ വിജിലൻസ് പ്രാഥമികാന്വേഷണം നടത്തുന്നതുമായി ബന്ധപ്പെട്ട തുടർച്ചയായ ചോദ്യങ്ങളിൽ നിന്നും അദ്ദേഹം ഒഴിഞ്ഞുമാറി.
