ന്യൂഡൽഹി: ഡൽഹിയിൽ നിന്ന് കശ്മീർ താഴ്വരയിലേക്ക് വൻതോതിൽ ലഹരിമരുന്നുകൾ കടത്തുന്ന അന്തർസംസ്ഥാന ശൃംഖലയെ നാർക്കോട്ടിക് കൺട്രോൾ ബ്യൂറോ (എൻസിബി) തകർത്തു. എൻസിബിയുടെ ജമ്മു, ഡൽഹി സോണൽ യൂണിറ്റുകൾ സംയുക്തമായി നടത്തിയ നീക്കത്തിൽ വടക്കുകിഴക്കൻ ഡൽഹിയിലെ ഷഹ്ദരയിലുള്ള രഹസ്യ ഗോഡൗണിൽ നിന്ന് അഞ്ച് ലക്ഷത്തിലധികം ലഹരി ഗുളികകളും ക്യാപ്സ്യൂളുകളും ചുമമരുന്ന് കുപ്പികളും പിടിച്ചെടുത്തു. സംഭവവുമായി ബന്ധപ്പെട്ട് നാല് പേരെ എൻസിബി അറസ്റ്റ് ചെയ്തു.
നവംബർ 16-ന് പുലർച്ചെ ഉധംപൂർ ജില്ലയിലെ ചെനാനിയിലുള്ള മാദ ടോൾ പ്ലാസയ്ക്ക് സമീപം ശ്രീനഗറിലേക്ക് പോകുകയായിരുന്ന യാത്രാ ബസ് എൻസിബി ഉദ്യോഗസ്ഥർ തടഞ്ഞുനിർത്തി പരിശോധിച്ചതോടെയാണ് വൻ ലഹരിക്കടത്ത് ശൃംഖലയുടെ ചുരുളഴിഞ്ഞത്. ബസിലെ യാത്രക്കാരനായിരുന്ന ദോഡ ജില്ലയിലെ ഭദർവ സ്വദേശിയിൽ നിന്ന് ഏകദേശം ഏഴ് കിലോഗ്രാം കോഡീൻ അടങ്ങിയ ചുമമരുന്ന് (സിബിസിഎസ്) ഉദ്യോഗസ്ഥർ പിടിച്ചെടുത്തിരുന്നു.
തുടർന്ന് ഇയാളെ വിശദമായി ചോദ്യം ചെയ്തതിലൂടെ കശ്മീർ താഴ്വരയിലേക്കും ഡൽഹിയിലേക്കും നീളുന്ന വിതരണ ശൃംഖലയെക്കുറിച്ച് നിർണ്ണായക വിവരങ്ങൾ ലഭിച്ചു. ഇതിന്റെ അടിസ്ഥാനത്തിൽ നടത്തിയ അന്വേഷണത്തിൽ കശ്മീരിൽ ലഹരിമരുന്ന് ഏറ്റുവാങ്ങാനിരുന്ന അനന്ത്നാഗ് സ്വദേശിയെ എൻസിബി വലയിലാക്കി. പിന്നാലെ നവംബർ 18-ന് ഡൽഹിയിൽ നടത്തിയ തുടർ പരിശോധനയിൽ 356 കുപ്പി കോഡീൻ ചുമമരുന്ന് കൂടി കണ്ടെടുക്കുകയും, ഷഹ്ദരയിലെ ഗോഡൗൺ കേന്ദ്രീകരിച്ച് പ്രവർത്തിച്ചിരുന്ന മുഖ്യസൂത്രധാരന്മാരെ പിടികൂടുകയുമായിരുന്നു.
2029-ഓടെ രാജ്യത്തെ ലഹരി ശൃംഖലകളെ പൂർണ്ണമായും തുടച്ചുനീക്കാനുള്ള കേന്ദ്ര സർക്കാരിന്റെ പ്രത്യേക കർമ്മപദ്ധതിയുടെ ഭാഗമായാണ് എൻസിബി പരിശോധനകൾ ശക്തമാക്കിയിരിക്കുന്നത്. പിടിയിലായവരുടെ സാമ്പത്തിക ഇടപാടുകളും, ഇവർക്ക് മരുന്നുകൾ എത്തിച്ചുനൽകിയ വൻകിട വിതരണക്കാരെയും കണ്ടെത്താനുള്ള അന്വേഷണം ഊർജ്ജിതമാക്കിയതായി എൻസിബി ഉദ്യോഗസ്ഥർ വ്യക്തമാക്കി.











