ബീജിങ്: സോഷ്യൽ മീഡിയ ചലഞ്ചിന്റെ ഭാഗമായി ഏഴ് ബോട്ടിൽ ചൈനീസ് വോഡ്ക കഴിച്ച സോഷ്യൽ മീഡിയ താരം മരിച്ചു. ടിക്ക് ടോക്കിന്റെ ചൈന വേർഷൻ ആപ്പ് ഡൗയീനിൽ നടത്തിയ ചലഞ്ചാണ് ജീവനെടുത്തത്.
ചൈനീസ് വോഡ്ക എന്ന് അറിയപ്പെടുന്ന ബെയ്ജിയു ആണ് ഇയാൾ അകത്താക്കിയത്. 30 മുതൽ 60 ശതമാനം വരെ ആൾക്കഹോൾ കലർന്ന ചൈനയിലെ നാടൻ വോഡ്കയാണിത്.
സാൻകിയാങ് എന്നറിയപ്പെടുന്ന 34 കാരനാണ് മരണമടഞ്ഞത്. കഴിഞ്ഞ മെയ് 16 നായിരുന്നു സംഭവം. പുലർച്ചെ ഒരു മണിയോടെയാണ് ഇയാൾ ലൈവ് സ്ട്രീമിട്ട് വോഡ്ക ചലഞ്ച് തുടങ്ങിയത്. ലൈവ് സ്ട്രീമിങ് അവസാനിച്ച് 12 മണിക്കൂറിനുളളിൽ ഇയാൾ മരിച്ചതായി സുഹൃത്തുക്കൾ പറയുന്നു. അമിതമായി മദ്യം അകത്ത് ചെന്നതാണ് മരണകാരണമെന്ന് ഷാങ് യൂ ന്യൂസ് സ്ഥിരീകരിച്ചിട്ടുണ്ട്.
ഏഴ് ബോട്ടിലുകൾ ഇയാൾ അകത്താക്കിയതായി ലൈവ് സ്ട്രീം കണ്ടുകൊണ്ടിരുന്ന പ്രേക്ഷകരാണ് സാക്ഷ്യപ്പെടുത്തിയത്. എങ്ങനെയാണ് ഇയാൾ ഏഴ് ബോട്ടിൽ കുടിച്ചതെന്ന് സുഹൃത്തുക്കൾ പോലും ആശ്ചര്യപ്പെടുകയാണ്. ഓരോ ബോട്ടിൽ അകത്താക്കുമ്പോഴും കാണികളുടെ ഗിഫ്റ്റ് വൗച്ചറുകളും സമ്മാനങ്ങളുമൊക്കെ വന്നിരുന്നു. ഇതോടെ ആവേശം കയറി കൂടുതൽ ബോട്ടിലുകൾ അകത്താക്കുകയായിരുന്നു.
നേരത്തെയും ഇയാൾ ഇത്തരം മത്സരങ്ങളിൽ പങ്കെടുക്കുകയും അതിന്റെ വീഡിയോകൾ ആപ്പിൽ പോസ്റ്റ് ചെയ്യുകയും ചെയ്തിരുന്നു. ലൈവ് സ്ട്രീമിലെ മദ്യപാനം ഉൾപ്പെടെ ഡൗയിൻ ആപ്പിൽ കർശന വിലക്കുണ്ട്. ലൈവ് സ്ട്രീമിൽ മദ്യപിച്ചതിന് ആപ്പിൽ നിന്ന് നേരത്തെയും ഇയാൾക്ക് വിലക്ക് നേരിടേണ്ടി വന്നിട്ടുണ്ട്.
