ബോളിവുഡ് താരം ടൈഗർ ഷ്രോഫിന് നേരെ ആക്രമണം നടത്തുന്നതിന് മുമ്പ് നടൻ സൽമാൻ ഖാന്റെ മുംബൈയിലെ വീടിന് മുന്നിൽ വെടിവെപ്പ് നടത്താനായിരുന്നു തങ്ങളുടെ പദ്ധതി എന്ന് ലോറൻസ് ബിഷ്ണോയി സംഘത്തിലെ അറസ്റ്റിലായ നാല് അംഗങ്ങൾ ദില്ലി പോലീസിനോട് വെളിപ്പെടുത്തി. ബാന്ദ്രയിലുള്ള സൽമാൻ ഖാന്റെ ഗാലക്സി അപ്പാർട്ട്മെന്റിന് മുന്നിൽ കനത്ത പോലീസ് സുരക്ഷ കണ്ടതിനെ തുടർന്ന് പ്രതികൾ ഈ നീക്കത്തിൽ നിന്ന് പിന്മാറുകയായിരുന്നു.
അക്രമികൾ ഗാലക്സി അപ്പാർട്ട്മെന്റിന് ചുറ്റും നിരീക്ഷണം നടത്തുകയും സുരക്ഷ ശക്തമാണെന്ന് മനസ്സിലാക്കുകയും ചെയ്തിരുന്നതായി റിപ്പോർട്ടുകൾ വ്യക്തമാക്കുന്നു. ഈ നിർണായക വെളിപ്പെടുത്തലുകൾ പുറത്തുവന്നതിന് പിന്നാലെ സൽമാൻ ഖാന്റെ വീടിന് മുന്നിലും റോഡിന്റെ ഇരുവശങ്ങളിലുമായി പോലീസിനെ വിന്യസിച്ച് സുരക്ഷ അതിശക്തമാക്കിയിട്ടുണ്ട്. പ്രാദേശിക ബാന്ദ്ര പോലീസ് സ്റ്റേഷനിൽ നിന്നുള്ള പട്രോളിംഗ് വാനും ഇവിടെ സജ്ജീകരിച്ചിട്ടുണ്ട്.
ഒക്ടോബർ 18-ന് മുംബൈയിലെ ജൂഹുവിൽ വെച്ച് ടൈഗർ ഷ്രോഫിന്റെ കാറിന് നേരെ അജ്ഞാതർ വെടിയുതിർത്ത സംഭവത്തിന് പിന്നാലെയാണ് ഈ പുതിയ വിവരങ്ങൾ പുറത്തുവരുന്നത്.
