അജ്മീര്‍: ബീഫ് വിഷയത്തില്‍ ബിജെപി-ബിജെപിയിതര പാര്‍ട്ടികളും തമ്മില്‍ അതിരൂക്ഷമായ വിയോജിപ്പും വാക്കുകൊണ്ടുള്ള പോരാട്ടവുമാണ് അരങ്ങേറുന്നത്. ഈ സാഹചര്യത്തില്‍ രാജ്യത്തെ ഏറ്റവും പ്രമുഖനായ പണ്ഡിതന്‍ ബീഫ് ഉപേക്ഷിക്കാന്‍ ആവശ്യപ്പെട്ട് രംഗത്തെത്തി. അജ്മീര്‍ ദര്‍ഗയുടെ ആത്മീയതലവനാണ് ശ്രദ്ധേയമായ അഭിപ്രായപ്രകടനവുമായി രംഗത്തെത്തിയത്. ഹിന്ദു സഹോദരന്മാരുടെ വികാരം പരിഗണിച്ച്, മുസ്ലീങ്ങളും ബീഫ് കഴിക്കുന്നത് ഒഴിവാക്കണമെന്നാണ് ദര്‍ഗ ദിവാന്‍ സൈനുല്‍ അബദിന്‍ ഖാന്‍ പറഞ്ഞത്.
രാജ്യത്തെ ഏറ്റവും പ്രധാനപ്പെട്ട മുസ്ലീം തീര്‍ത്ഥാടനകേന്ദ്രമാണ് അജ്മീര്‍ ദര്‍ഗ. ഖ്വജ മൊയ്‌നുദീന്‍ ഹസന്‍ ചിസ്തിയുടെ 805-ാം ചരമവാര്‍ഷിക ദിനത്തിലായിരുന്നു ദിവാന്റെ അഭിപ്രായപ്രകടനം. ഖ്വജ മൊയിനുദ്ദീന്റെ ഇരുപത്തിരണ്ടാമത് തലമുറയില്‍ പെട്ട യാളാണ് ഖാന്‍. ഹിന്ദു മുസ്ലീം ഐക്യത്തിന് വേണ്ടി നിലകൊണ്ട വ്യക്തിയാണ് ഹാസന്‍ ചിസ്തിയെന്നും, അതിനാല്‍ ഹിന്ദു മതവികാരത്തോടുള്ള ബഹുമാനത്തിന്റെ ഭാഗമായി എല്ലാ മുസ്ലീങ്ങളും ബീഫ് കഴിക്കുന്നത് നിര്‍ത്തണമെന്നുമായിരുന്നു അദ്ദേഹത്തിന്റെ ആവശ്യം. താനിനി ബീഫ് കഴിക്കില്ലെന്ന പ്രഖ്യാപനവും അദ്ദേഹം നടത്തിയതായും ദേശീയമാധ്യമങ്ങള്‍ റിപ്പോര്‍ട്ട് ചെയ്യുന്നു. മുത്തലാഖിനെതിരെയുള്ള നിലപാടും അദ്ദേഹം പ്രഖ്യാപിച്ചിട്ടുണ്ട്.
ബാക്കിയുള്ള ജീവിതത്തില്‍ ഇനി താനും കുടുംബവും ബീഫ് കഴിക്കില്ലെന്ന തീരുമാനമെടുത്തുവെന്നും അദ്ദേഹം ചടങ്ങില്‍ പ്രഖ്യാപിച്ചു. നിരവധി ഇന്ത്യന്‍ സംസ്ഥാനങ്ങളില്‍ ഗോവധ ചര്‍ച്ച സംബന്ധിച്ച വിവാദം പൊടിപൊടിക്കുന്നതിനിടെയാണ് ഇദ്ദേഹത്തിന്റെ പ്രസ്താവന എത്തിയിരിക്കുന്നത്. ഗോക്കളെ ദൈവികമായി കാണുന്ന ഹിന്ദുമതത്തോടുള്ള ബഹുമാനം കാട്ടാനാണ് പുരോഹിതന്‍ ആവശ്യപ്പെട്ടിരിക്കുന്നത്.
ഗുജറാത്ത് സര്‍ക്കാര്‍ ഗോവധത്തിനെതിരെ കഴിഞ്ഞദിവസം നടപ്പിലാക്കിയ നിയമത്തെയും അദ്ദേഹം സ്വാഗതം ചെയ്തു. ഏഴുവര്‍ഷം മുതല്‍ ജീവപര്യന്തംവരെ ശിക്ഷയാണ് ഗോവധത്തിന് പുതിയ നിയമം അനുസരിച്ച് ഗുജറാത്തില്‍ ലഭിക്കുക. പശുവിനെ ദേശീയമൃഗമായി പ്രഖ്യാപിക്കണമെന്ന് പ്രധാനമന്ത്രി നരേന്ദ്രമോദിയോട് അദ്ദേഹം ആവശ്യപ്പെടുകയും ചെയ്തു.
മുത്തലാഖിനെതിരെയും ശക്തമായ പ്രതികരണമാണ് അദ്ദേഹം നടത്തിയത്. ഖുറാനും ഷരിയയും ഇതനുവദിക്കുന്നില്ലെന്നും ദിവാന്‍ വ്യക്തമാക്കുന്നു. സ്ത്രീവിരുദ്ധവും ഇസ്ലാമികവിരുദ്ധവും മനുഷ്യവിരുദ്ധവുമാണ് മുത്തലാഖ്. ഉടന്‍ തന്നെ ഈ സംവിധാനം അവസാനിപ്പിക്കണമെന്നും അദ്ദേഹം ആവശ്യപ്പെട്ടു. മുത്തലാഖിലും ഇസ്ലാമിക സമൂഹവും കേന്ദ്രസര്‍ക്കാരും രണ്ട് തട്ടിലാണ്. ദിവാന്റെ പ്രഖ്യാപനം ബിജെപിക്ക് തുണയാകും. ഖുറാനും പ്രവാചകനും അംഗീകരിക്കാത്ത ചില ശീലങ്ങള്‍ ഉപേക്ഷിക്കാന്‍ ചിലരിപ്പോളും തയ്യാറാകാത്തത് എന്തുകൊണ്ടാണെന്നും അദ്ദേഹം ചോദിക്കുന്നു. മെയ് 11ന് സുപ്രീംകോടതിയുടെ അഞ്ചംഗ ബെഞ്ച് കേസ് കേള്‍ക്കാനിരിക്കെയുള്ള ഈ അഭിപ്രായപ്രകടനത്തിനും ഏറെ പ്രാധാന്യം കല്‍പ്പിക്കപ്പെടുന്നു.
Discussion about this post