വാണിജ്യ വിമാനങ്ങൾക്ക് നേരെ ആക്രമണം നടത്താൻ അൽ-ഖ്വയ്ദ അനുബന്ധ സംഘടനകളും അനുയായികളും ആഹ്വാനം ചെയ്യുന്ന പശ്ചാത്തലത്തിൽ അമേരിക്കയിലെ വ്യോമയാന മേഖലയ്ക്ക് ഫെഡറൽ ഏജൻസികൾ ജാഗ്രതാ നിർദ്ദേശം നൽകി. കഴിഞ്ഞ സെപ്റ്റംബറിൽ ദുബായ്–ടെൽ അവീവ് ഫ്ലൈദുബായ് വിമാനത്തിൽ നടന്ന റാഞ്ചൽ ശ്രമം മാതൃകയാക്കാൻ ഭീകരർ പ്രേരിപ്പിക്കുന്നതായാണ് റിപ്പോർട്ട്.
ഫെഡറൽ ബ്യൂറോ ഓഫ് ഇൻവെസ്റ്റിഗേഷൻ ഡിപ്പാർട്ട്മെന്റ് ഓഫ് ഹോംലാൻഡ് സെക്യൂരിറ്റി , ട്രാൻസ്പോർട്ടേഷൻ സെക്യൂരിറ്റി അഡ്മിനിസ്ട്രേഷൻ എന്നിവ സംയുക്തമായാണ് യുഎസിലെ വാണിജ്യ വിമാനക്കമ്പനികൾക്കും എയർ കാർഗോ ഓപ്പറേറ്റർമാർക്കും വിമാനത്താവളങ്ങൾക്കും മുന്നറിയിപ്പ് നൽകിയത്. അമേരിക്കൻ, ഇസ്രായേലി ലക്ഷ്യങ്ങൾക്കെതിരെ സമാനമായ ആക്രമണങ്ങൾ ആവർത്തിക്കാൻ ഓൺലൈൻ സന്ദേശങ്ങളിലൂടെ ആഹ്വാനങ്ങളുണ്ടെന്നാണ് മുന്നറിയിപ്പിൽ പറയുന്നത്.
കഴിഞ്ഞ സെപ്റ്റംബറിൽ ദുബായിൽ നിന്ന് ടെൽ അവീവിലേക്ക് പോയ ഫ്ലൈദുബായ് വിമാനത്തിനുള്ളിൽ കോക്പിറ്റിലിരുന്ന് ഒരു പൈലറ്റ് സഹപൈലറ്റിനെ കോടാലി ഉപയോഗിച്ച് ആക്രമിക്കുകയും വിമാനം തകർക്കാൻ ശ്രമിക്കുകയും ചെയ്തതായാണ് റിപ്പോർട്ടുകൾ. പരിക്കേറ്റ പൈലറ്റ് ചെറുത്തുനിന്നതിനാലാണ് ആക്രമണശ്രമം വിഫലമായതെന്ന് ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹു വ്യക്തമാക്കിയിരുന്നു. വിമാനത്താവള സുരക്ഷാ സംവിധാനങ്ങൾ മറികടക്കാൻ കഴിയുമെന്ന തരത്തിലാണ് ഭീകരർ ഈ സംഭവത്തെ ഓൺലൈൻ പ്രചാരണങ്ങളിൽ ഉപയോഗിക്കുന്നത്.
എന്നിരുന്നാലും, നിലവിൽ നിർദ്ദിഷ്ടമോ വിശ്വസനീയമോ ആയ ആക്രമണ പദ്ധതികൾ കണ്ടെത്തിയിട്ടില്ലെന്ന് യുഎസ് നിയമപാലക വൃത്തങ്ങൾ അറിയിച്ചതായി റിപ്പോർട്ടുകൾ പുറത്തുവരുന്നു . മുൻകരുതൽ നടപടികളുടെ ഭാഗമായാണ് സ്വകാര്യ മേഖലയുമായി ഇത്തരം വിവരങ്ങൾ പങ്കുവെക്കുന്നത്.
അമേരിക്കയിലെ ഏറ്റവും തിരക്കേറിയ യാത്രാകാലങ്ങളിലൊന്നായ താങ്ക്സ്ഗിവിംഗ് അവധിക്ക് തൊട്ടുമുൻപാണ് ഈ മുന്നറിയിപ്പ് എന്നതും ശ്രദ്ധേയമാണ്. നവംബർ 24 മുതൽ 30 വരെ ഏകദേശം 60 ലക്ഷത്തോളം പേർ ആഭ്യന്തര വിമാനങ്ങളിൽ യാത്ര ചെയ്യുമെന്നാണ് അമേരിക്കൻ ഓട്ടോമൊബൈൽ അസോസിയേഷൻ കണക്കാക്കുന്നത്.
മധ്യപൂർവ്വേഷ്യയിലെ സംഘർഷങ്ങളും ഫ്ലൈദുബായ് സംഭവത്തിന് ലഭിക്കുന്ന പ്രചാരണവും അമേരിക്കൻ വിരുദ്ധ വികാരം ആളിക്കത്തിക്കാനും, മുന്നറിയിപ്പില്ലാതെ പെട്ടെന്ന് ആക്രമണത്തിന് മുതിരുന്ന വ്യക്തികളെ പ്രേരിപ്പിക്കാനും ഇടയാക്കുമെന്ന് ഏജൻസികൾ മുന്നറിയിപ്പ് നൽകുന്നു.
വിമാനത്താവളങ്ങളിലും വിമാനക്കമ്പനികളിലും ശ്രദ്ധിക്കേണ്ട മുന്നറിയിപ്പ് സൂചനകൾ
1. സംശയാസ്പദമായ നീക്കങ്ങൾ ശ്രദ്ധയിൽപ്പെട്ടാൽ ഉടൻ തന്നെ നിയമപാലകരെ അറിയിക്കാൻ എഫ്ബിഐ തീരുമാനങ്ങൾ വന്നിട്ടുണ്ട്.
2. നിലവിലുള്ള വിമാനത്താവള സുരക്ഷാ പരിശോധനകൾ ഒഴിവാക്കാനോ മറികടക്കാനോ ഉള്ള ശ്രമങ്ങൾ.
കൃത്യമായ ഔദ്യോഗിക ആവശ്യമില്ലാതെ വിമാന പ്രവർത്തനങ്ങൾ അല്ലെങ്കിൽ സുരക്ഷാ പ്രോട്ടോക്കോളുകൾ സംബന്ധിച്ച വിശദാംശങ്ങൾ തേടുന്നത്.
3. പ്രത്യേക ലഗേജുകൾ മറ്റാരുടെയും സഹായമില്ലാതെ സ്വയം കൈകാര്യം ചെയ്യാൻ നിർബന്ധം പിടിക്കുന്നത്.
വിമാനക്കമ്പനികളുടെ റേഡിയോകൾ, വിമാനത്താവള പ്രവേശന ബാഡ്ജുകൾ, യൂണിഫോമുകൾ തുടങ്ങിയ ഉപകരണങ്ങൾ കാണാതാകുന്നത്.












