2027-ൽ നടക്കാനിരിക്കുന്ന ഉത്തർപ്രദേശ് നിയമസഭാ തിരഞ്ഞെടുപ്പിൽ അസദുദ്ദീൻ ഒവൈസിയുടെ എ.ഐ.എം.ഐ.എമ്മും (AIMIM) ചന്ദ്രശേഖർ ആസാദിന്റെ ആസാദ് സമാജ് പാർട്ടിയും (ASP) കൈകോർക്കുന്നു. സംസ്ഥാന രാഷ്ട്രീയത്തിൽ സ്വാധീനമുള്ള രണ്ട് പ്രമുഖ കക്ഷികൾ സഖ്യമായി മത്സരിക്കാൻ നീക്കം നടത്തുന്നതായി പ്രമുഖ ദേശീയ മാധ്യമങ്ങൾ റിപ്പോർട്ട് ചെയ്തു. വരുന്ന തിരഞ്ഞെടുപ്പിൽ സമാജ്‌വാദി പാർട്ടിക്കും ബി.ജെ.പിക്കും ഒരുപോലെ ഭീഷണിയാകുന്ന മൂന്നാം മുന്നണി രൂപീകരിക്കുകയാണ് ഈ നീക്കത്തിന് പിന്നിലെ പ്രധാന ലക്ഷ്യമെന്നാണ് വിലയിരുത്തപ്പെടുന്നത്.
സംസ്ഥാനത്തെ ദളിത്-മുസ്ലിം വോട്ട് ബാങ്കുകൾ ഒന്നിപ്പിച്ച് നിർണ്ണായക രാഷ്ട്രീയ മുന്നേറ്റം ഉണ്ടാക്കാനാണ് ഇരു നേതാക്കളും ശ്രമിക്കുന്നത്. നിലവിൽ ഇൻഡി മുന്നണിയിലോ ഭരണകക്ഷിയായ എൻ.ഡി.എയിലോ ഉൾപ്പെടാത്ത ചെറുപാർട്ടികളെയും ഒപ്പം കൂട്ടി വിശാല സഖ്യം തയാറാക്കാൻ പ്രാഥമിക ചർച്ചകൾ പൂർത്തിയായിട്ടുണ്ട്. വെസ്റ്റേൺ ഉത്തർപ്രദേശ് ഉൾപ്പെടെയുള്ള മേഖലകളിൽ ആസാദ് സമാജ് പാർട്ടിക്കും എ.ഐ.എം.ഐ.എമ്മിനും കാര്യമായ സ്വാധീനമുണ്ട്. ഈ സാധ്യത മുൻനിർത്തി എഴുപതോളം സീറ്റുകളിൽ സഖ്യം സ്ഥാനാർത്ഥികളെ നിർത്താനാണ് പ്ലാൻ ചെയ്യുന്നത്.
ഒവൈസിയും ചന്ദ്രശേഖർ ആസാദും ഒന്നിക്കുന്നത് പ്രധാനമായും സമാജ്‌വാദി പാർട്ടി അധ്യക്ഷൻ അഖിലേഷ് യാദവിനാണ് വലിയ തലവേദന സൃഷ്ടിക്കുന്നത്. പരമ്പരാഗതമായി സമാജ്‌വാദി പാർട്ടിക്ക് ലഭിച്ചുകൊണ്ടിരിക്കുന്ന ദളിത്-മുസ്ലിം വോട്ടുകളിൽ ചോർച്ചയുണ്ടാക്കാൻ ഈ പുതിയ മുന്നണിക്ക് സാധിച്ചേക്കും. വരും ദിവസങ്ങളിൽ ഇരു പാർട്ടികളുടെയും പ്രധാന നേതാക്കൾ സംയുക്ത വാർത്താസമ്മേളനം വിളിച്ച് സഖ്യ പ്രഖ്യാപനവും സീറ്റ് വിഭജന വിവരങ്ങളും ഔദ്യോഗികമായി പുറത്തുവിടുമെന്നാണ് വിവരങ്ങൾ നൽകുന്ന സൂചന.
