റിയാദ്: വിദേശത്ത് കുടുങ്ങിയ പ്രവാസി ഇന്ത്യാക്കാരെ തിരിച്ചെത്തിക്കുന്ന കേന്ദ്ര ഗവണ്‍മെന്റിന്റെ വന്ദേ ഭാരത് മിഷന്‍ രണ്ടാം ആഴ്ചയിലെ റിയാദില്‍ നിന്നുള്ള രണ്ടാമത്തെ വിമാനം കണ്ണൂരിലേക്ക് പുറപ്പെട്ടു. റിയാദ് കിങ് ഖാലിദ് ഇന്‍റര്‍നാഷനല്‍ എയര്‍പോര്‍ട്ടില്‍ നിന്ന് ഉച്ചക്ക് 12.46ന് 152 യാത്രക്കാരെയും വഹിച്ചുള്ള എയര്‍ ഇന്ത്യ വിമാനം പറന്നുയര്‍ന്നു. രാത്രി എട്ടോടെയാണ് കണ്ണൂരിലെത്തുന്നത്.
145 മുതിര്‍ന്നവരും ഏഴ് കുട്ടികളുമാണ് ഈ വിമാനത്തിലുള്ളത്. യാത്രക്കാരില്‍ കൂടുതലും ഗര്‍ഭിണികളാണ്. മറ്റ് രോഗങ്ങള്‍ ബാധിച്ചവരും ജോലി നഷ്ടമായി ഫൈനല്‍ എക്സിറ്റില്‍ പോകുന്നവരും സന്ദര്‍ശന വിസയില്‍ വന്ന് കുടുങ്ങിയവരും സന്ദര്‍ശക വിസയിലും സ്ഥിര വിസയിലുമുള്ള കുടുംബങ്ങളും യാത്രക്കാരിലുണ്ട്. ഒരു വീല്‍ച്ചെയര്‍ യാത്രക്കാരനും കൂട്ടത്തിലുണ്ട്.
കോഴിക്കോട്, മലപ്പുറം തുടങ്ങി വിദൂര പ്രദേശങ്ങളിലേക്കുള്ളവരും കണ്ണൂര്‍ വിമാനത്തില്‍ പോയിട്ടുണ്ട്. രാവിലെ ഒമ്പത് മണിക്ക് തന്നെ യാത്രക്കാരുടെ ലഗേജ് ചെക്ക് ഇന്‍, ബോര്‍ഡിങ് നടപടികള്‍ ആരംഭിച്ചു. എയര്‍ ഇന്ത്യ എയര്‍പ്പോര്‍ട്ട് ഡ്യൂട്ടി മാനേജര്‍ സിറാജ് നടപടികള്‍ക്ക് നേതൃത്വം നല്‍കി.
Discussion about this post