ന്യൂഡൽഹി: ഹിന്ദു ദേവതകളെ അശ്ലീലമായി ചിത്രീകരിച്ച സംഭവത്തിൽ ഇടപെട്ട് ദേശീയ വനിതാ കമ്മീഷൻ. സംഭവത്തിൽ റിപ്പോർട്ട് തേടി വനിതാ കമ്മീഷൻ ഡൽഹി പോലീസിന് നോട്ടീസ് നൽകി. കഴിഞ്ഞ ദിവസമാണ് ദേവതകളെ അപകീർത്തിപ്പെടുത്തിക്കൊണ്ടുള്ള ചിത്രങ്ങൾ ഇന്റർനെറ്റിൽ വ്യാപകമായി പ്രചരിക്കാൻ ആരംഭിച്ചത്.
സംഭവത്തിൽ പരാതിയുമായി ഹിന്ദു വിശ്വാസികൾ വനിതാ കമ്മീഷനെ സമീപിച്ചിരുന്നു. ഇതിലാണ് കമ്മീഷൻ ഇടപെട്ടത്. സംഭവത്തിൽ നടപടി സ്വീകരിക്കാൻ കമ്മീഷൻ ചെയർപേഴ്സൺ സ്വാതി മലിവാലി ഡൽഹി പോലീസിന് നിർദ്ദേശം നൽകി. സംഭവത്തിൽ അന്വേഷണം നടത്തി റിപ്പോർട്ട് സമർപ്പിക്കാനാണ് മറ്റൊരു നിർദ്ദേശം. ഇതോടൊപ്പം എഫ്ഐആറിന്റെ കോപ്പിയും നൽകണം. ഇന്റർനെറ്റിൽ പ്രചരിക്കുന്ന ചിത്രങ്ങൾ എത്രയും വേഗം നീക്കം ചെയ്യാനും പോലീസിന് നിർദ്ദേശം നൽകിയിട്ടുണ്ട്. ഹിന്ദു ദൈവങ്ങളെ അപകീർത്തിപ്പെടുത്തിക്കൊണ്ടുള്ള ചിത്രങ്ങൾ സഹിതം ആയിരുന്നു കമ്മീഷന് പരാതി നൽകിയത്. ഇതേ തുടർന്നായിരുന്നു ഇടപെടൽ.
ഹിന്ദു ദൈവങ്ങളെ അപകീർത്തിപ്പെടുത്തിക്കൊണ്ടുള്ള ചിത്രങ്ങൾ ഇന്റർനെറ്റിൽ പ്രചരിപ്പിച്ചതിനോട് ഒരിക്കലും യോജിക്കാൻ കഴിയില്ലെന്ന് സ്വാതി മലിവാലി പ്രതികരിച്ചു. മതവികാരം വ്രണപ്പെടുത്താനും, വർഗ്ഗീയ സംഘർഷം ലക്ഷ്യമിട്ടുകൊണ്ടുമുള്ള പ്രവൃത്തിയാണ് ഇത്. ഇത് ഗൗരവമേറിയ വിഷയമാണ്. സംഭവത്തിൽ കേസ് എടുക്കണം. കുറ്റക്കാരെ അറസ്റ്റ് ചെയ്യണമെന്നും മലിവാലി വ്യക്തമാക്കി.
Discussion about this post