കൊറിയൻ മ്യൂസിക് ബാൻഡ് BTS ന്റെ ആദ്യ പുസ്തകമായ ‘ബിയോണ്ട് ദ സ്റ്റോറി’ ന്യൂയോർക്ക് ടൈംസിന്റെ ബെസ്റ്റ് സെല്ലർ പട്ടികയിൽ ഒന്നാമതെത്തി. പ്രശസ്തിയിലേക്കുള്ള വഴിയിൽ ബാൻഡ് നേരിട്ട ബുദ്ധിമുട്ടുകൾ വിവരിക്കുന്ന പുസ്തകമാണ് ‘ബിയോണ്ട് ദി സ്റ്റോറി: 10-ഇയർ റെക്കോർഡ് ഓഫ് ബിടിഎസ്’. ബിടിഎസിന്റെ പത്താം വാർഷികം പ്രമാണിച്ച് ജൂലൈ 9 നാണ് ഈ പുസ്തകം പുറത്തിറക്കിയത്.
ജൂലൈ 19 ന് ന്യൂയോർക്ക് ടൈംസ് പുറത്തിറക്കിയ ഏറ്റവും കൂടുതൽ വിറ്റഴിക്കപ്പെടുന്ന ഹാർഡ്‌കവർ നോൺ ഫിക്ഷൻ പുസ്തകങ്ങളുടെ ഈ ആഴ്‌ചയിലെ പട്ടികയിൽ ഒന്നാം സ്ഥാനത്താണ് ‘ബിയോണ്ട് ദി സ്റ്റോറി: 10-ഇയർ റെക്കോർഡ് ഓഫ് ബിടിഎസ്’ ഉള്ളത്. കൊറിയൻ എഴുത്തുകാരിൽ നിന്നും ഉള്ള ഒരു പുസ്തകം ന്യൂയോർക്ക് ടൈംസ് ബെസ്റ്റ് സെല്ലർ പട്ടികയിൽ ഒന്നാം സ്ഥാനത്ത് എത്തുന്നത് ഇതാദ്യമായാണ്.
കൊറിയൻ മ്യൂസിക് ബാൻഡ് ആയ ബിടിഎസ് ഒരു ആഗോള പോപ്പ് ഐക്കൺ എന്ന നിലയിൽ ലോകമെങ്ങും ആരാധകരെ നേടിയിട്ടുണ്ട്. ഈ 10 വർഷത്തെ യാത്രയുടെ കഥ പറയുന്ന ഫോട്ടോകളുടെയും കുറിപ്പുകളുടെയും അഭിമുഖങ്ങളുടെയുമെല്ലാം ശേഖരമാണ് ബിയോണ്ട് ദ സ്റ്റോറി എന്ന പുസ്തകത്തിൽ ഒരുക്കിയിരിക്കുന്നത്. ഈ പുസ്തകം പുറത്തിറക്കി ഏതാനും ദിവസങ്ങൾ കൊണ്ട് തന്നെ വിവിധ രാജ്യങ്ങളിലുള്ള ആമസോണിന്റെ ബെസ്റ്റ് സെല്ലർ പട്ടികകളിലും നിരവധി ഓൺലൈൻ ബുക്ക് സ്റ്റോറുകളുടെ ബെസ്റ്റ് സെല്ലർ പട്ടികകളിലും ഒന്നാമതായെത്തി.
കൊറിയൻ നിരൂപകനായ കാങ് മിയോങ്-സിയോക്കും ബിടിഎസും ചേർന്നാണ് ബിയോണ്ട് ദ സ്റ്റോറി എഴുതിയിരിക്കുന്നത്. കൊറിയൻ, ഇംഗ്ലീഷ്, ജാപ്പനീസ് എന്നിവയുൾപ്പെടെ 23 ഭാഷകളിൽ ഈ പുസ്തകം പ്രസിദ്ധീകരിച്ചിട്ടുണ്ട്. ബിടിഎസ് ബാൻഡിന്റെ ഏജൻസിയായ ബിഗ്ഹിറ്റ് മ്യൂസിക്കാണ് ദക്ഷിണ കൊറിയയിലെ ഈ പുസ്തകത്തിന്റെ പ്രസാധകർ. ബിടിഎസ് ആരാധകരുടെ കൂട്ടായ്മയായ ബിടിഎസ് ആർമിയുടെ ജന്മദിനമായി ആഘോഷിക്കുന്ന ജൂലൈ 9 നായിരുന്നു പുസ്തകത്തിന്റെ പ്രകാശനം.
