ഹിന്ദി, തെലുങ്ക് ചലച്ചിത്ര ലോകത്തെ കണ്ണീരിലാഴ്ത്തി യുവ നടി അനന്യ രാജ് (27) അന്തരിച്ചു. ജൂലൈ 15-ന് പുലർച്ചെ ഉറക്കത്തിനിടയിലാണ് അനന്യയുടെ അന്ത്യം സംഭവിച്ചതെന്ന് കുടുംബം വ്യക്തമാക്കുന്നു. നടി മരിച്ച് ഒരു മാസത്തിനുശേഷമാണ് ഈ വിവരം കുടുംബം ഔദ്യോഗികമായി ഇൻസ്റ്റാഗ്രാമിലൂടെ പുറത്തുവിട്ടത്.
കഴിഞ്ഞ ഒരു വർഷത്തിലേറെയായി അനന്യ കടുത്ത ശാരീരിക-മാനസിക ആരോഗ്യപ്രശ്നങ്ങൾ നേരിട്ടിരുന്നുവെന്നും എന്നാൽ ഒരു യോദ്ധാവിനെപ്പോലെ അതിനോടൊക്കെ അവൾ ധീരമായി പോരാടുകയായിരുന്നുവെന്നും കുടുംബം കുറിച്ചു ആരോഗ്യപ്രശ്നങ്ങളുടെ കൂടുതൽ വിശദാംശങ്ങൾ വെളിപ്പെടുത്താൻ താല്പര്യപ്പെടാത്ത കുടുംബം, അനന്യയുടെ ആത്മാവിന് വേണ്ടി പ്രാർത്ഥിക്കണമെന്നും ഈ ദുഃഖസമയത്ത് തങ്ങളുടെ സ്വകാര്യത മാനിക്കണമെന്നും ആരാധകരോട് അഭ്യർത്ഥിച്ചു.
മുംബൈയിൽ ജനിച്ചുവളർന്ന അനന്യ രാജ് ബോളിവുഡിലും ടോളിവുഡിലും നിരവധി ശ്രദ്ധേയമായ കഥാപാത്രങ്ങളെ അവതരിപ്പിച്ചിട്ടുണ്ട്. ‘7 അവേഴ്‌സ് ടു ഗോ’ (7 Hours to Go), ‘ഗോസ്റ്റ്’ (Ghost), ‘തഗ്ഗെഡേ ലെ’ (Thaggede Le) തുടങ്ങിയ ചിത്രങ്ങളിലെ അഭിനയം ഏറെ പ്രശംസ പിടിച്ചുപറ്റിയിരുന്നു. സിനിമകൾക്ക് പുറമെ നിരവധി സംഗീത ആൽബങ്ങളിലും അനന്യ തിളങ്ങിയിരുന്നു. വളരെ ചെറിയ പ്രായത്തിൽ തന്നെ സിനിമാരംഗത്ത് തന്റേതായ മുദ്ര പതിപ്പിച്ച അനന്യയുടെ ആകസ്മിക വേർപാടിൽ അനുശോചനം അറിയിക്കുകയാണ് ചലച്ചിത്ര ലോകവും ആരാധകരും.
