ചെന്നൈ : ടെസ്റ്റ് ക്രിക്കറ്റിൽ ഏറ്റവും വേഗതയാർന്ന ഇരട്ട സെഞ്ച്വറി നേടുന്ന വനിതാ താരമായി ഇന്ത്യൻ താരം ഷഫാലി വർമ. ദക്ഷിണാഫ്രിക്കയ്ക്കെതിരായ ഏകദിന ടെസ്റ്റിലാണ് ഈ നേട്ടം കരസ്ഥമാക്കിയിരിക്കുന്നത്. വനിതാ ടെസ്റ്റ് ക്രിക്കറ്റ് ചരിത്രത്തിലെ ഏറ്റവും വേഗമേറിയ ഇരട്ട സെഞ്ച്വറി നേടി ഓസ്ട്രേലിയയുടെ അന്നബെൽ സതർലാൻഡിന്റെ റെക്കോർഡ് ആണ് ഷഫാലി വർമ തിരുത്തിക്കുറിച്ചത്.
മിതാലി രാജിന് ശേഷം വനിതാ ക്രിക്കറ്റിൽ ഇരട്ട സെഞ്ച്വറി നേട്ടം കരസ്ഥമാക്കുന്ന ഇന്ത്യൻ ക്രിക്കറ്റ് താരം കൂടിയാണ് 20 കാരിയായ ഷഫാലി. 194 പന്തിൽ നിന്നായിരുന്നു ഷഫാലിയുടെ ഇരട്ട സെഞ്ച്വറി നേട്ടം.
മുൻ ക്യാപ്റ്റൻ മിതാലി രാജിന് ശേഷം 22 വർഷങ്ങൾക്ക് ശേഷമാണ് ടെസ്റ്റ് ക്രിക്കറ്റിൽ ഒരു ഇന്ത്യൻ താരം ഇരട്ട സെഞ്ച്വറി നേടുന്നത്.
2002 ഓഗസ്റ്റിൽ ടൗണ്ടണിൽ നടന്ന ഇംഗ്ലണ്ടിനെതിരായ മത്സരത്തിൽ ആയിരുന്നു മുൻ ക്യാപ്റ്റൻ മിതാലി രാജ് ഇരട്ട സെഞ്ച്വറി നേടിയിരുന്നത്. അന്ന് 407 പന്തിൽ നിന്ന് 214 റൺസ് ആയിരുന്നു മിതാലി നേടിയത്. എന്നാൽ ഷഫാലി വർമ 194 പന്തിൽ ഇരട്ട സെഞ്ച്വറി നേടുകയും 197 പന്തിൽ 205 റൺസെടുത്ത ശേഷം ഔട്ട് ആവുകയുമായിരുന്നു. 23 ബൗണ്ടറികളും എട്ട് സിക്സുകളും നേടിക്കൊണ്ടാണ് ഷഫാലി ഏറ്റവും വേഗതയാർന്ന ഇരട്ട സെഞ്ച്വറി നേട്ടം കൈവരിച്ചത്.
Discussion about this post