ന്യൂഡൽഹി: പാഠ്യപദ്ധതിയിൽ “തിരഞ്ഞെടുപ്പ് സാക്ഷരത” കൂടി ഉൾപ്പെടുത്താൻ സർവകലാശാലകളോടും കോളേജുകളോടും ആവശ്യപ്പെട്ട് യൂണിവേഴ്സിറ്റി ഗ്രാന്റ്സ് കമ്മീഷൻ (യുജിസി).
യോഗ്യരായ ഓരോ വിദ്യാർത്ഥിക്കും വോട്ടർ ഐഡികൾ കൈമാറുക, മോക്ക് പോൾ സംഘടിപ്പിക്കുക, വിദ്യാർത്ഥികളെക്കൊണ്ട് വോട്ട് ചെയ്യുമെന്ന് പ്രതിജ്ഞ ചൊല്ലിക്കൊടുക്കുക എന്നീ ഇന്ത്യൻ തിരഞ്ഞെടുപ്പ് കമ്മീഷന്റെ ലക്ഷ്യങ്ങൾ നിറവേറ്റുന്നതിന് ശക്തമായ ഒരു സംവിധാനം വികസിപ്പിക്കുക, യു ജി സി സർവ്വാലാശാലകളോട് ആവശ്യപ്പെട്ടു
2023 നവംബർ 2 ന് കേന്ദ്ര വിദ്യാഭ്യാസ മന്ത്രാലയവും ഇലക്ഷൻ കമ്മീഷൻ ഓഫ് ഇന്ത്യയും തമ്മിൽ വോട്ടർ -വിദ്യാഭ്യാസം, സംയോജിപ്പിക്കുന്നതിനായി ധാരണാപത്രം (എംഒയു) ഒപ്പുവച്ചതായി അറിയിച്ചുകൊണ്ട് ഉന്നത വിദ്യാഭ്യാസ റെഗുലേറ്റർ ചൊവ്വാഴ്ച രാജ്യത്തെ എല്ലാ സർവകലാശാലകളുടെയും വൈസ് ചാൻസലർമാർക്കും എല്ലാ കോളേജുകളിലെയും പ്രിൻസിപ്പൽമാർക്കും കത്തെഴുതി. ഭാവി വോട്ടർമാരെയും പുതിയ വോട്ടർമാരെയും തിരഞ്ഞെടുപ്പ് പ്രക്രിയയിൽ കൂടുതൽ പങ്കാളികളാക്കുന്നതിനായി യൂണിവേഴ്സിറ്റി/ കോളേജ് വിദ്യാഭ്യാസ സമ്പ്രദായത്തിലേക്ക് ഔപചാരികമായി തിരഞ്ഞെടുപ്പ് സാക്ഷരത നടപ്പിലാക്കണം എന്നാവശ്യപ്പെട്ടായിരുന്നു അത്.
ധാരണാപത്രത്തിന് കീഴിൽ, “നടപ്പിലാക്കേണ്ട പ്രവർത്തനങ്ങളുടെ” ഒരു ലിസ്റ്റ് കമ്മീഷൻ പങ്കുവെക്കുകയുണ്ടായി. രാജ്യത്തെ ജനാധിപത്യത്തിന്റെ മഹിമ വർദ്ധിപ്പിക്കുന്നതിന്” യു ജി സി നിർദ്ദേശിച്ച പ്രവർത്തനങ്ങൾ ഏറ്റെടുത്തു നടത്താൻ ആവശ്യമായ നടപടികൾ കൈക്കൊള്ളാനും ഉന്നത വിദ്യാഭ്യാസ സ്ഥാപനങ്ങളോട് അഭ്യർത്ഥിച്ചു.
