ന്യൂഡൽഹി: രാജസ്ഥാനിലെ തവാറ മണൽപ്പരപ്പുകളെ പ്രകമ്പനം കൊള്ളിച്ചുകൊണ്ട് ഇന്ത്യൻ സൈന്യത്തിന്റെ കോണാർക്ക് കോർപ്സ് തങ്ങളുടെ പീരങ്കി-റോക്കറ്റ് വിന്യാസത്തിന്റെ കരുത്ത് പ്രദർശിപ്പിച്ചു. പൊഖ്റാൻ ഫീൽഡ് ഫയറിംഗ് റേഞ്ചിൽ നടന്ന യുദ്ധാഭ്യാസത്തിൽ അത്യാധുനിക ആയുധശേഖരമാണ് അണിനിരന്നത്.
‘ബ്ലേസിംഗ് സ്റ്റീൽ, ഡിസീസീവ് ഇംപാക്ട് – ബാറ്റിൽഫീൽഡ് തണ്ടർ’, എന്ന പേരിൽ അറിയപ്പെട്ട അഭ്യാസപ്രകടനത്തിൽ ബോഗ്രാ ബ്രിഗേഡിലെ) ഗണ്ണർമാരാണ് പങ്കെടുത്തത്. റഷ്യൻ നിർമ്മിത BM-21 Grad, ഇന്ത്യയുടെ തദ്ദേശീയമായ പിനാക റോക്കറ്റ് സിസ്റ്റങ്ങൾ എന്നിവ ഈ പ്രകടനത്തിൽ പ്രധാന പങ്കുവഹിച്ചു. നിമിഷങ്ങൾക്കുള്ളിൽ ശത്രുതാവളങ്ങളെ തകർത്തെറിയാൻ ശേഷിയുള്ളതാണ് ഇവ.
ആധുനിക യുദ്ധമുഖത്ത് ഡ്രോണുകളുടെ പ്രാധാന്യം വിളിച്ചോതിക്കൊണ്ട്, കൃത്യമായ ലക്ഷ്യങ്ങൾ കണ്ടെത്തുന്നതിനും ആക്രമണങ്ങൾ ഏകോപിപ്പിക്കുന്നതിനും ഡ്രോണുകളെ ഈ അഭ്യാസത്തിൽ ഫലപ്രദമായി ഉപയോഗിച്ചു. മരുഭൂമിയിലെ കഠിനമായ സാഹചര്യങ്ങളിൽ പീരങ്കിപ്പടയുടെ കൃത്യത പ്രതികരണ വേഗത , ഏകോപനം എന്നിവ മെച്ചപ്പെടുത്തുന്നതിനാണ് ഈ പരിശീലനം നടത്തിയത്. “കൃത്യതയാർന്ന ഗർജ്ജനം” എന്നാണ് ഈ അഭ്യാസത്തെ കോണാർക്ക് കോർപ്സ് വിശേഷിപ്പിച്ചത്. ഏത് വെല്ലുവിളികളെയും നേരിടാൻ ഇന്ത്യൻ സേന സജ്ജമാണെന്ന് ഈ പ്രകടനം ഒരിക്കൽ കൂടി അടിവരയിടുന്നു.
ഇന്ത്യയുടെ തദ്ദേശീയമായ അഭിമാനമാണ് പിനാക ആയിരുന്നു അഭ്യാസത്തിലെ പ്രധാന താരം. വെറും 44 സെക്കൻഡുകൾക്കുള്ളിൽ 12 റോക്കറ്റുകൾ തൊടുത്തുവിടാൻ ഇതിന് സാധിക്കും. ഏകദേശം 700 മീറ്റർ ചുറ്റളവിലുള്ള പ്രദേശം പൂർണ്ണമായും തകർക്കാൻ ഇതിന്റെ ഒരു സാൽവോയ്ക്ക് കഴിയും. BM-21 Grad റഷ്യൻ നിർമ്മിതമായ ഈ മൾട്ടിപ്പിൾ റോക്കറ്റ് ലോഞ്ചർ ലോകത്തിലെ തന്നെ ഏറ്റവും വിശ്വസനീയമായ ആയുധങ്ങളിലൊന്നാണ്. ഇതിന്റെ 40 ബാരലുകളിൽ നിന്ന് സെക്കൻഡുകൾക്കുള്ളിൽ റോക്കറ്റുകൾ പ്രവഹിക്കുന്നത് മരുഭൂമിയിൽ വലിയൊരു അഗ്നിപർവ്വതം പൊട്ടിത്തെറിക്കുന്ന പ്രതീതിയാണ് ഉണ്ടാക്കിയത്.
ഈ അഭ്യാസത്തിന്റെ ഏറ്റവും വലിയ പ്രത്യേകത ഡ്രോണുകളുടെ ഉപയോഗമാണ്. മുൻകാലങ്ങളിൽ ശത്രുവിന്റെ സ്ഥാനം കണ്ടെത്താൻ നിരീക്ഷകർ നേരിട്ട് പോകേണ്ടി വന്നിരുന്നു. എന്നാൽ ഇവിടെ ഡ്രോണുകൾ തത്സമയം ശത്രുവിന്റെ ദൃശ്യങ്ങളും ലൊക്കേഷനും പീരങ്കിപ്പടയ്ക്ക് കൈമാറി. ഇത് ആക്രമണത്തിന്റെ കൃത്യത (Accuracy) വർദ്ധിപ്പിക്കുകയും സമയം ലാഭിക്കുകയും ചെയ്തു.
സ്ഥിരമായ ലക്ഷ്യങ്ങളെ മാത്രമല്ല, നീങ്ങിക്കൊണ്ടിരിക്കുന്ന ശത്രുവാഹനങ്ങളെയും ഒളിഞ്ഞിരിക്കുന്ന താവളങ്ങളെയും എങ്ങനെ തകർക്കാം എന്നതിലായിരുന്നു ഈ പരിശീലനത്തിന്റെ ഊന്നൽ. പശ്ചിമ അതിർത്തിയിലെ (രാജസ്ഥാൻ മേഖല) പാകിസ്ഥാൻ അതിർത്തിയോട് ചേർന്നുള്ള ഭൂപ്രകൃതിക്ക് സമാനമായ ഇടത്താണ് ഇത് നടന്നത് എന്നത് ഇതിന്റെ തന്ത്രപരമായ പ്രാധാന്യം വർദ്ധിപ്പിക്കുന്നു.
1971-ലെ ഇൻഡോ-പാക് യുദ്ധത്തിൽ ബോഗ്രാ (ഇന്നത്തെ ബംഗ്ലാദേശിൽ) പിടിച്ചെടുക്കുന്നതിൽ നിർണ്ണായക പങ്കുവഹിച്ച പാരമ്പര്യമുള്ള ബ്രിഗേഡാണിത്. അതുകൊണ്ട് തന്നെ ഈ പേര് ഉപയോഗിക്കുന്നത് സൈനികമായ ആവേശം വർദ്ധിപ്പിക്കും.
