ജപ്പാനിലെ ‘റെന്റ്-എ-ബോയ്ഫ്രണ്ട്’ എന്ന ആശയം ഇന്ത്യയിലും ചർച്ചയാകുന്നു. ഡൽഹി ആസ്ഥാനമായുള്ള ഇൻസ്റ്റാഗ്രാം ക്രിയേറ്റർ ഇഷ ഭല്ലയാണ് ‘കോപാർട്ണർ’ എന്ന വെബ്സൈറ്റ് വഴി ഒരു പുരുഷ കൂട്ടാളിയെ വാടകയ്ക്ക് എടുത്ത് ഷോപ്പിംഗ് മാളിൽ ഒരു ദിവസം ചെലവഴിച്ച അനുഭവം സോഷ്യൽ മീഡിയയിൽ പങ്കുവെച്ചത്.
ജപ്പാനിൽ വൈറലായ ഈ ആശയം ഇപ്പോൾ ഇന്ത്യയിലെ പ്രമുഖ നഗരങ്ങളിലും ലഭ്യമാണ്. ഷോപ്പിംഗ്, യാത്രകൾ, സിനിമാ കാണൽ തുടങ്ങിയ കാര്യങ്ങൾക്കായി ഈ റെന്റ്-എ-ബോയ്ഫ്രണ്ട് സൗകര്യം ഉപയോഗിക്കാം. കോപാർട്ണർ.ഇൻ (Kopartner.in) എന്ന വെബ്സൈറ്റിലൂടെയാണ് സേവനങ്ങൾ ലഭ്യമാകുന്നത്. ഷോപ്പിംഗ് ബഡ്ഡി, മൂവി പാർട്ണർ, ട്രാവൽ പാർട്ണർ, എൽഡർ കെയർ തുടങ്ങിയ വിവിധ സേവനങ്ങൾ ഇവിടെ ലഭ്യമാണ്. ഈ വെബ്സൈറ്റിൽ പ്രൊഫൈൽ നിർമ്മിച്ച ശേഷം ആവശ്യമുള്ള പങ്കാളിയെ തിരഞ്ഞെടുക്കാം. പ്രായമായവരുടെ പരിചരണം, ഒന്നിച്ച് കറങ്ങാൻ പോകുക (Hanging Out), ക്ലബ്ബിംഗ്, സിനിമ കാണാൻ ഒപ്പം വരിക, ഷോപ്പിംഗ് ബഡ്ഡി, മെഡിക്കൽ സപ്പോർട്ട്, യാത്രാ പങ്കാളി തുടങ്ങിയ നിരവധി സേവനങ്ങൾ ഇതിലൂടെ ലഭ്യമാണ്.
മുൻകൂട്ടി തീരുമാനിച്ച സ്ഥലത്ത് വെച്ചാണ് ഈഷ താൻ ബുക്ക് ചെയ്ത പങ്കാളിയെ കണ്ടുമുട്ടിയത്. തുടർന്ന് ഇരുവരും ഒന്നിച്ച് മാളിലേക്ക് പോയി. മാളിൽ വെച്ച് തന്റെ ഷോപ്പിംഗ് ബാഗുകൾ ചുമക്കാനും വസ്ത്രങ്ങൾ തിരഞ്ഞെടുക്കാനും അയാൾ സഹായിച്ചതായി യുവതി പറയുന്നു. തന്റെ മുൻകാമുകനെ ഓർത്ത് സങ്കടപ്പെട്ടപ്പോൾ അയാൾ തന്നെ ആശ്വസിപ്പിക്കാനും തമാശകൾ പറഞ്ഞ് ചിരിപ്പിക്കാനും ശ്രമിച്ചുവെന്നും യുവതി വീഡിയോയിൽ വ്യക്തമാക്കുന്നുണ്ട്. ഒരു സുഹൃത്തോ പങ്കാളിയോ ഒപ്പമുണ്ടെങ്കിൽ എങ്ങനെയിരിക്കുമോ അതുപോലെയായിരുന്നു ആ അനുഭവമെന്നും, മടങ്ങുന്നതിന് മുൻപ് ഈ സേവനത്തിനുള്ള പണം നൽകിയതായും ഈഷ കൂട്ടിച്ചേർത്തു.
ഡൽഹി, മുംബൈ, കൊൽക്കത്ത, നോയിഡ, ഗുഡ്ഗാവ്, ബെംഗളൂരു, അഹമ്മദാബാദ്, പൂനെ, ഹൈദരാബാദ്, ചെന്നൈ തുടങ്ങിയ ഇന്ത്യയിലെ പ്രമുഖ നഗരങ്ങളിലെല്ലാം ഈ സേവനം ലഭ്യമാണെന്നാണ് വെബ്സൈറ്റ് അവകാശപ്പെടുന്നത്. പൂർണ്ണമായും വെരിഫൈഡ് ആയ പ്രൊഫഷണലുകളെയാണ് സുരക്ഷിതമായി ഇതിനായി നൽകുന്നതെന്നും അധികൃതർ വ്യക്തമാക്കുന്നു.
