ഒരിക്കലും മറക്കാനാവാത്ത ധാരാളം കഥാപാത്രങ്ങൾ മലയാള സിനിമാ പ്രേക്ഷകർക്ക് സമ്മാനിച്ച നടി ശോഭന 54ാ0 പിറന്നാൾ നിറവിലാണ്. വർഷങ്ങളേറെ പിന്നിട്ടെങ്കിലും ശോഭന അവതരിപ്പിച്ച ഗംഗയെയും നാഗവല്ലിയെയും മറക്കാൻ ഇന്നും പ്രേക്ഷകർക്ക് കഴിഞ്ഞിട്ടില്ല. 2020 ൽ റിലീസ് ചെയ്ത വരനെ ആവശ്യമുണ്ട് എന്ന സിനിമയിലാണ് ശോഭനയെ അവസാനമായി മലയാളികൾ കണ്ടത്. ഒരു ഘട്ടത്തിൽ അവർ നൃത്തത്തിന് കൂടുതൽ ശ്രദ്ധ നൽകി സിനിമകളുടെ കാര്യത്തിൽ സെലക്ടീവാകുകയായിരുന്നു.
സിനിമയിൽ തിളങ്ങി നിന്ന സമയത്ത് ബോളിവുഡിൽ നിന്ന് അവസരങ്ങൾ തേടിയെത്തിയപ്പോഴും ശോഭന അത് ഒഴിവാക്കുകയാണ് ചെയ്തത്. ബോളിവുഡ് നടിക്ക് വേണ്ട സ്ക്രീൻ പ്രസൻസും ഭാഷാ പ്രാവീണ്യവുമെല്ലാം ശോഭനയ്ക്ക് ഉണ്ടെങ്കിലും എന്തുകൊണ്ട് നടി ബോളിവുഡിൽ സജീവമായില്ല എന്ന ചോദ്യം ആരാധകർക്കുണ്ട്. ഇന്ത്യൻ സിനിമയുടെ ഏറ്റവും ഉയരങ്ങളിൽ എത്താമായിരുന്ന സുവർണ്ണ അവസരങ്ങൾ എന്തുകൊണ്ടാണ് താൻ വേണ്ടെന്ന് വെച്ചതെന്ന് നടി പറയുന്നതിങ്ങനെയാണ്.
പോപ്പുലാരിറ്റിയ്ക്ക് വേണ്ടിയുള്ള ശ്രമം അന്ന് ഇല്ലായിരുന്നു. ആ സമയത്ത് ഒരു നല്ല വർക്ക് ചെയ്യണമെന്നേയുള്ളു. നല്ല മലയാള സിനിമകൾ വിട്ട് ആരെങ്കിലും ഒരു ഹിന്ദി പടം ചെയ്യുമോ. എന്നാൽ ഹിന്ദിയിൽ ചില അഭിനയ ആഗ്രഹങ്ങൾ ഉണ്ടായിട്ടുണ്ട്. സിനിമയിൽ മാധുരി ദീക്ഷിതിന്റെ റോൾ ചെയ്താൽ എങ്ങനെ ആയിരിക്കുമെന്നൊക്കെ ചിന്തിക്കുമായിരുന്നു.
നല്ല ഹിന്ദി സിനിമകൾ തേടി വന്നിട്ടുണ്ട്. രാജ് കപൂറിന്റെ സിനിമയൊക്കെ വന്നിരുന്നു. പക്ഷെ അമ്മ വിട്ടില്ല. ഒരു നല്ല പ്രൊജക്ട് വന്നിരുന്നെങ്കിൽ മലയാളത്തിൽ നിന്നും ഒഴിവുണ്ടായിരുന്നെങ്കിൽ ചെയ്യുമായിരുന്നു. എന്നാൽ അങ്ങനെ ഒന്നും വന്നില്ലെന്നും ശോഭന പറഞ്ഞു.
അതേസമയം അനൂപ് സത്യൻ സിനിമയിൽ മോഹൻലാലിനൊപ്പം ശോഭനയും വേഷമിടുന്നുവെന്ന് സൂചനയുണ്ട്. മലയാളത്തിന്റെ പ്രിയ ജോഡികൾ വീണ്ടും ഒന്നിക്കുമ്പോൾ പ്രേക്ഷക പ്രതീക്ഷയും വാനോളമാണ്. ഫ്രണ്ട്ഷിപ്പിന്റെ കഥ പറയുന്ന റോഡ് മൂവിയാകും ഇതെന്നാണ് അനൗദ്യോഗിക വിവരം. ഈ വർഷം തന്നെ സിനിമയുടെ ചിത്രീകരണം ആരംഭിക്കുമെന്നും പറയപ്പെടുന്നുണ്ട്. എന്തായാലും മികച്ചൊരു ചിത്രം തന്നെയാകും അനൂപിന്റേതെന്നും എവർഗ്രീൻ കോമ്പോകൾ ഒന്നിക്കുമ്പോൾ കൗതുകമേറുമെന്നുമാണ് പ്രേക്ഷകർ പറയുന്നത്.
Discussion about this post