മലയാള പ്രേക്ഷകർ ഒന്നടങ്കം ഏറെ പ്രതീക്ഷയോടെ കാത്തിരിക്കുന്ന ബ്രഹ്മാണ്ഡ ചലച്ചിത്രമാണ് പൃഥ്വിരാജ് സംവിധാനം ചെയ്യുന്ന എമ്പുരാൻ. മോഹൻലാൽ നായകനാകുന്ന മാസ് ചിത്രത്തിന്റെ ഓരോ അപ്ഡേഷനും ആരാധകർ വൻ പ്രതീക്ഷയോടെയാണ് സ്വീകരിക്കുന്നത്. എന്തായിരിക്കും എമ്പുരാൻ എന്ന ചോദ്യത്തിന് തിരക്കഥാകൃത്ത് മുരളി ഗോപി മറുപടി പറഞ്ഞതും രസകരമായിട്ടാണ്. ഒരു സാൻഡ്വിച്ചിന്റെ നടുഭാഗമാണ് ശരിക്കും എമ്പുരാൻ എന്നാണ് മുരളി ഗോപി വ്യക്തമാക്കിയത്. ഒരു മീഡിയ്ക്ക് നൽകിയ അഭിമുഖത്തിലാണ് മുരളി ഇക്കാര്യം പറഞ്ഞത്.
മോഹൻലാലിന്റെ എമ്പുരാന്റെ ടീസർ ലോഞ്ചിംഗിന് മമ്മൂട്ടി വെളുത്ത വസ്ത്രം ധരിച്ച് വന്നത്് സോഷ്യൽ മീഡിയയിൽ വൻ ചർച്ചയായിരുന്നു. ഇതിനെ കുറിച്ച് ചോദിച്ചപ്പോൾ വിട്ടുപറയാതെയായിരുന്നു മുരളി ഗോപിയുടെ മറുപടി. എന്തേലും സസ്പെൻസുണ്ടോ എന്നായിരുന്നു അവതാരക തിരക്കഥാകൃത്തിനോട് ചോദിച്ചത്. ഇല്ലെന്ന് മറുപടി. ശബ്ദ സാന്നിദ്ധ്യമായിട്ടെങ്കിലും മമ്മൂട്ടിയുണ്ടാകുമോ എന്ന ചോദ്യമായിരുന്നു പിന്നീട്. അതൊന്നും ഇപ്പോൾ പറയുന്നില്ല എന്നായിരുന്നു മുരളി ഗോപിയുടെ മറുപടി. എമ്പുരാന്റെ വൺലൈൻ എന്താണ് എന്ന ചോദ്യത്തോടും തിരക്കഥാകൃത്ത് പ്രതികരിച്ചു. എമ്പുരാൻ ഒരു ത്രീ പാർട് ഫ്രാഞ്ചസിയുടെ മിഡ് പാർട്ടാണ്. ലൂസിഫറാണ് എമ്പുരാന്റെ വിസിറ്റിംഗ് കാർഡ് എന്ന് വേണമെങ്കിൽ പറയാം. ലൂസിഫറിന്റെ തുടർച്ചയാകുമ്പോൾ തന്നെ എമ്പുരാൻ പുതിയ ഒരു ലോകം സൃഷ്ടിക്കുന്നുണ്ട്. ഒരു സാൻഡ്വിച്ചിനെയാണ് ഞാൻ താരതമ്യപ്പെടുത്തുന്നത്. സാൻഡ്വിച്ചിന്റെ മിഡ് പീസാണ് എമ്പുരാൻ. ലൂസിഫറിൽ എല്ലാ കഥാപാത്രങ്ങളുടെയും ഒരു ഇൻട്രൊഡക്ഷൻ ഉണ്ട്. എമ്പുരാൻ ലൂസിഫറിന്റെ തുടർച്ച ആയിരിക്കെ തന്നെ ഒരു പുതിയ ലോകം ക്രിയേറ്റ് ചെയ്യുകയും ആ ലോകത്തിലൂടെ പഴയ ഓർമയിൽ നിന്നുള്ള ലോകം വരികയും അതിന്റെ കണ്ടിന്യൂഷൻ ഉണ്ടാകുകയും ചെയ്യുന്ന രീതിയാണ് എമ്പുരാനിൽ സ്വീകരിച്ചിരിക്കുന്നത് എന്നും മുരളി ഗോപി ചൂണ്ടിക്കാട്ടുന്നു.
ലൂസിഫറിന്റെ രണ്ടാം ഭാഗായി എമ്പുരാൻ സിനിമ മാർച്ച് 27ന് റിലീസാകുമ്പോൾ പ്രതീക്ഷയിലാണ് താരത്തിന്റെ ആരാധകർ. സ്റ്റീഫൻ നെടുമ്പള്ളിയെന്ന ഖുറേഷി അബ്രമായി ചിത്രത്തിൽ മോഹൻലാൽ എത്തിയപ്പോൾ ആഗോള ബോക്സ് ഓഫീസിൽ 150 കോടി രൂപയിൽ അധികം ബിസിനസ് നേടി ലൂസിഫർ തിളങ്ങിയിരുന്നു. ലൂസിഫറിലെ സ്റ്റീഫൻ നെടുമ്പള്ളിക്കായിരിക്കില്ല രണ്ടാം ഭാഗമായ എമ്പുരാനിൽ പ്രാധാന്യം എന്ന് റിപ്പോർട്ടുണ്ട്. ഖുറേഷി അബ്രഹാമിന്റെ പിന്നാലെ സഞ്ചരിക്കുന്ന കഥയായിരിക്കും എമ്പുരാന്റെയെന്നാണ് അപ്ഡേറ്റുകളിൽ നിന്ന് മനസിലാകുന്നത്.
