ലോകത്തിലെ ഏറ്റവും പഴക്കമേറിയ നഗരങ്ങള്‍ ഏതൊക്കൊണെന്ന് എങ്ങനെ കണ്ടെത്തും. അതൊരു വെല്ലുവിളി തന്നെയാണ്. കാരണം സ്ഥിരമായുള്ള താമസം, പൗരാണികമായ തെളിവുകള്‍, ചരിത്രപരമായ രേഖകള്‍ തുടങ്ങി കാലപ്പഴക്കം നിര്‍ണയിക്കുന്നതിനുള്ള പല മാനദണ്ഡങ്ങളും മുന്‍നിര്‍ത്തി തങ്ങളാണ് ഏറ്റവും പഴയ നഗരമെന്ന അവകാശവാദം പല നഗരങ്ങളും ഉന്നയിച്ചേക്കാം. എങ്കിലും ലോകത്തിലെ ഏറ്റവും പഴയ നഗരങ്ങളെന്ന ഖ്യാതിയുള്ള ചില നഗരങ്ങള്‍ പരിചയപ്പെടാം. അതില്‍ നമ്മുടെ ഇന്ത്യയിലെ വാരാണസിയും ഉണ്ടെന്നുള്ളതില്‍ നമുക്ക് ഏറെ അഭിമാനിക്കുകയും ചെയ്യാം.
വാരാണസി, ഇന്ത്യ
ബനാറസ് എന്നും കാശിയെന്നും അറിയപ്പെടുന്ന, കാലങ്ങളായി മനുഷ്യര്‍ അധിവസിച്ച് വരുന്ന പുണ്യനഗരമാണ് മൂവായിരം വര്‍ഷങ്ങളുടെ ചരിത്രം പേറുന്ന വാരാണസി.
ജെറിച്ചോ, വെസ്റ്റ്ബാങ്ക്
കാലങ്ങളായി ആള്‍ത്താമസമുള്ള ലോകത്തിലെ ഏറ്റവും പഴയ നഗരം വെസ്റ്റ്ബാങ്കിലെ ജോര്‍ദാന്‍ മലനിരകളിലുള്ള ജെറിച്ചോ ആണെന്നാണ് പറയപ്പെടുന്നത്. 8,000 ബിസിഇ മുതല്‍ക്ക് ഇവിടെ മനുഷ്യവാസം ഉണ്ടായിരുന്നുവെന്നതിന് തെളിവുകള്‍ ലഭിച്ചിട്ടുണ്ട്.
ഏതന്‍സ്, ഗ്രീസ്
യൂറോപ്പിലെ പ്രാചീന നഗരങ്ങളിലൊന്നാണ് ഏതന്‍സ്. 3,400 വര്‍ഷങ്ങള്‍ക്ക് മുതല്‍ക്കുള്ള ഏതന്‍സിന്റെ ചരിത്രം മനുഷ്യര്‍ രേഖപ്പെടുത്തിയിട്ടുണ്ട്. ജനാധിപത്യത്തിന്റെയും പാശ്ചാത്യ തത്വശാസ്ത്രത്തിന്റെയും ഈറ്റില്ലമായാണ് ഏതന്‍സ് അറിയപ്പെടുന്നത്.
ആലെപ്പോ, സിറിയ
8,000 വര്‍ഷങ്ങളായി മനുഷ്യവാസം രേഖപ്പെടുത്തിയിട്ടുള്ള പ്രാചീന നഗരമാണ് ആലെപ്പോ. ബിസിഇ ആറാം സഹസ്രാബ്ദകാലത്തുള്ള വാസസ്ഥലങ്ങളുടെ പുരാവസ്തുക്കള്‍ ഇവിടെ നിന്നും തെളിവായി ലഭിച്ചിട്ടുണ്ടെന്നാണ് പറയപ്പെടുന്നത്.
ബിബ്ലോസ്, ലെബനന്‍
ബിസിഇ അയ്യായിരം മുതല്‍ക്ക് മനുഷ്യവാസം ഉണ്ടായിരുന്നുവെന്നതിന്റെ തെളിവുകള്‍ ലഭിച്ചിട്ടുള്ള ലെബനനിലെ പ്രാചീന തുറമുഖ പട്ടണമാണ് ബിബ്ലോസ്. ഇതിനുശേഷം ഇവിടെ സ്ഥിരമായി മനുഷ്യവാസം ഉണ്ടായിരുന്നു.
Discussion about this post