സ്വന്തം മരണവാര്‍ത്ത കാണേണ്ടി വന്ന നിരവധി പ്രമുഖര്‍ നമുക്കിടയിലുണ്ട്. സോഷ്യല്‍മീഡിയയുടെ ഉപയോഗം വര്‍ധിച്ചതോടെ അടിക്കടി ഇത്തരത്തിലുള്ള തെറ്റായ മരണവാര്‍ത്തകള്‍ പ്രചരിക്കാറുണ്ട്. ഇത്തരത്തിലുള്ള സ്വന്തം മരണവാര്‍ത്തകളോട് നര്‍മ്മ ഭാഷയിലാണ് ‘മരിച്ചുപോയവര്‍’ പ്രതികരിക്കാറ്. അതൊരു കൊമേഡിയന്‍ കൂടിയാണെങ്കില്‍ ആ പ്രതികരണവും നമ്മളെ ചിരിപ്പിച്ചെന്നിരിക്കും.
പ്രമുഖ അമേരിക്കന്‍ ടിവി താരവും കൊമേഡിയനുമായ സ്റ്റീവ് ഹാര്‍വി മരിച്ചെന്നുള്ള തെറ്റായ വാര്‍ത്ത കഴിഞ്ഞ കുറച്ച് മാസങ്ങളായി ലോകമെമ്പാടുമുള്ള സോഷ്യല്‍ മീഡിയയില്‍ പ്രചരിക്കുന്നു. ഒടുവില്‍ തന്റെ മരണവാര്‍ത്തയെ കളിയാക്കി ഹാര്‍വി തന്നെ രംഗത്തുവന്നിരിക്കുകയാണ്.
Me seeing that Rip Harvey is trending pic.twitter.com/n6UcHpP9JN
— Steve Harvey (@IAmSteveHarvey) July 18, 2023
ട്വീറ്ററിലൂടെയാണ് ഹാര്‍വി തന്റെ മരണവാര്‍ത്തയോട് പ്രതികരിച്ചിരിക്കുന്നത്. ‘ആര്‍ഐപി ഹാര്‍വി ട്രെന്‍ഡിംഗ് ആയത് കാണുന്ന ഞാന്‍’ എന്ന തലക്കെട്ടോടെ ഫോണില്‍ സോഷ്യല്‍മീഡിയ പോസ്റ്റുകള്‍ സ്‌ക്രോള്‍ ചെയ്യുന്ന സ്വന്തം ചിത്രം തന്നെയാണ് ഹാര്‍വി പോസ്റ്റ് ചെയ്തിരിക്കുന്നത്. ഈ തലക്കെട്ട്, തെറ്റായ വാര്‍ത്ത പ്രചരിക്കുന്നവര്‍ക്ക് കുറിക്കുകൊള്ളുന്ന മറുപടിയാണെന്ന് ഹാര്‍വി ആരാധകര്‍ പ്രതികരിച്ചു.
ദൈവവുമായി വളരെ നല്ല ബന്ധം ആണ് ഉള്ളത് എന്നതിനാല്‍ മരണം താങ്കള്‍ക്ക് ഒരു പ്രശ്‌നമാകാന്‍ ഇടയില്ലെന്നും പാനിക് അറ്റാക്ക് വന്നതിനാല്‍ താങ്കള്‍ ഉടനൊന്നും ഞങ്ങളെ വിട്ടുപോകരുതെന്നും കൂടുതല്‍ ചിരിപ്പിക്കാന്‍ താങ്കള്‍ ഇവിടെ വേണമെന്നുമെല്ലാം ഹാര്‍വിയുടെ ട്വീറ്റിന് ആരാധകര്‍ മറുപടികള്‍ നല്‍കിയിട്ടുണ്ട്.
