സിഡ്നി : മുൻ ലോക ഒന്നാം നമ്പർ താരം റാഫേൽ നദാൽ 2024ലെ ഓസ്ട്രേലിയൻ ഓപ്പണിൽ നിന്ന് പിന്മാറി. പേശികൾക്ക് പരിക്കേറ്റതിനെ തുടർന്നാണ് സ്പാനിഷ് സൂപ്പർ താരത്തിന്റെ ഈ തീരുമാനം.2009ലും 2022ലും റാഫേൽ നദാൽ ആയിരുന്നു ഓസ്ട്രേലിയൻ ഓപ്പൺ കിരീടം സ്വന്തമാക്കിയിരുന്നത്.
ബ്രിസ്ബേൻ ഇന്റർനാഷണലിൽ ഗ്രാൻഡ് സ്ലാം തിരിച്ചുവരവിന് ഒരുങ്ങുകയായിരുന്നു നദാൽ. ഏകദേശം ഒരു വർഷത്തിനു ശേഷം നദാൽ പങ്കെടുത്ത ആദ്യ സിംഗിൾസ് ഇനമായിരുന്നു ബ്രിസ്ബേൻ ടൂർണമെന്റ്. ബ്രിസ്ബേനിൽ നടന്ന ക്വാർട്ടർ ഫൈനലിൽ ഓസ്ട്രേലിയയുടെ ജോർദാൻ തോംസണോട് തോറ്റ നദാലിന് ഇടുപ്പിന് പരിക്കേറ്റിരുന്നു.
“ബ്രിസ്ബേനിലെ അവസാന മത്സരത്തിനിടെ പരിക്കേറ്റിരുന്നു. പേശികളിൽ ചെറിയ പ്രശ്നം അനുഭവപ്പെട്ടതിനെ തുടർന്ന് മെൽബണിൽ എത്തിയ ഉടനെ എംആർഐ സ്കാനിംഗ് നടത്തി നോക്കി. പരിശോധനയിൽ പേശികൾക്ക് പരിക്കേറ്റതായി കണ്ടെത്തിയിട്ടുണ്ട്. മുമ്പുണ്ടായ പരുക്കിന്റെ അതേ സ്ഥലത്തല്ല പുതിയ പരിക്ക് എന്നതാണ് ആശ്വാസം. 5 സെറ്റ് മത്സരങ്ങളിൽ മികവുറ്റ പ്രകടനം നടത്താൻ ഈ പരിക്ക് മൂലം കഴിയില്ല. അതിനാൽ സ്പെയിനിലേക്ക് മടങ്ങുകയാണ്. ഡോക്ടറെ കണ്ട ശേഷം വിശ്രമം ആവശ്യമായി വന്നേക്കാം” എന്ന് റാഫേൽ നദാൽ എക്സ് അക്കൗണ്ടിലൂടെ വ്യക്തമാക്കി.
Discussion about this post