തിരുവനന്തപുരം: തിരുവനന്തപുരം പേട്ടയിൽ അനീഷ് ജോർജ്ജിനെ കൊലപ്പെടുത്തിയത് മുൻവൈരാഗ്യം മൂലം എന്ന് റിമാൻഡ് റിപ്പോര്ട്ട്. സൈമൺ ലാലൻ അനീഷ് ജോര്ജിനെ കൊലപ്പെടുത്തിയത് കരുതിക്കൂട്ടിയാണെന്ന് റിപ്പോർട്ടിൽ പറയുന്നു. അറസ്റ്റിലായ പ്രതി കുറ്റം സമ്മതിച്ചതായാണ് വിവരം.
അനീഷിനെ സൈമണ് കുത്തിയത് കൊലപ്പെടുത്താനുള്ള ഉദ്ദേശത്തില് തന്നെയാണ്. അനീഷിനെ തടഞ്ഞ് വെച്ച് നെഞ്ചിലും മുതുകിലും കുത്തി. മകളുമായുള്ള അനീഷിന്റെ പ്രണയമാണ് സൈമണിനെ കൊലപാതകത്തിന് പ്രേരിപ്പിച്ചതെന്നാണ് റിപ്പോർട്ട്.
കുത്താന് ഉപയോഗിച്ച കത്തി ഒളിപ്പിച്ചത് വാട്ടര് മീറ്റര് ബോക്സില് ആണ്. ആയുധം പൊലീസ് കണ്ടെടുത്തു. കൊലപാതകം നടന്ന മുറിയില് നിന്ന് ബിയര് കുപ്പികള് കണ്ടെടുത്തെന്നും റിമാന്ഡ് റിപ്പോര്ട്ടിൽ പറയുന്നു.
തിരുവനന്തപുരം പേട്ട ചായക്കുടി ലൈനിലെ പെൺസുഹൃത്തിന്റെ വീട്ടിൽ വച്ച് കഴിഞ്ഞ ദിവസം പുലർച്ചെയാണ് അനീഷ് ജോർജ്ജ് കുത്തേറ്റ് മരിക്കുന്നത്. കള്ളനാണെന്ന് കരുതി തടയാൻ ശ്രമിക്കുന്നതിനിടെ അനീഷിനെ കുത്തിയതാണെന്നായിരുന്നു പൊലീസിൽ കീഴടങ്ങിയ സൈമണ് ലാലൻ ആദ്യം മൊഴി നല്കിയത്. ഈ മൊഴി കളവാണെന്ന് അന്വേഷണത്തിൽ പൊലീസ് കണ്ടെത്തിയിരുന്നു.
പുലർച്ചെ മകളുടെ മുറിയിൽ നിന്നും സംസാരം കേട്ടപ്പോള് സൈമണ് വാതിൽ ചവിട്ടി തുറന്നു. മുറിയിൽ അനീഷിനെ കണ്ട സൈമണ് പ്രകോപിതനായി. ആക്രമിക്കരുതെന്ന് ഭാര്യയും രണ്ടു പെണ്കുട്ടികളും കരഞ്ഞു പറഞ്ഞുവെങ്കിലും കത്തികൊണ്ട് നെഞ്ചിലും മുതുകിലും കുത്തിയ സൈമൺ അനീഷിനെ കൊലപ്പെടുത്തുകയായിരുന്നു.












