ന്യൂഡൽഹി: ദേശീയ വനിതാ കമ്മീഷന് പ്രതിവർഷം ലഭിക്കുന്നത് ഒന്നര ലക്ഷത്തോളം പരാതികളെന്ന് കമ്മീഷൻ അധ്യക്ഷ വിജയ രഹത്കർ. ഇതിൽ ഭൂരിഭാഗവും ഗാർഹിക പീഡനവുമായി ബന്ധപ്പെട്ട പരാതികളാണെന്ന് കമ്മീഷൻ അധ്യക്ഷ വ്യക്തമാക്കി. പരാതി നൽകാൻ വഴി അറിയില്ലെന്ന കാരണത്താൽ മാത്രം രാജ്യത്തെ ഒരു സ്ത്രീക്കും നീതി നിഷേധിക്കപ്പെടരുതെന്നും, ദേശീയ വനിതാ കമ്മീഷനെ സ്ത്രീകൾ തങ്ങളുടെ സ്വന്തം ‘മാതൃവീട്’ (പിറന്ന വീട്) പോലെ കാണണമെന്നും വിജയ രഹത്കർ പറഞ്ഞു.
രാജ്യത്തുടനീളമുള്ള സാധാരണക്കാരായ സ്ത്രീകളിലേക്ക് നേരിട്ടെത്തുന്നതിനായി വലിയ രീതിയിലുള്ള പൊതുജന പരാതി പരിഹാര അദാലത്തുകളാണ് വനിതാ കമ്മീഷൻ സംഘടിപ്പിച്ചു വരുന്നത്. കമ്മീഷന്റെ ആഭിമുഖ്യത്തിൽ ഗ്രാമങ്ങളും മറ്റ് ഉൾനാടൻ പ്രദേശങ്ങളും കേന്ദ്രീകരിച്ച് ഇതിനകം ഇരുന്നൂറിലധികം നേരിട്ടുള്ള ജനസമ്പർക്ക അദാലത്തുകൾ നടത്തിക്കഴിഞ്ഞു. സ്ത്രീകൾക്ക് ഓഫീസുകളിലേക്ക് നേരിട്ടെത്താൻ ബുദ്ധിമുട്ടുള്ള സാഹചര്യത്തിലാണ് കമ്മീഷൻ ഇത്തരത്തിൽ പരാതിക്കാരുടെ അടുത്തേക്ക് നേരിട്ടെത്തുന്നത്.
പരാതി നൽകുന്നതിനായി കമ്മീഷന്റെ വെബ്‌സൈറ്റ്, ഓൺ‌ലൈൻ പോർട്ടൽ, ഇ-മെയിൽ, 24 മണിക്കൂറും പ്രവർത്തിക്കുന്ന ഹെൽപ്പ് ലൈൻ നമ്പർ (14490) എന്നിവയ്ക്ക് പുറമേ നേരിട്ടുള്ള ഓഫീസുകളും സജ്ജമാക്കിയിട്ടുണ്ട്. ഒരു സ്ത്രീക്ക് എന്തെങ്കിലും പ്രതിസന്ധി ഉണ്ടായാൽ അവർ ആദ്യം സമീപിക്കുന്നത് അമ്മയെയാണ്. അതേ വിശ്വാസത്തോടെയും സ്വാതന്ത്ര്യത്തോടെയും ഭയമില്ലാതെയും സ്ത്രീകൾക്ക് ദേശീയ വനിതാ കമ്മീഷനെ സമീപിക്കാമെന്ന് വിജയ രഹത്കർ ഓർമ്മിപ്പിച്ചു. നിയമപരമായ അവകാശങ്ങളെക്കുറിച്ച് ബോധവൽക്കരണം നടത്തുന്നതിനൊപ്പം സ്ത്രീകളിൽ ആത്മവിശ്വാസം വളർത്താനുള്ള പരിപാടികൾക്കും കമ്മീഷൻ മുൻഗണന നൽകുന്നുണ്ട്.
