മുഖ്യമന്ത്രി വി.ഡി. സതീശനെതിരായ രണ്ടാം വിവാഹ ആരോപണവുമായി ബന്ധപ്പെട്ട കേസിൽ റിപ്പോർട്ടർ ബ്രോഡ്കാസ്റ്റിങ് കമ്പനി എംഡി ആന്റോ അഗസ്റ്റിന് വീണ്ടും പൊലീസ് നോട്ടീസ്. നാളെ രാവിലെ 10ന് കളമശേരി പൊലീസ് സ്റ്റേഷനിൽ ചോദ്യം ചെയ്യലിന് ഹാജരാകാനാണ് നിർദേശം. കേസിൽ ആന്റോയ്ക്ക് പൊലീസ് നൽകുന്ന രണ്ടാമത്തെ നോട്ടീസാണിത്.
ഒക്ടോബർ 15ന് ശേഷമേ ചോദ്യം ചെയ്യലിന് ഹാജരാകാൻ കഴിയൂ എന്ന ആന്റോ അഗസ്റ്റിന്റെ ആവശ്യം പൊലീസ് അംഗീകരിച്ചില്ലെന്നാണ് റിപ്പോർട്ട്. നിശ്ചയിച്ച സമയത്ത് ഹാജരായില്ലെങ്കിൽ തുടർനടപടിയുടെ ഭാഗമായി കോടതിയെ സമീപിക്കാനാണ് പൊലീസിന്റെ നീക്കമെന്നും വിവരമുണ്ട്.
കെപിസിസി വക്താവ് രാജു പി. നായർ നൽകിയ പരാതിയിലാണ് പൊലീസ് കേസ് രജിസ്റ്റർ ചെയ്തത്. പത്തനംതിട്ടയിൽ നടന്ന ഒരു പൊതുപരിപാടിക്കിടെ മുഖ്യമന്ത്രി മറ്റൊരു വിവാഹം കഴിച്ചെന്ന തരത്തിലുള്ള വിവരങ്ങൾ തനിക്ക് ലഭിച്ചിട്ടുണ്ടെന്ന് ആന്റോ അഗസ്റ്റിൻ പറഞ്ഞിരുന്നു. ബൈന്ദൂർ സബ് രജിസ്ട്രാർ ഓഫീസുമായി ബന്ധപ്പെട്ട വിവാഹരേഖകൾ തന്റെ കൈവശമുണ്ടെന്നും അദ്ദേഹം അവകാശപ്പെട്ടിരുന്നു. എന്നാൽ ഈ രേഖകൾ വ്യാജമാണെന്നും മുഖ്യമന്ത്രിയെ അപകീർത്തിപ്പെടുത്താനുള്ള ഗൂഢാലോചനയുടെ ഭാഗമാണെന്നുമാണ് പരാതിയിലെ ആരോപണം.
ആരോപണങ്ങളുമായി ബന്ധപ്പെട്ട രേഖകളുടെ ഉറവിടം, അവ ആന്റോ അഗസ്റ്റിന്റെ കൈവശം എത്തിയ സാഹചര്യം, സംഭവത്തിൽ മറ്റാർക്കെങ്കിലും പങ്കുണ്ടോയെന്നതടക്കമുള്ള കാര്യങ്ങളാണ് അന്വേഷണത്തിന്റെ ഭാഗമായി പൊലീസ് പരിശോധിക്കുന്നത്. സംഭവവുമായി ബന്ധപ്പെട്ട് രണ്ട് അജ്ഞാതരെയും കേസിൽ പ്രതികളാക്കിയിട്ടുണ്ട്.
