പ്രധാനമന്ത്രി നരേന്ദ്ര മോദിക്കെതിരെ സംവാദ വെല്ലുവിളി ഉയർത്തിയ പ്രതിപക്ഷ നേതാവ് രാഹുൽ ഗാന്ധിക്ക് മറുപടിയുമായി കേന്ദ്ര മന്ത്രി കിരൺ റിജിജു. രാജ്യത്ത് ആയുധമേന്തിയ മാവോയിസ്റ്റുകളെ ഇല്ലാതാക്കിയതിന് രാഹുൽ ഗാന്ധി പ്രധാനമന്ത്രിയോട് നന്ദി പറയുകയാണ് വേണ്ടതെന്ന് റിജിജു പറഞ്ഞു. സമാധാനപരമായ അന്തരീക്ഷം തകർക്കാൻ ശ്രമിക്കുന്ന ‘ദിമാഗി നക്സലുകളെ’ ഉന്മൂലനം ചെയ്യുകയാണ് സർക്കാരിന്റെ അടുത്ത ലക്ഷ്യമെന്ന് അദ്ദേഹം വ്യക്തമാക്കി. ഇടത് തീവ്രവാദവും നക്സലിസവും ഇന്ത്യയിലെ ഏറ്റവും വലിയ ആഭ്യന്തര സുരക്ഷാ ഭീഷണിയാണെന്ന് മുൻ പ്രധാനമന്ത്രി ഡോ. മൻമോഹൻ സിംഗ് വിശേഷിപ്പിച്ചത് റിജിജു സമൂഹമാധ്യമമായ എക്സിലൂടെ ഓർമ്മിപ്പിച്ചു.
ഛത്തീസ്ഗഢിലെ ബസ്തറിലുള്ള സി.ആർ.പി.എഫ് ക്യാമ്പിൽ സുരക്ഷാ ഉദ്യോഗസ്ഥർക്കൊപ്പം ദീപാവലി ആഘോഷിക്കുന്നതിനിടെ പ്രധാനമന്ത്രി മോദി നടത്തിയ പരാമർശമാണ് തർക്കങ്ങൾക്ക് തുടക്കമിട്ടത്. ആയുധമേന്തിയ നക്സലുകൾ ഇല്ലാതായെങ്കിലും സമൂഹത്തിലെ വിവിധ സ്ഥാപനങ്ങളിലും രാഷ്ട്രീയ കക്ഷികളിലും നക്സൽ ആശയങ്ങൾ വെച്ചുപുലർത്തുന്നവർ കടന്നുകൂടിയിട്ടുണ്ടെന്നായിരുന്നു മോദിയുടെ വിമർശനം. ഇതിനെതിരെ രൂക്ഷമായി പ്രതികരിച്ച രാഹുൽ ഗാന്ധി, പ്രധാനമന്ത്രിയുടെ വാക്കുകൾ സി.ആർ.പി.എഫ് ജവാന്മാർ വിശ്വസിച്ചിട്ടില്ലെന്ന് അവകാശപ്പെട്ടു. വിദേശ ശക്തികളുടെ സഹായം തേടിയതും രാജ്യവിരുദ്ധ പ്രവർത്തനങ്ങളിൽ ഏർപ്പെട്ടതും ആരാണെന്ന് വ്യക്തമാക്കാൻ പ്രധാനമന്ത്രി ഏത് വേദിയിലും തന്നോട് സംവാദത്തിന് തയ്യാറാകണമെന്നും രാഹുൽ വെല്ലുവിളിച്ചിരുന്നു.
എന്നാൽ രാഹുൽ ഗാന്ധിയുടെ വാദങ്ങളെ പൂർണ്ണമായി തള്ളി ബി.ജെ.പി നേതൃത്വം രംഗത്തെത്തി. പ്രതിപക്ഷ നേതാവ് പാർലമെന്റിലെ പ്രധാന ചർച്ചകളിൽ പങ്കാളിയാകാതെ ആരോപണങ്ങൾ ഉന്നയിച്ച് ഓടിപ്പോകുന്ന ‘ഹിറ്റ് ആൻഡ് റൺ’ രീതിയാണ് സ്വീകരിക്കുന്നതെന്ന് ഭരണകക്ഷി ആരോപിച്ചു. യഥാർത്ഥ വികസന ചർച്ചകളിൽ നിന്ന് ശ്രദ്ധ തിരിക്കാനാണ് കോൺഗ്രസ് ശ്രമിക്കുന്നതെന്നും കിരൺ റിജിജു കുറ്റപ്പെടുത്തി. ‘ദിമാഗി നക്സൽ’ പ്രയോഗത്തെിച്ചൊല്ലി ഭരണപക്ഷവും പ്രതിപക്ഷവും തമ്മിൽ ആരംഭിച്ച ഈ വാക്പോര് വരും ദിവസങ്ങളിലും രാഷ്ട്രീയ അന്തരീക്ഷത്തിൽ കനത്ത പുകച്ചിൽ സൃഷ്ടിക്കുമെന്നാണ് കരുതപ്പെടുന്നത്.
