ന്യൂഡൽഹി : ദേശീയ പെൻഷൻ ആയ നാഷണൽ പെൻഷൻ സിസ്റ്റത്തിൽ ഏപ്രിൽ ഒന്നു മുതൽ മാറ്റം വരുന്നതാണ്. പെൻഷൻ ഫണ്ട് റെഗുലേറ്ററി ആൻഡ് ഡെവലപ്മെന്റ് അതോറിറ്റി നൽകിയിട്ടുള്ള നിർദ്ദേശങ്ങൾ അനുസരിച്ചാണ് മാറ്റങ്ങൾ വരുത്തിയിട്ടുള്ളത്. ഏപ്രിൽ ഒന്നു മുതൽ എൻ പി എസ് അക്കൗണ്ടുകളുടെ ആധാർ വെരിഫിക്കേഷൻ നിർബന്ധമാക്കി.
ഇടപാടുകളിൽ സുരക്ഷിതത്വം ഉറപ്പുവരുത്തുന്നതിനുള്ള മാറ്റങ്ങളാണ് ദേശീയ പെൻഷൻ സംവിധാനത്തിൽ വരുത്തിയിട്ടുള്ളത്. എൻപിഎസ് ഇടപാടുകൾക്കായി സെൻട്രൽ റെക്കോർഡ് കീപ്പിംഗ് ഏജൻസിയുടെ വെബ്സൈറ്റിൽ പ്രവേശിക്കുന്നതിനായി കേന്ദ്ര-സംസ്ഥാന സർക്കാരുകളുടെ കീഴിലുള്ള നോഡൽ ഓഫീസുകളും അവയുമായി ബന്ധപ്പെട്ട കേന്ദ്രങ്ങളും പ്രത്യേക പാസ്സ്വേർഡുകൾ ഉപയോഗിക്കേണ്ടതാണ്. സെൻട്രൽ റെക്കോർഡ് കീപ്പിംഗ് സിസ്റ്റത്തിലേക്ക് പ്രവേശിക്കുന്നതിനായി ഇനിമുതൽ ഉപഭോക്താവിന്റെ ആധാർ നമ്പർ അടിസ്ഥാനമാക്കിയുള്ള അധിക സുരക്ഷാ ഫീച്ചർ അവതരിപ്പിച്ചിട്ടുണ്ട്.
സർക്കാർ മേഖലയ്ക്ക് കീഴിലുള്ള എല്ലാ ഓഫീസുകളും സ്വയംഭരണ സ്ഥാപനങ്ങളും ഇക്കാര്യങ്ങൾ ശ്രദ്ധിക്കാനും ഉപഭോക്താക്കളെ വിവരം അറിയിക്കാനും ശ്രമിക്കണമെന്ന് പി എഫ് ആർ ഡി എ അറിയിച്ചു. ഇനിമുതൽ ദേശീയ പെൻഷൻ ലഭിക്കുന്ന ഉപഭോക്താക്കൾക്ക് ആധാർ അടിസ്ഥാനമാക്കിയുള്ള ലോഗിൻ വെരിഫിക്കേഷൻ അവരുടെ യൂസർ ഐഡിയുമായി ലിങ്ക് ചെയ്യും. തുടർന്ന് ആധാറുമായി ബന്ധിപ്പിച്ച മൊബൈൽ നമ്പറിൽ ഒ ടി പി വരുന്നതാണ്. ഈ ഒ ടി പി ഉപയോഗിച്ച് മാത്രമായിരിക്കും ഇനിമുതൽ എൻപിഎസ് അക്കൗണ്ടുകളിൽ ലോഗിൻ ചെയ്യാൻ കഴിയുകയുള്ളൂ.
Discussion about this post