ഇന്ത്യൻ കളിക്കാരുടെ നിരന്തരമായ പരിക്കുകളെ തുടർന്ന് ബിസിസിഐയുടെ ബെംഗളൂരുവിലെ സെന്റർ ഓഫ് എക്സലൻസിൽ (സിഒഇ) ചികിത്സ തേടിയത് 32 മുൻനിര പുരുഷ ക്രിക്കറ്റ് താരങ്ങൾ. കഴിഞ്ഞ 20 മാസത്തിനിടെ പ്രമുഖ താരങ്ങൾ അടക്കമുള്ളവരുടെ പരിക്ക് വർദ്ധിച്ച പശ്ചാത്തലത്തിലാണ് ബിസിസിഐ റിപ്പോർട്ട് പുറത്തുവന്നിരിക്കുന്നത്. കഴിഞ്ഞ ഐപിഎൽ സീസണിന് ശേഷമാണ് സിഒഇയിൽ ചികിത്സയ്ക്കെത്തുന്ന കളിക്കാരുടെ എണ്ണം കുത്തനെ ഉയർന്നതെന്ന് ടൈംസ് ഓഫ് ഇന്ത്യ റിപ്പോർട്ട് ചെയ്തു. കായികതാരങ്ങളുടെ പരിക്ക് കൃത്യമായി പരിഹരിക്കുന്നതിനായി സിഒഇയുടെ വാർഷിക ബജറ്റ് 92 കോടി രൂപയിൽ നിന്ന് 127 കോടി രൂപയായി ബിസിസിഐ ഉയർത്തിയിട്ടുണ്ട്.
താരങ്ങൾക്ക് നിരന്തരമായി പരിക്കേൽക്കുന്നതിൽ മുഖ്യ പരിശീലകൻ ഗൗതം ഗംഭീറും ടെസ്റ്റ്-ഏകദിന ക്യാപ്റ്റൻ ശുഭ്മൻ ഗില്ലും ആശങ്ക പ്രകടിപ്പിച്ചിരുന്നു. കരിയറിന്റെ അവസാന ഘട്ടത്തിലുള്ള വിരാട് കോഹ്‌ലി, രോഹിത് ശർമ്മ തുടങ്ങിയ പ്രമുഖ താരങ്ങളും കഴിഞ്ഞ വർഷങ്ങളിൽ പുനരധിവാസത്തിനായി (റിഹാബ്) സിഒഇ സന്ദർശിച്ചിരുന്നു. ഹാംസ്ട്രിംഗ് പരിക്കിനെ തുടർന്നാണ് രോഹിത് എത്തിയതെങ്കിൽ, കോഹ്‌ലി ഇതാദ്യമായാണ് സിഒഇയിൽ ചികിത്സയ്ക്കായി എത്തുന്നത്. ജസ്പ്രീത് ബുമ്ര, ഹാർദിക് പാണ്ഡ്യ, വാഷിംഗ്ടൺ സുന്ദർ, നിതീഷ് കുമാർ റെഡ്ഡി, ഹർഷിത് റാണ, പ്രസിദ്ധ് കൃഷ്ണ തുടങ്ങിയവരും സിഒഇയിലെ പതിവ് സന്ദർശകരാണ്.
കഴിഞ്ഞ 20 മാസത്തിനിടെ ആൺ-പെൺ വിഭാഗങ്ങളിലായി ആകെ 68 കളിക്കാരാണ് സിഒഇയിൽ ചികിത്സ തേടിയത്. ഇതിൽ ഭൂരിഭാഗം പേർക്കും സോഫ്റ്റ് ടിഷ്യൂ പരിക്കുകളാണ് ബാധിച്ചത്. കഴിഞ്ഞ വർഷം മാഞ്ചസ്റ്റർ ടെസ്റ്റിനിടെ പാദത്തിന് ഒടിവുണ്ടായ ഋഷഭ് പന്ത് മാത്രമാണ് നേരിട്ടുള്ള ആഘാതം മൂലമുള്ള പരിക്കുമായി ഇവിടെയെത്തിയത്. ഇതിനുമുമ്പ് കോവിഡ് കാലഘട്ടത്തിലാണ് ഇത്രയധികം സോഫ്റ്റ് ടിഷ്യൂ പരിക്കുകൾ താരങ്ങൾക്ക് റിപ്പോർട്ട് ചെയ്തത്. നിലവിലെ സാഹചര്യം കണക്കിലെടുത്ത്, 2025 ജൂൺ മുതൽ ഒഴിവുകിടക്കുന്ന സ്പോർട്സ് സയൻസ് ആൻഡ് മെഡിസിൻ (എസ്എസ്എം) മേധാവി തസ്തികയിലേക്ക് ബിസിസിഐ അപേക്ഷകൾ ക്ഷണിച്ചിട്ടുണ്ട്.
