മുംബൈ : മുഖവും ശരീരവും വെളുക്കുന്നതിനായി വ്യാജ ഫെയർനസ് ക്രീമുകൾ ഉപയോഗിക്കുന്നത് പലപ്പോഴും വൃക്ക തകരാറിലേക്ക് നയിക്കപ്പെടാറുണ്ട്. കേരളത്തിൽ നിന്നും ഇത്തരത്തിലുള്ള നിരവധി കേസുകളാണ് റിപ്പോർട്ട് ചെയ്തിട്ടുള്ളത്. ഇപ്പോൾ സമാനമായ രീതിയിൽ മുംബൈയിലും ഫെയർനസ് ക്രീമിന്റെ ഉപയോഗത്തെ തുടർന്ന് വൃക്ക തകരാറിലായ കേസുകൾ റിപ്പോർട്ട് ചെയ്തിരിക്കുകയാണ്.
റായ്ഗഡിൽ നിന്നുമാണ് വെളുക്കാൻ തേച്ച വ്യാജ ഫെയർനസ് ക്രീമിന്റെ ഉപയോഗത്തെ തുടർന്ന് വൃക്ക തകരാറിലായ റിപ്പോർട്ടുകൾ പുറത്തുവരുന്നത്. നവി മുംബൈയിലെ മെഡികോവർ ആശുപത്രിയിൽ നടത്തിയ പരിശോധനയിലാണ് വൃക്ക തകരാറിലായ രണ്ടു പേരിൽ അതിന് കാരണമായത് ഫെയർനസ് ക്രീമിന്റെ ഉപയോഗം ആണെന്ന് മനസ്സിലായത്.
മെമ്പ്രനസ് നെഫ്രോപ്പതി എന്ന അപൂർവവൃക്കരോഗം സ്ഥിരീകരിച്ച രണ്ടുപേരിൽ നടത്തിയ വിശദമായ പരിശോധനകൾക്കൊടുവിലാണ് ഫെയർനസ് ക്രീം വില്ലൻ ആയതായി കണ്ടെത്തിയത്. എന്നാൽ ഇക്കാര്യത്തിൽ ഏറെ ശ്രദ്ധേയമായ കാര്യം കെമിക്കലുകൾ ഉപയോഗിച്ച് പ്രശ്നങ്ങൾ ഉണ്ടാവാതിരിക്കാനായി ഇവർ രണ്ടുപേരും ഹെർബൽ ഫെയർനസ് ക്രീമുകൾ ആയിരുന്നു ഉപയോഗിച്ചിരുന്നത്.
ഉയര്ന്ന അളവില് ലോഹമൂലകങ്ങള് അടങ്ങിയ ഹെർബൽ ക്രീമുകള് ഉപയോഗിച്ചതാണ് ഈ രണ്ടു രോഗികളിലും പ്രശ്നമായത്. ഈ ലോഹ മൂലകങ്ങളുടെ പ്രവർത്തനം മൂലം വൃക്കയുടെ അരിപ്പയ്ക്ക് കേടുവരികയും പ്രോട്ടീന് മൂത്രത്തിലൂടെ നഷ്ടപ്പെടുകയും ചെയ്യുന്ന അവസ്ഥയായിരുന്നു ഇവർക്ക് ഉണ്ടായിരുന്നത്. ഇവർക്ക് രണ്ടുപേർക്കും നടത്തിയ പരിശോധനയിൽ മൂത്രത്തിൽ ഉയർന്ന അളവിലുള്ള പ്രോട്ടീന്റെ സാന്നിധ്യവും രക്തത്തിൽ മെർക്കുറിയുടെ അംശവും കണ്ടെത്തിയതോടെയാണ് ഡോക്ടർമാർ വിശദമായി കാര്യങ്ങൾ അന്വേഷിക്കുകയും ഇരുവരും ഉപയോഗിച്ചിരുന്ന ഫെയർനസ് ക്രീമുകളാണ് വൃക്ക തകരാറിലേക്ക് വഴിവച്ചതെന്നും കണ്ടെത്തിയത്.
Discussion about this post