ഐഎന്‍എക്‌സ് മീഡിയ കേസില്‍ അറസ്റ്റിലായ മുന്‍ ധനമന്ത്രി പി ചിദംബരത്തിന്റെ മകന്‍ കാര്‍ത്തി ചിദംബരത്തെ സിബിഐ ചോദ്യം ചെയ്തു. ഇന്നലെ ഒരു ദിവസത്തെ കസ്റ്റഡിയല്‍ കോടതി കാര്‍ത്തിയെ വിട്ടുനല്‍കിയിരുന്നു. ഇന്ന് വീണ്ടും സിബിഐ കോടതിയില്‍ ഹാജരാക്കുമ്പോഴാണ് വിശദമായ ചോദ്യം ചെയ്യലിന് കാര്‍ത്തിയെ 15 ദിവസത്ത കസ്റ്റഡിയില്‍ വേണമെന്ന് സിബിഐ ആവശ്യപ്പെടുക.
ഐഎന്‍.എക്‌സ് മീഡിയ കമ്പനിക്കെതിരെയുള്ള സാമ്പത്തിക തട്ടിപ്പ് കേസിലെ അന്വേഷണം ധനമന്ത്രിയായിരുന്ന പി ചിദംബരത്തെ സ്വാധീനിച്ച് അട്ടിമറിക്കാന്‍ 10 ലക്ഷംരൂപ കോഴ വാങ്ങിയെന്നാണ് കാര്‍ത്തി ചിദംബരത്തിനെതിരായ കേസ്. അതേസമയം അന്വേഷണവുമായി സഹകരിക്കുന്നുണ്ടെന്നും കസ്റ്റഡിയില്‍ തുടരേണ്ട സാഹചര്യമില്ലെന്നും കാര്‍ത്തി ചിദംബരം കോടതിയില്‍ വാദിക്കും.
2017 ലാണ് ഐഎന്‍എക്‌സ് പണമിടപാട് കേസില്‍ കാര്‍ത്തി ചിദംബരത്തിനെതിരെ സിബിഐ കേസ് രജിസ്റ്റര്‍ ചെയ്യുന്നത്. കണക്കില്ലാത്ത 305 കോടി രൂപയുടെ വിദേശ പണം സ്വീകരിച്ചതിനായിരുന്നു കേസ്. ഐഎന്‍എക്‌സ് മീഡിയ പ്രമോട്ടേഴ്‌സിനെതിരെയും കേസുണ്ടായിരുന്നു. ക്രിമിനല്‍ കോണ്‍സ്പരസി, വഞ്ചനാക്കുറ്റം, അനധികൃതമായ പണം കൈപ്പറ്റല്‍, സര്‍ക്കാര്‍ ഉദ്യോഗസ്ഥരെ ക്രിമിനല്‍ കുറ്റം ചെയ്യാന്‍ പ്രേരിപ്പിക്കല്‍ എന്നി കുറ്റങ്ങള്‍ ചുമത്തിയായിരുന്നു കേസ്.
ഐഎന്‍എക്‌സ് മീഡിയക്കുവേണ്ടി കാര്‍ത്തി പി.ചിദംബരം ധനമന്ത്രിയായിരുന്ന കാലത്ത് ധനമന്ത്രാലയത്തെ സ്വാധീനിച്ചുവെന്ന് സിബിഐ ആരോപിക്കുന്നു.
Discussion about this post