വാഷിംഗ്ടൺ: നിർമ്മിത ബുദ്ധി (AI), ടെക് മേഖലകളിലെ വൻ തകർച്ചയും തുടർച്ചയായ സാങ്കേതിക തകരാറുകളും അമേരിക്കൻ സമ്പദ്വ്യവസ്ഥയെ കടുത്ത ആശങ്കയിലേക്ക് തള്ളിവിടുന്നു. വലിയൊരു ദുരന്തമോ സൈബർ ആക്രമണമോ വരാനിരിക്കുന്നു എന്ന ഭീതിയിൽ യുഎസ് പൗരന്മാർ അടിയന്തര ആവശ്യങ്ങൾക്കുള്ള സാധനങ്ങൾ കൂട്ടത്തോടെ വാങ്ങിക്കൂട്ടുന്ന ‘പാനിക് ബയിങ്’ (Panic Buying) 400 ശതമാനത്തോളം വർധിച്ചതായാണ് റിപ്പോർട്ടുകൾ.
കഴിഞ്ഞ ദിവസങ്ങളിൽ വിമാന സർവീസുകൾ, ബാങ്കിംഗ് സംവിധാനങ്ങൾ, സർക്കാർ വെബ്സൈറ്റുകൾ എന്നിവയെ ബാധിച്ച തുടർച്ചയായ സാങ്കേതിക തകരാറുകൾക്ക് പിന്നാലെയാണ് പല യുഎസ് നഗരങ്ങളിലും ജനങ്ങൾ പരിഭ്രാന്തരായി സൂപ്പർമാർക്കറ്റുകളിലേക്ക് ഇരച്ചുകയറിയത്. എഐ സൈബർ ആക്രമണം വഴി യുഎസ് പവർ ഗ്രിഡ് തകരാറിലാകുമെന്നും 90 ദിവസത്തേക്ക് വൈദ്യുതി മുടങ്ങുമെന്നുമുള്ള അഭ്യൂഹങ്ങൾ സമൂഹമാധ്യമങ്ങളിൽ കാട്ടുതീ പോലെ പടർന്നത് സ്ഥിതിഗതികൾ കൂടുതൽ രൂക്ഷമാക്കി. ഇതേത്തുടർന്ന് വാൾമാർട്ട്, കോസ്റ്റ്കോ തുടങ്ങിയ പ്രമുഖ റീട്ടെയിൽ ശാലകളിൽ കുടിവെള്ളം, കേടാകാത്ത ഭക്ഷ്യവസ്തുക്കൾ, ജനറേറ്ററുകൾ, പ്രൊപ്പെയ്ൻ സിലിണ്ടറുകൾ എന്നിവയ്ക്കായി വൻ തിരക്കാണ് അനുഭവപ്പെടുന്നത്.
രാജ്യത്ത് ആശങ്കപ്പെടേണ്ട സാഹചര്യമില്ലെന്നും ഇത്തരം പ്രചാരണങ്ങളെല്ലാം അടിസ്ഥാനരഹിതമാണെന്നും യുഎസ് പ്രസിഡന്റ് ഡൊണാൾഡ് ട്രംപും വൈസ് പ്രസിഡന്റ് ജെ.ഡി. വാൻസും ആവർത്തിച്ച് വ്യക്തമാക്കിയിട്ടുണ്ട്. എങ്കിലും ജനങ്ങളുടെ പരിഭ്രാന്തി കുറഞ്ഞിട്ടില്ല. ഈ അമിത ഭീതി ഓഹരി വിപണിയിലേക്ക് കൂടി പടർന്നാൽ നിക്ഷേപകർ ഓഹരികൾ കൂട്ടത്തോടെ വിറ്റൊഴിയുന്ന വൻ തകർച്ചയ്ക്ക് വഴിവെക്കുമെന്നാണ് സാമ്പത്തിക വിദഗ്ധരുടെ മുന്നറിയിപ്പ്.
അതേസമയം, യുഎസ് ഓഹരി വിപണിയിൽ ഇതിനോടകം തന്നെ കനത്ത ഇടിവാണ് രേഖപ്പെടുത്തുന്നത്.ഒക്ടോബറിലെ റെക്കോർഡ് ഉയരത്തിൽ നിന്ന് 10 ശതമാനത്തോളം കുത്തനെ വീണതിന്റെ ആഘാതത്തിലാണ് വിപണി. പ്രമുഖ സൂചികകളായ എസ് ആൻഡ് പി 500 (S&P 500), ഡൗ ജോൺസ് (Dow Jones) എന്നിവ തിരുത്തലിലേക്ക് (Correction) കടന്നപ്പോൾ, ടെക് ഭീമന്മാരുടെ സൂചികയായ നാസ്ഡാക് (Nasdaq) ഈ വർഷം നേടിയ എല്ലാ നേട്ടങ്ങളും നഷ്ടപ്പെടുത്തി.
വലിയ പ്രതീക്ഷയോടെ എത്തിയ എഐ കമ്പനിയായ ആന്ത്രോപിക്കിന്റെ (Anthropic) ഐപിഒ വൻ പരാജയമായതും ഓഹരികൾ ഇടിഞ്ഞതും വിപണിക്ക് തിരിച്ചടിയായി. ഇതിനുപുറമെ, അക്കൗണ്ടിംഗ് ക്രമക്കേടുകളെക്കുറിച്ചും ചൈനീസ് ചാരവനിതയുമായുള്ള രഹസ്യ ബന്ധത്തെക്കുറിച്ചും യുഎസ് ഏജൻസികൾ അന്വേഷണം കടുപ്പിച്ചതോടെ ചിപ്പ് നിർമ്മാണ ഭീമനായ എൻവിഡിയയുടെ (Nvidia) ഓഹരികൾ 14 ശതമാനത്തോളം കൂപ്പുകുത്തി. വിപണി സൂചികകളുടെ സ്വാഭാവിക പിന്തുണ നഷ്ടപ്പെട്ടതും ബാൾട്ടിക് കടലിലെ സംഘർഷങ്ങളും ആഗോള എണ്ണവിലയിലുണ്ടാകുന്ന ചാഞ്ചാട്ടവും നിക്ഷേപകരുടെ ചങ്കിടിപ്പ് കൂട്ടിയിട്ടുണ്ട്.












