‘ബറേലി: ഭീകരവാദ സംഘടനകൾക്ക് പണം നൽകിയെന്ന വ്യാജ ആരോപണം ഉന്നയിച്ച് ഉത്തർപ്രദേശിലെ പ്രമുഖ ഡോക്ടറെ സൈബർ തട്ടിപ്പ് സംഘം ഒരു രാത്രി മുഴുവൻ ‘ഡിജിറ്റൽ അറസ്റ്റിലാക്കി’ (Digital Arrest). ബറേലി സ്വദേശിയായ ഡോ. ഖുർഷീദ് മുറാദ് സിദ്ദിഖിയാണ് തട്ടിപ്പ് സംഘത്തിന്റെ വലയിൽ കുടുങ്ങിയത്. ഭീകരവിരുദ്ധ സ്ക്വാഡ് (ATS) ഉദ്യോഗസ്ഥരെന്ന വ്യാജേന ഫോണിൽ വിളിച്ച സംഘം, ഡോക്ടറുടെ പേരിൽ അറസ്റ്റ് വാറണ്ട് പുറപ്പെടുവിച്ചിട്ടുണ്ടെന്ന് ഭീഷണിപ്പെടുത്തി മുറിക്കുള്ളിൽ പൂട്ടിയിടാൻ നിർബന്ധിക്കുകയായിരുന്നു. എന്നാൽ,കൃത്യസമയത്തുള്ള പൊലീസിന്റെ ഇടപെടൽ മൂലം വൻ സാമ്പത്തിക തട്ടിപ്പിൽ നിന്നും ഡോക്ടർ തലനാരിഴയ്ക്ക് രക്ഷപ്പെട്ടു.
പശ്ചിമ ബംഗാളിൽ ഡോക്ടറുടെ ആധാർ കാർഡ് ഉപയോഗിച്ച് തുടങ്ങിയ ബാങ്ക് അക്കൗണ്ട് വഴി ഭീകരവാദ സംഘടനകൾക്ക് 2.5 കോടി രൂപ കൈമാറിയിട്ടുണ്ടെന്നായിരുന്നു തട്ടിപ്പുകാരുടെ പ്രധാന ആരോപണം. പിടിയിലായ ഒരു ഭീകരനെ ചോദ്യം ചെയ്തപ്പോഴാണ് ഡോക്ടറുടെ പേര് പുറത്തുവന്നതെന്നും, അതീവ ഗുരുതരമായ രാജ്യദ്രോഹക്കുറ്റമാണ് ചുമത്തിയിരിക്കുന്നതെന്നും ഇവർ ഡോക്ടറെ വിശ്വസിപ്പിച്ചു.
അന്വേഷണം കഴിയുന്നതുവരെ മൊബൈൽ ഫോൺ ഓൺ ആക്കി വെക്കണമെന്നും, മറ്റാരുമായും ഇക്കാര്യം സംസാരിക്കരുതെന്നും തട്ടിപ്പുകാർ കർശന നിർദേശം നൽകി. ഭീഷണിയിൽ ഭയന്നുപോയ ഡോ. സിദ്ദിഖി വീട്ടിലെ ഒരു മുറിക്കുള്ളിൽ കയറി വാതിലടച്ചു. ഭക്ഷണം കഴിക്കാനോ മറ്റാവശ്യങ്ങൾക്കോ പോലും പുറത്തിറങ്ങാൻ തയ്യാറാകാതിരുന്ന അദ്ദേഹം, കുടുംബാംഗങ്ങളെ മുറിക്കുള്ളിലേക്ക് പ്രവേശിപ്പിക്കാൻ പോലും വിസമ്മതിച്ചു.
ഡോക്ടറുടെ അസ്വാഭാവികമായ പെരുമാറ്റത്തിൽ സംശയം തോന്നിയ കുടുംബാംഗങ്ങൾ ഉടൻ തന്നെ ബറേലി പൊലീസിൽ വിവരമറിയിക്കുകയായിരുന്നു. സ്ഥലത്തെത്തിയ പൊലീസ് സംഘം വാതിൽ തുറന്ന് ഡോക്ടറുമായി സംസാരിക്കുകയും, ഇതൊരു സൈബർ തട്ടിപ്പാണെന്ന് ബോധ്യപ്പെടുത്തുകയും ചെയ്തു. പൊലീസിന്റെ കൃത്യസമയത്തുള്ള ഇടപെടൽ ഇല്ലായിരുന്നെങ്കിൽ പണം തട്ടിയെടുക്കാൻ സംഘം ശ്രമിക്കുമായിരുന്നുവെന്ന് അധികൃതർ വ്യക്തമാക്കി. സംഭവത്തിൽ സൈബർ പൊലീസ് കേസെടുത്ത് അന്വേഷണം ആരംഭിച്ചിട്ടുണ്ട്.
രാജ്യത്ത് ‘ഡിജിറ്റൽ അറസ്റ്റ്’ എന്ന പേരിൽ നടക്കുന്ന സൈബർ തട്ടിപ്പുകൾക്കെതിരെ കേന്ദ്ര സർക്കാരും പൊലീസും ആവർത്തിച്ച് മുന്നറിയിപ്പ് നൽകുന്നുണ്ട്. സിബിഐ, ഇഡി, പൊലീസ് തുടങ്ങിയ ഒരു അന്വേഷണ ഏജൻസിയും വീഡിയോ കോളിലൂടെയോ ഫോണിലൂടെയോ ആരെയും ‘ഡിജിറ്റൽ അറസ്റ്റ്’ ചെയ്യില്ലെന്നും, ഇത്തരം വ്യാജ കോളുകൾ ലഭിച്ചാൽ ഉടൻ തന്നെ 1930 എന്ന സൈബർ ഹെൽപ്പ് ലൈൻ നമ്പറിൽ വിവരമറിയിക്കണമെന്നും പൊലീസ് ഓർമ്മിപ്പിക്കുന്നു.












