എ.ഐ. (AI) യുഗത്തിൽ പരീക്ഷാഹാളുകളിലെ ഹൈടെക് കോപ്പിയടി തടയാൻ അസാധാരണമായൊരു തന്ത്രം പ്രയോഗിച്ച് ദക്ഷിണ കൊറിയൻ ഭരണകൂടം. പരീക്ഷാഹാളുകളിൽ ഒളിപ്പിച്ചുവെച്ച മൊബൈൽ ഫോണുകൾ കണ്ടെത്താനായി രാജ്യത്തുടനീളം ഒരേസമയം ദേശീയ അടിയന്തര ദുരന്ത മുന്നറിയിപ്പ് (Emergency Disaster Alert) മുഴക്കിയാണ് അധികൃതർ വിദ്യാർത്ഥികളെ കുടുക്കിയത്. ദക്ഷിണ കൊറിയയിലെ ഏറ്റവും നിർണ്ണായകമായ കോളേജ് പ്രവേശന പരീക്ഷയായ ‘സുനെയുങ്’ (Suneung) നടക്കുന്നതിനിടെയാണ് ഈ വൻ ഓപ്പറേഷൻ നടന്നത്. മിസൈൽ ആക്രമണമോ വൻ പ്രകൃതിദുരന്തമോ ഉണ്ടായാൽ ജനങ്ങൾക്ക് മുന്നറിയിപ്പ് നൽകാൻ ഉപയോഗിക്കുന്ന അലർട്ട് സംവിധാനമാണ് ഇതിനായി പ്രയോജനപ്പെടുത്തിയത്. ഫോണുകൾ സൈലന്റ് മോഡിലോ വൈബ്രേഷൻ മോഡിലോ ആണെങ്കിൽ പോലും പരമാവധി ശബ്ദത്തിൽ അപായ സൈറൺ മുഴങ്ങുന്നതാണ് ഈ സംവിധാനത്തിന്റെ പ്രത്യേകത. ഇതോടെ പരീക്ഷാഹാളുകളിൽ ഒളിപ്പിച്ചുവെച്ച ഫോണുകൾ ഒന്നാകെ ഉച്ചത്തിൽ റിങ് ചെയ്യുകയും, ഇൻവിജിലേറ്റർമാർ അവ കയ്യോടെ പിടികൂടുകയുമായിരുന്നു.
നവംബർ 19-ന് പരീക്ഷ തുടങ്ങുന്നതിന് തൊട്ടുമുൻപ് രാവിലെ 8.30-നാണ് ആദ്യ മുന്നറിയിപ്പ് സന്ദേശം അയച്ചത്. ഇതോടെ രാജ്യത്തിന്റെ വിവിധ ഭാഗങ്ങളിലുള്ള പരീക്ഷാകേന്ദ്രങ്ങളിൽ നിന്ന് 31 വിദ്യാർത്ഥികളുടെ കൈവശം ഒളിപ്പിച്ചുവെച്ച ഫോണുകൾ പിടിച്ചെടുത്തു. തുടർന്ന് ഉച്ചയ്ക്ക് രണ്ട് ഘട്ടങ്ങളിലായി വീണ്ടും ദുരന്ത മുന്നറിയിപ്പ് മുഴക്കിയതോടെ കൂടുതൽ പേർ കുടുങ്ങി. ഇത്തരത്തിൽ അടിയന്തര അലർട്ടിലൂടെ മാത്രം 49 വിദ്യാർത്ഥികളെയാണ് ഫോൺ ഒളിപ്പിച്ചുവെച്ചതിന് പിടികൂടിയത്. ഇലക്ട്രോണിക് ഉപകരണങ്ങൾ പരീക്ഷാഹാളിൽ കൊണ്ടുവരുന്നത് കർശനമായി നിരോധിച്ചിട്ടുണ്ടെങ്കിലും, അത് ലംഘിച്ച് ഫോൺ ഒളിപ്പിച്ചവരാണ് അപ്രതീക്ഷിത നീക്കത്തിൽ കുടുങ്ങിയത്.
അടിയന്തര മുന്നറിയിപ്പുകൾക്ക് പുറമെ, പരീക്ഷാഹാളുകൾക്ക് ചുറ്റുമുള്ള വൈഫൈ (Wi-Fi), ബ്ലൂടൂത്ത് സിഗ്നലുകൾ നിരീക്ഷിച്ചും പ്രത്യേക പരിശോധനകൾ നടത്തിയും അധികൃതർ കോപ്പിയടി ശ്രമങ്ങൾ പൊളിച്ചു. സ്മാർട്ട് വാച്ചുകൾ, ഇയർബഡുകൾ, മറ്റ് നിരോധിത ഇലക്ട്രോണിക് ഉപകരണങ്ങൾ എന്നിവ കൈവശം വെച്ച 44 വിദ്യാർത്ഥികളെ കൂടി പരിശോധനകളിൽ പിടികൂടി. ഇതിൽ രണ്ട് പേരെ വൈഫൈ സിഗ്നൽ നിരീക്ഷണത്തിലൂടെയാണ് തിരിച്ചറിഞ്ഞത്. ദക്ഷിണ ചുങ്ചിയോങ് പ്രവിശ്യയിലെ ഒരു പരീക്ഷാകേന്ദ്രത്തിൽ സ്മാർട്ട് ഗ്ലാസ് (Smart Glasses) ഉപയോഗിച്ച് കോപ്പിയടിക്കാൻ ശ്രമിച്ച ഒരു വിദ്യാർത്ഥിയെയും അധികൃതർ പിടികൂടിയിട്ടുണ്ട്.
ഇത്തരത്തിൽ രാജ്യത്തുടനീളം ആകെ 98 വിദ്യാർത്ഥികൾ പരീക്ഷാ ചട്ടങ്ങൾ ലംഘിച്ചതായാണ് ദക്ഷിണ കൊറിയൻ വിദ്യാഭ്യാസ മന്ത്രാലയം ഔദ്യോഗികമായി അറിയിച്ചിരിക്കുന്നത്. പിടിക്കപ്പെട്ടവരുടെ പരീക്ഷാഫലം പൂർണ്ണമായും റദ്ദാക്കുന്നതിനൊപ്പം, അടുത്ത വർഷത്തെ പ്രവേശന പരീക്ഷ എഴുതുന്നതിൽ നിന്ന് ഇവരെ വിലക്കുകയും ചെയ്യും. ദക്ഷിണ കൊറിയയിലെ വിദ്യാർത്ഥികളുടെ ഭാവി നിർണ്ണയിക്കുന്ന അതികഠിനമായ സുനെയുങ് പരീക്ഷയിൽ ക്രമക്കേടുകൾ തടയാൻ രാജ്യം മുഴുവൻ അതീവ ജാഗ്രതയിലാണ്. പരീക്ഷാ സമയത്ത് വിമാനങ്ങളുടെ ടേക്ക് ഓഫും ലാൻഡിംഗും നിർത്തിവെക്കുകയും, ഓഫീസുകളുടെയും ഓഹരി വിപണിയുടെയും പ്രവർത്തന സമയം മാറ്റുകയും ചെയ്യുന്നത്ര പ്രാധാന്യമാണ് ദക്ഷിണ കൊറിയ ഈ പരീക്ഷയ്ക്ക് നൽകുന്നത്.












