മുംബൈ : 40,000 അടി ഉയരത്തിൽ ഹൃദയാഘാതം ഉണ്ടായ വിമാനയാത്രക്കാരന് രക്ഷാകരങ്ങളുമായി ഇന്ത്യൻ വംശജനായ ഡോക്ടർ വിശ്വരാജ് വെമുല . എയർ ഇന്ത്യ വിമാനത്തിലെ യാത്രക്കാരനാണ് വിമാനയാത്രയ്ക്കിടെ രണ്ട് തവണ ഹൃദയാഘാതം ഉണ്ടായത് . ബർമിങ്ങാം ക്യൂൻ എലിസബത്ത് ഹോസ്പിറ്റലിൽ ലിവർ സ്പെഷ്യലിസ്റ്റായ ഡോ. വിശ്വരാജ് അമ്മയ്ക്കൊപ്പം ഇന്ത്യയിലേക്ക് വരികയായിരുന്നു .
യാത്രക്കാരന് അസ്വാസ്ഥ്യം അനുഭവപ്പെട്ടതോടെ വിമാനത്തിൽ ഡോക്ടർമാരുണ്ടോയെന്ന് ക്യാബിൻ ക്രൂ അംഗങ്ങൾ അന്വേഷിച്ചു . തുടർന്നാണ് വിശ്വാരാജ് ചികിത്സിക്കാൻ എത്തിയത് . ക്യാബിൻ ക്രൂവിലുണ്ടായിരുന്ന ലൈഫ് സപ്പോർട്ട് മെഡിസിൻ ഉപയോഗിച്ചായിരുന്നു ചികിത്സ . ഏകദേശം ഒരു മണിക്കൂറോളം സമയമെടുത്ത് ചികിത്സ നടത്തിയതോടെ യാത്രക്കാരൻ ബോധം വീണ്ടെടുത്തെങ്കിലും വിശ്വരാജിനോട് സംസാരിക്കവെ പെട്ടെന്ന് വീണ്ടും നെഞ്ചുവേദന അനുഭവപ്പെട്ടു .
രണ്ട് മണിക്കൂറോളം രോഗിക്ക് ശരിയായ പൾസോ ശരിയായ രക്തസമ്മർദ്ദമോ ഇല്ലായിരുന്നു, അഞ്ച് മണിക്കൂർ അയാളെ ജീവനോടെ നിലനിർത്താൻ ഏറെ പാടുപെട്ടു. 43 കാരനായ ആ യാത്രക്കാരന്റെ ജീവിതം മറ്റ് യാത്രക്കാരുടെ സഹായത്തോടെ രക്ഷപ്പെടുത്തി – വിശ്വരാജ് പറഞ്ഞു. പല അത്യാഹിത സാഹചര്യങ്ങളും നേരിട്ടിട്ടുണ്ടെങ്കിലും ഇത്തരത്തിൽ 40000 അടി ഉയരത്തിൽ ഒരു അനുഭവം ആദ്യമാണെന്നും വിശ്വരാജ് പറഞ്ഞു.
