വെസ്റ്റ് ഇൻഡീസിനെതിരായ ആദ്യ ഏകദിനത്തിൽ ഇന്ത്യ ടോസ് നേടി ബൗളിങ് തിരഞ്ഞെടുത്തു. കാര്യവട്ടം ഗ്രീൻഫീൽഡ് സ്റ്റേഡിയത്തിൽ നടക്കുന്ന മത്സരത്തിൽ ആദ്യം ബൗൾ ചെയ്ത് പിന്നീട് ലക്ഷ്യം പിന്തുടരാനാണ് ഇന്ത്യയുടെ തീരുമാനം. പിച്ച് മികച്ചതാണെന്നും പകൽ സമയത്തെ കടുത്ത ചൂടിന് ശേഷം രാത്രിയിൽ ബാറ്റിങ്ങിന് കൂടുതൽ അനുകൂലമാകുമെന്ന പ്രതീക്ഷയിലാണെന്നും ക്യാപ്റ്റൻ ശുഭ്മൻ ഗിൽ പറഞ്ഞു.
ഏഷ്യൻ ഗെയിംസുമായി ബന്ധപ്പെട്ട് ചില താരങ്ങൾ ലഭ്യമല്ലാത്ത സാഹചര്യത്തിലും മികച്ച ടീമിനെയാണ് ഇന്ത്യ അണിനിരത്തിയിരിക്കുന്നതെന്ന് ഗിൽ വ്യക്തമാക്കി. നാല് ബൗളർമാരും രണ്ട് ഓൾറൗണ്ടർമാരുമടങ്ങുന്ന കോമ്പിനേഷനാണ് ഇന്ത്യ പരീക്ഷിക്കുന്നത്.
മത്സരത്തിൽ നമൻ ധീർ ഇന്ത്യക്കായി ഏകദിന അരങ്ങേറ്റം കുറിക്കും. രോഹിത് ശർമ, ശുഭ്മൻ ഗിൽ, വിരാട് കോഹ്‌ലി, റുതുരാജ് ഗെയ്ക്‌വാദ്, കെ എൽ രാഹുൽ, നമൻ ധീർ, രവീന്ദ്ര ജഡേജ, നിതീഷ് കുമാർ റെഡ്ഡി, ഗുർനൂർ ബ്രാർ, കുൽദീപ് യാദവ്, പ്രസിദ്ധ് കൃഷ്ണ എന്നിവരാണ് ഇന്ത്യയുടെ പ്ലേയിങ് ഇലവനിലുള്ളത്.
ഇന്ത്യൻ ടീമിൽ മുഹമ്മദ് സിറാജിന് ഇടം ലഭിച്ചിട്ടില്ല. അതേസമയം രോഹിത് ശർമയും വിരാട് കോഹ്‌ലിയും ഏകദിന ടീമിലേക്ക് തിരിച്ചെത്തിയതോടെ ആരാധകരുടെ ശ്രദ്ധയും മത്സരത്തിലേക്ക് തിരിഞ്ഞിട്ടുണ്ട്. പുതിയ ഏകദിന ക്യാപ്റ്റൻ ശുഭ്മൻ ഗില്ലിന്റെ നേതൃത്വത്തിൽ ഇന്ത്യയുടെ 2027 ലോകകപ്പ് മുന്നൊരുക്കങ്ങൾക്ക് തുടക്കമിടുന്ന പരമ്പര കൂടിയാണിത്.
