2006 ഡിസംബറിൽ ജൊഹാനസ്ബർഗിലെ വാണ്ടറേഴ്‌സ് സ്റ്റേഡിയത്തിൽ ദക്ഷിണാഫ്രിക്കയ്‌ക്കെതിരെ നടന്ന ഒന്നാം ടെസ്റ്റ് മത്സരത്തിനിടെ ഇന്ത്യൻ ഫാസ്റ്റ് ബൗളർ എസ്. ശ്രീശാന്തും ദക്ഷിണാഫ്രിക്കൻ പേസർ ആന്ദ്രെ നെല്ലും തമ്മിൽ നടന്ന നേർക്കുനേർ പോരാട്ടം ടെസ്റ്റ് ക്രിക്കറ്റ് ചരിത്രത്തിലെ അവിസ്മരണീയ നിമിഷങ്ങളിലൊന്നാണ്.
മത്സരത്തിന്റെ ഒന്നാം ഇന്നിംഗ്സിൽ 40 റൺസ് മാത്രം വഴങ്ങി 5 വിക്കറ്റുകൾ വീഴ്ത്തി മിന്നുന്ന പ്രകടനം പുറത്തെടുത്ത ശ്രീശാന്തിന്റെ മികവിൽ ദക്ഷിണാഫ്രിക്കയെ വെറും 84 റൺസിന് ഇന്ത്യ പുറത്താക്കിയിരുന്നു. തുടർന്ന് രണ്ടാം ഇന്നിംഗ്സിൽ വൻ ലീഡുമായി ഇന്ത്യ ബാറ്റ് ചെയ്യവെയാണ് കീഴ്‌നിര ബാറ്ററായി ശ്രീശാന്ത് ക്രീസിലെത്തുന്നത്. ഈ സമയം ശ്രീശാന്തിനെ ഭയപ്പെടുത്താനായി ആന്ദ്രെ നെൽ കടുത്ത സ്ലെഡ്ജിംഗ് മനോഭാവവും ബൗൺസറുകളും പുറത്തെടുത്തു. തനിക്ക് രക്തത്തിന്റെ മണം കിട്ടുന്നുണ്ടെന്നും ശ്രീശാന്തിന് ഹൃദയവിശാലതയോ ധൈര്യമോ ഇല്ലെന്നും നെൽ പരിഹസിച്ചു. സ്വന്തം ജേഴ്സിയിലെ ദക്ഷിണാഫ്രിക്കൻ എംബ്ലം കാണിച്ചുകൊണ്ട് താൻ രാജ്യത്തിന് വേണ്ടിയാണ് പോരാടുന്നതെന്ന് പറഞ്ഞ നെൽ, അടുത്ത പന്തിൽ ശ്രീശാന്തിനെ പുറത്താക്കുമെന്നും ഭീഷണിപ്പെടുത്തി.
എന്നാൽ തൊട്ടടുത്ത പന്തിൽ ക്രീസിന് പുറത്തേക്ക് ഇറങ്ങിവന്ന ശ്രീശാന്ത്, നെല്ലിന്റെ തലയ്ക്ക് മുകളിലൂടെ പന്ത് കൂറ്റൻ സിക്സറിലേക്ക് പറത്തിയാണ് മറുപടി നൽകിയത്. ഇതിനുശേഷം ബാറ്റും താഴ്ത്തിപ്പിടിച്ച് പിച്ചിനു നടുവിൽ തുള്ളിച്ചാടി താരം നടത്തിയ ആഘോഷം ക്രിക്കറ്റ് ലോകത്തെ ആവേശത്തിലാഴ്ത്തി. മത്സരത്തിലാകെ 8 വിക്കറ്റുകൾ വീഴ്ത്തിയ ശ്രീശാന്ത് പ്ലെയർ ഓഫ് ദി മാച്ച് പുരസ്കാരം സ്വന്തമാക്കുകയും, ദക്ഷിണാഫ്രിക്കൻ മണ്ണിൽ ഇന്ത്യയുടെ ചരിത്രപരമായ കന്നി ടെസ്റ്റ് വിജയത്തിന് വഴിതുറക്കുകയും ചെയ്തു.
