ഓപ്പറേഷൻ സിന്ദൂറിന് ശേഷം പാകിസ്താൻ കേന്ദ്രീകരിച്ച് പ്രവർത്തിക്കുന്ന ഭീകരസംഘടനകൾ തങ്ങളുടെ പരിശീലന ക്യാമ്പുകളുടെ ഘടനയിലും പ്രവർത്തന രീതിയിലും വൻ മാറ്റങ്ങൾ വരുത്തിയതായി പുതിയ വിവരങ്ങൾ വ്യക്തമാക്കുന്നു. ഇന്ത്യൻ സൈന്യത്തിന് കൃത്യമായ വിവരങ്ങളുടെ അടിസ്ഥാനത്തിൽ അതിർത്തി കടന്ന് ലക്ഷ്യസ്ഥാനങ്ങൾ തകർക്കാനുള്ള ശേഷിയുണ്ടെന്ന് തെളിയിച്ച പശ്ചാത്തലത്തിലാണ് ഭീകരർ തങ്ങളുടെ താവളങ്ങൾ ജനവാസ മേഖലകളിലേക്ക് മാറ്റുന്നത്. നിർദ്ദിഷ്ട ഭീകരകേന്ദ്രങ്ങൾ മാത്രം വേർതിരിച്ച് തകർക്കുന്നത് ഒഴിവാക്കാനും ജനവാസ കേന്ദ്രങ്ങളെ ഒരു സംരക്ഷണ കവചമായി ഉപയോഗിക്കാനുമാണ് ഇതിലൂടെ അവർ പദ്ധതിയിടുന്നത്.
നേരത്തെ ഒരു കെട്ടിടം പൂർണ്ണമായും ഭീകരപ്രവർത്തനങ്ങൾക്കായി മാത്രം ഉപയോഗിച്ചിരുന്ന സ്ഥാനത്ത്, പുതിയ ശൈലിയനുസരിച്ച് ഒന്നോ രണ്ടോ നിലകളിൽ മാത്രം ക്യാമ്പുകൾ പ്രവർത്തിപ്പിക്കുകയും ബാക്കി ഭാഗങ്ങൾ പാർപ്പിട ആവശ്യങ്ങൾക്കോ വിദ്യാഭ്യാസ സ്ഥാപനങ്ങൾക്കോ ആയി വിട്ടുനൽകുകയും ചെയ്യുകയാണ്. ഇതിലൂടെ ആക്രമണം നടക്കുമ്പോൾ സാധാരണക്കാർ കൊല്ലപ്പെടാനുള്ള സാധ്യത വർധിപ്പിക്കാനും, ഇന്ത്യ ജനവാസ കേന്ദ്രങ്ങൾ ലക്ഷ്യമിട്ടുവെന്ന രീതിയിൽ പ്രചാരണങ്ങൾ നടത്താനും പാകിസ്ഥാൻ ശ്രമിക്കും.
അതിർത്തി പ്രദേശങ്ങളിൽ പ്രവർത്തിച്ചിരുന്ന പല ക്യാമ്പുകളും പാകിസ്താന്റെ ഉള്ളിലെ സുരക്ഷിത മേഖലകളിലേക്ക് മാറ്റി സ്ഥാപിച്ചിട്ടുണ്ടെങ്കിലും, ജനവാസകേന്ദ്രങ്ങളുമായി ഭീകരകേന്ദ്രങ്ങളെ സംയോജിപ്പിക്കുന്നതാണ് അവർ തന്ത്രപരമായി വരുത്തിയ ഏറ്റവും വലിയ മാറ്റം. ഭീകര ശൃംഖലകൾ തകർക്കപ്പെടുന്നതിന് പകരം ആക്രമണങ്ങളുടെ രാഷ്ട്രീയവും നയതന്ത്രപരവുമായ പ്രത്യാഘാതങ്ങൾ വർധിപ്പിക്കാനാണ് അവർ ഇതിലൂടെ ശ്രമിക്കുന്നത്.
