തമിഴ്നാട് നിയമസഭാ തിരഞ്ഞെടുപ്പിൽ മുൻ മുഖ്യമന്ത്രിയും ഡിഎംകെ അധ്യക്ഷനുമായ എം.കെ. സ്റ്റാലിനെ അട്ടിമറിച്ച ‘ജയന്റ് കില്ലർ’ വി.എസ്. ബാബുവിന്റെ (75) വിയോഗത്തോടെ കൊളത്തൂർ മണ്ഡലം വീണ്ടും ദേശീയ ശ്രദ്ധയിലേക്ക്. തമിഴക വെട്രി കഴകം (ടിവികെ) എംഎൽഎയായിരുന്ന ബാബുവിന്റെ നിര്യാണത്തെത്തുടർന്ന് മണ്ഡലത്തിൽ ഉപതിരഞ്ഞെടുപ്പിന് കളമൊരുങ്ങിയതോടെ, സ്റ്റാലിൻ വീണ്ടും ജനവിധി തേടുമോ എന്ന ആകാംക്ഷയിലാണ് തമിഴ്നാട് രാഷ്ട്രീയ ലോകം.
ശ്വാസകോശ സംബന്ധമായ അസുഖങ്ങളെത്തുടർന്ന് ചെന്നൈയിലെ സ്വകാര്യ ആശുപത്രിയിൽ 71 ദിവസമായി ചികിത്സയിലായിരുന്ന വി.എസ്. ബാബു വ്യാഴാഴ്ച ഉച്ചയോടെ ഹൃദയാഘാതത്തെ തുടർന്നാണ് അന്തരിച്ചത്. 2026-ലെ നിയമസഭാ തിരഞ്ഞെടുപ്പിൽ 8,795 വോട്ടുകളുടെ ഭൂരിപക്ഷത്തിലാണ് ബാബു സ്റ്റാലിനെ പരാജയപ്പെടുത്തിയത്. 2011 മുതൽ സ്റ്റാലിൻ തുടർച്ചയായി പ്രതിനിധീകരിച്ചിരുന്ന ഉറച്ച കോട്ട പിടിച്ചെടുത്ത ഈ വിജയം നടൻ വിജയ് രൂപീകരിച്ച ടിവികെയുടെ അധികാരാരോഹണത്തിന് മാറ്റുകൂട്ടുകയും ഡിഎംകെയ്ക്ക് കനത്ത പ്രഹരമേൽപ്പിക്കുകയും ചെയ്തിരുന്നു. ബാബുവിന്റെ മരണത്തോടെ തമിഴ്നാട് നിയമസഭയിൽ ഉപതിരഞ്ഞെടുപ്പ് വേണ്ടിവരുന്ന മണ്ഡലങ്ങളുടെ എണ്ണം ആറായി ഉയർന്നു.
വി.എസ്. ബാബുവിന്റെ വിയോഗത്തിന് പിന്നാലെ സ്റ്റാലിൻ വീണ്ടും കൊളത്തൂരിൽ മത്സരിക്കണമെന്ന ആവശ്യം ഡിഎംകെ അണികൾക്കിടയിൽ ശക്തമായിക്കഴിഞ്ഞു. സ്റ്റാലിൻ മത്സരിക്കണമെന്നാണ് പ്രവർത്തകരുടെ ആഗ്രഹമെന്നും എന്നാൽ ഇക്കാര്യത്തിൽ അന്തിമ തീരുമാനമെടുക്കേണ്ടത് അദ്ദേഹം തന്നെയാണെന്നും ഡിഎംകെ എംപി സി. രവീന്ദ്രൻ പ്രതികരിച്ചു. “അത് ഞങ്ങളുടെ നേതാവിന്റെ മണ്ഡലമാണ്. അവിടെ മത്സരിക്കണോ വേണ്ടയോ എന്ന് തീരുമാനിക്കേണ്ടത് അദ്ദേഹം മാത്രമാണ്. ഒരു ഡിഎംകെ പ്രവർത്തകൻ എന്ന നിലയിൽ അദ്ദേഹം മത്സരിക്കുന്നത് കാണാൻ ഞങ്ങൾ ആഗ്രഹിക്കുന്നു,” രവീന്ദ്രൻ വ്യക്തമാക്കി.
ഡിഎംകെയിലൂടെ രാഷ്ട്രീയ ജീവിതം ആരംഭിച്ച വി.എസ്. ബാബു, മുൻപ് സ്റ്റാലിന്റെ വിശ്വസ്തനും പാർട്ടിയുടെ ചെന്നൈ നോർത്ത് ജില്ലാ സെക്രട്ടറിയുമായിരുന്നു. 2006-ൽ ഡിഎംകെ ടിക്കറ്റിൽ പുരസൈവാക്കത്ത് നിന്ന് നിയമസഭയിലേക്ക് തിരഞ്ഞെടുക്കപ്പെട്ട അദ്ദേഹം 2011 വരെ മണ്ഡലത്തെ പ്രതിനിധീകരിച്ചു. 2011-ൽ കൊളത്തൂരിൽ സ്റ്റാലിന്റെ തിരഞ്ഞെടുപ്പ് പ്രചാരണങ്ങൾക്ക് ചുക്കാൻ പിടിച്ചതും ബാബുവായിരുന്നു. പിന്നീട് പാർട്ടി നേതൃത്വവുമായുള്ള അഭിപ്രായവ്യത്യാസങ്ങളെത്തുടർന്ന് 2016-ൽ എഐഎഡിഎംകെയിൽ ചേർന്ന അദ്ദേഹം, നിയമസഭാ തിരഞ്ഞെടുപ്പിന് തൊട്ടുമുമ്പ് 2026 ഫെബ്രുവരിയിലാണ് വിജയ്യുടെ ടിവികെയിൽ എത്തിയത്. തുടർന്ന് സ്റ്റാലിനെതിരെ കൊളത്തൂരിൽ ബാബുവിനെ ഇറക്കിയ ടിവികെയുടെ തന്ത്രം വൻ വിജയമാകുകയായിരുന്നു. തിരഞ്ഞെടുപ്പ് കമ്മീഷൻ ഉപതിരഞ്ഞെടുപ്പ് തീയതി പ്രഖ്യാപിക്കുന്നതോടെ കൊളത്തൂരിൽ വീണ്ടും ഒരു തീപാറുന്ന പോരാട്ടത്തിന് തമിഴകം സാക്ഷ്യം വഹിക്കുമെന്ന് ഉറപ്പായിക്കഴിഞ്ഞു.










