മെൽബൺ: ഓസ്‌ട്രേലിയയിലെ വിക്ടോറിയൻ മേഖലയിലുള്ള ഈസ്റ്റ് ഗിപ്‌സ്‌ലാൻഡിന്റെ ചരിത്രത്തിൽ പുതിയ അധ്യായം കുറിച്ച് ആദ്യ ദീപാവലി ആഘോഷം. ബെയർൺസ്‌ഡെയിൽ റേസ്‌കോഴ്‌സിൽ സംഘടിപ്പിച്ച 144-ാമത് ബെയർൺസ്‌ഡെയിൽ ഷോയുടെ ഭാഗമായി, ഈസ്റ്റ് ഗിപ്‌സ്‌ലാൻഡ് ഷയർ കൗൺസിലും ഈസ്റ്റ് ഗിപ്‌സ്‌ലാൻഡ് മലയാളി അസോസിയേഷനും (EGMA) സംയുക്തമായാണ് വർണാഭമായ ഈ ദീപാവലി ആഘോഷം ഒരുക്കിയത്. വിദേശമണ്ണിൽ ഇന്ത്യൻ സംസ്കാരത്തിനും പ്രവാസി മലയാളി കൂട്ടായ്മയ്ക്കും ലഭിക്കുന്ന വൻ സ്വീകാര്യതയുടെ അടയാളമായി മാറിയ പരിപാടി കാണികൾക്ക് വിസ്മയക്കാഴ്ചയായി.
ഓസ്‌ട്രേലിയയിലെ വിക്ടോറിയ, ടാസ്മാനിയ സംസ്ഥാനങ്ങളിലെ ഇന്ത്യൻ കോൺസൽ ജനറൽ അനീഷ് രാജൻ പരിപാടിയിൽ മുഖ്യാതിഥിയായി പങ്കെടുത്തു. പ്രവാസി സമൂഹത്തിന്റെ ഈ സാംസ്കാരിക സംഗമത്തെ അഭിനന്ദിച്ച അദ്ദേഹം ഈസ്റ്റ് ഗിപ്‌സ്‌ലാൻഡിലെ ജനങ്ങൾക്ക് ദീപാവലി ആശംസകൾ നേർന്നു. ആഘോഷവേളയെ കൂടുതൽ ആകർഷകമാക്കിയത് ഈസ്റ്റ് ഗിപ്‌സ്‌ലാൻഡ് മലയാളി അസോസിയേഷൻ അംഗങ്ങൾ അവതരിപ്പിച്ച വിവിധ കലാപരിപാടികളായിരുന്നു. പ്രത്യേകിച്ച്, അസോസിയേഷനിലെ പെൺകുട്ടികൾ ദീപാവലി പ്രമേയമാക്കി അവതരിപ്പിച്ച ഫ്യൂഷൻ നൃത്തം കാണികളുടെ കൈയടി നേടി.
പ്രതികൂല കാലാവസ്ഥയെയും മഞ്ഞുവീഴ്ചയെയും തൃണവൽക്കരിച്ച് ആയിരക്കണക്കിന് ആളുകളാണ് ആഘോഷത്തിൽ പങ്കാളികളാകാൻ ഒഴുകിയെത്തിയത്. വിക്കി മെമ്പറായ ടീം ബുൾ എം.പി, ഷയർ മേയർ ജോഡി ആഷ്‌വർത്ത്, ഡെപ്യൂട്ടി മേയർ ടോം ക്രൂക്ക്, ചീഫ് എക്സിക്യൂട്ടീവ് ഓഫീസർ ഫിയോണ വീഗാൾ, പ്രോഗ്രാം കൺവീനർ തരുൺ ബജാജ്, ബെയർൺസ്‌ഡെയിൽ ഷോ കമ്മറ്റി ഭാരവാഹികൾ, ഇ.ജി.എം.എ ഭാരവാഹികളായ ശരത് ശങ്കർ, ചിറ്റു സണ്ണി, ബെൻസൺ ബാബു തുടങ്ങിയ പ്രമുഖർ ചടങ്ങുകൾക്ക് നേതൃത്വം നൽകി.
വൈവിധ്യമാർന്ന ഭാരതീയ ഭക്ഷണവിഭവങ്ങൾ, സംഗീതമേള, ഫയർ ഡാൻസ്, ആകാശത്ത് വർണ്ണങ്ങൾ വിതറിയ മനോഹരമായ വെടിക്കെട്ട് എന്നിവ ആഘോഷത്തിന്റെ മാറ്റ് കൂട്ടി.
