യുഎഇയിലെ മുസ്‌ലിം ഇതര ആരാധനാലയങ്ങളുടെ പ്രവർത്തനങ്ങൾ കൂടുതൽ സുതാര്യവും നിയന്ത്രിതവുമാക്കുന്നതിന്റെ ഭാഗമായി ഭരണകൂടം പുതിയ നിയമങ്ങളും കർശന നിബന്ധനകളും പ്രാബല്യത്തിൽ വരുത്തി. വിവിധതരം ലംഘനങ്ങൾക്കായി 24 പുതിയ മാനദണ്ഡങ്ങളാണ് പ്രഖ്യാപിച്ചിരിക്കുന്നത്. ഇതിലൂടെ ചട്ടങ്ങൾ ലംഘിക്കുന്ന ആരാധനാലയങ്ങൾക്ക് 5,000 ദിർഹം മുതൽ 7.5 ലക്ഷം ദിർഹം വരെ പിഴയും പ്രവർത്തന വിലക്കും നേരിടേണ്ടിവരും.
ഒക്ടോബർ പകുതിയോടെ നിലവിൽ വന്ന പുതിയ മന്ത്രിസഭാ പ്രമേയത്തിന്റെ അടിസ്ഥാനത്തിലാണ് ഈ കർശന നടപടികൾ. നിയമലംഘനങ്ങളുടെ ഗൗരവം അനുസരിച്ചാണ് പിഴത്തുകയും താക്കീതുകളും നിശ്ചയിച്ചിരിക്കുന്നത്. കുറ്റങ്ങൾ ആവർത്തിക്കുന്ന സ്ഥാപനങ്ങളുടെ പ്രവർത്തനം മൂന്നു മാസം വരെ താൽക്കാലികമായി നിർത്തിവയ്പ്പിക്കാനും ഉത്തരവിൽ വ്യവസ്ഥയുണ്ട്.
യുഎഇക്ക് പുറത്തുനിന്നുള്ള വ്യക്തികളിൽ നിന്നോ സ്ഥാപനങ്ങളിൽ നിന്നോ ധനസഹായമോ സംഭാവനകളോ സ്വീകരിക്കുന്നതിന് 1 ലക്ഷം മുതൽ 5 ലക്ഷം ദിർഹം വരെ പിഴ ചുമത്തും. വിദേശത്തേക്ക് ഫണ്ട് കൈമാറുന്നതിന് 50,000 മുതൽ 2.5 ലക്ഷം ദിർഹം വരെയാണ് പിഴ. സോഷ്യൽ മീഡിയയിലൂടെയോ മറ്റ് മാധ്യമങ്ങളിലൂടെയോ ഉള്ള സംഭാവന പിരിവുകളും പരസ്യങ്ങളും പൂർണ്ണമായും നിരോധിച്ചിട്ടുണ്ട്.
സ്ഥാപനത്തിന് അനുവദിച്ച കെട്ടിടത്തിന് വെളിയിൽ മതപരമായ ചടങ്ങുകളോ ആചാരങ്ങളോ സംഘടിപ്പിച്ചാൽ 1 ലക്ഷം മുതൽ 4 ലക്ഷം ദിർഹം വരെ പിഴ ഈടാക്കും.
വിദേശ രാജ്യങ്ങളിലെ ആരാധനാലയങ്ങളുമായോ സംഘടനകളുമായോ ചേർന്ന് യോഗങ്ങളോ സമ്മേളനങ്ങളോ സംഘടിപ്പിക്കുകയോ, മറ്റ് നയതന്ത്ര സാന്നിധ്യങ്ങളുമായി ഔദ്യോഗിക ബന്ധം സ്ഥാപിക്കുകയോ ചെയ്താൽ ഏറ്റവും ഉയർന്ന പിഴയായ 7.5 ലക്ഷം ദിർഹം വരെ ചുമത്തും.
ആരാധകരുടെയോ ജീവനക്കാരുടെയോ സുരക്ഷയ്ക്ക് ഭീഷണി ഉയർത്തുന്ന ആചാരങ്ങൾ ഉണ്ടായാൽ ആദ്യ തവണ 1 ലക്ഷം ദിർഹം പിഴയും, വീഴ്ച ആവർത്തിച്ചാൽ മൂന്നു മാസത്തേക്ക് സ്ഥാപനം അടച്ചിടാനും ഉത്തരവിൽ വ്യവസ്ഥയുണ്ട്.
അതേസമയം, ഭരണകൂടം ചുമത്തുന്ന പിഴയും മറ്റ് നടപടികളും സംബന്ധിച്ച അറിയിപ്പ് ലഭിച്ച് 15 ദിവസത്തിനകം ബന്ധപ്പെട്ട അധികാരികൾക്ക് അപ്പീൽ നൽകാനുള്ള അവകാശവും ആരാധനാലയങ്ങൾക്ക് ഉണ്ടായിരിക്കും.
