ഉമിനീരിലൂടെ ഗർഭിണിയാണോ എന്ന് അറിയാനുള്ള പുതിയ കണ്ടുപിടുത്തം ലോകത്തിന് മുന്നിൽ അവതരിപ്പിച്ച് സ്റ്റാർട്ടപ്പ് കമ്പനി. സ്പിറ്റ് ടെസ്റ്റ് എന്ന പേരിലാണ് ഇത് അറിയപ്പെടുന്നത്. ഇത് ഉപയോഗിച്ച് ഒരാൾ ഗർഭിണിയാണോ അല്ലയോ എന്നത് കണ്ടുപിടിക്കാൻ കഴിയും. ഇത്തരത്തിൽ ലോകത്തിലെ ആദ്യത്തെ ഉത്പന്നമാണ് ഇത്. നിലവിൽ മൂത്രം ഉപയോഗിച്ചുള്ള പരിശോധനയിലൂടെയാണ് ഗർഭിണിയാണോ അല്ലയോ എന്ന് കണ്ടെത്താനാകുന്നത്.
ഇതിന് പകരമുള്ള ബദൽ പരിശോധനാ മാർഗമായിട്ടാണ് സ്പിറ്റ് ടെസ്റ്റ് അവതരിപ്പിക്കപ്പെടുന്നത്. ജറുസലേം ആസ്ഥാനമായുള്ള സാലിഗ്നോസ്റ്റിക്സ് എന്ന സ്റ്റാർട്ടപ്പാണ് ടെസ്റ്റ് കിറ്റ് വികസിപ്പിച്ചിരിക്കുന്നത്. കൊറോണ ടെസ്റ്റിംഗ് കിറ്റുകൾ നിർമ്മിക്കാൻ ഉപയോഗിക്കുന്ന സാങ്കേതിക വിദ്യയെ അടിസ്ഥാനമാക്കിയാണ് ഇതും നിർമ്മിച്ചിരിക്കുന്നത്. നിലവിൽ യുകെയിലും അയർലന്റിലും ഈ ടെസ്റ്റിംഗ് കിറ്റുകൾ ലഭ്യമാണ്.
തെർമോമീറ്ററിന് സമാനമായ രീതിയിലാണ് ഇതിന്റേയും പ്രവർത്തനം. അൽപ്പസമയം ഈ ഉപകരണം വായിൽ വച്ച ശേഷം ഉമിനീർ ശേഖരിക്കണം. ഇതോടെ ഉപകരണം പ്രവർത്തിക്കുകയും ഗർഭിണിയാണോ അല്ലയോ എന്നത് ഉപകരണത്തിൽ തെളിയുകയും ചെയ്യും. അഞ്ച് മുതൽ 15 മിനിട്ടിനുള്ളിൽ ഫലം അറിയാൻ സാധിക്കും. ഗർഭിണികളും അല്ലാത്തതുമായ 300ലധികം സ്ത്രീകളിൽ പരീക്ഷണം നടത്തിയാണ് ഉപകരണം വിപണിയിൽ എത്തിച്ചതെന്ന് അധികൃതർ പറയുന്നു.












