കൊല്ലം: ഓയൂരില്‍ കുട്ടിയെ തട്ടിക്കൊണ്ടുപോയവര്‍ കൂടുതല്‍ കുട്ടികളെ ലക്ഷ്യമിട്ടതായി സൂചന. കൊട്ടാരക്കരയ്ക്ക് സമീപത്ത് പല സ്ഥലങ്ങളിലും കുട്ടികളെ കാണുന്ന സമയത്ത് ഒരു വെള്ളകാർ സ്ലോ ചെയ്തതായി ദൃക്സാക്ഷികൾ പറയുന്നുണ്ട്. പള്ളിക്കല്‍ മുതലയില്‍ കുട്ടിയെ തട്ടിയെടുക്കാന്‍ ശ്രമം നടന്നതായി സംശയമുണ്ട്. വെള്ള കാര്‍ കുട്ടിയെ ലക്ഷ്യമിട്ടെത്തുന്നതിന്‍റെ സിസിടിവ് ദൃശ്യങ്ങൾ സമൂഹമാദ്ധ്യമങ്ങളിൽ പ്രചരിക്കുന്നുണ്ട്. തിങ്കളാഴ്ച ഉച്ചയ്ക്ക് ആണ് സംഭവം നടന്നത്. ഈ ശ്രമം പരാജയപ്പെട്ടതോടെയാണ് സംഘം ഓയൂരിലേക്ക് പോയതെന്നാണ് നിഗമനം. KL04 AF 3239 എന്ന വ്യാജനമ്പറാണ് കാറില്‍ ഉപയോഗിച്ചിരുന്നത്.
അതേ സമയം ഓയൂരിൽ കുട്ടിയെ തട്ടിക്കൊണ്ടുപോയ സംഭവത്തിൽ പ്രതികളെ പിടികൂടാൻ പോലീസിന് ഇതുവരെ സാധിച്ചിട്ടില്ല. പ്രതികളെ കുറിച്ചുള്ള വിവരം പോലീസിനു ലഭിച്ചിട്ടുണ്ടെന്നും ഉടൻ പിടികൂടുമെന്നുമാണ് മന്ത്രിമാർ ഉൾപ്പെടെ നൽകുന്ന പ്രസ്താവന. പ്രതികളെ ഇതുവരെ പിടികൂടാത്തതും അച്ഛനമ്മമാരുടെ ആശങ്കയക്ക് കാരണമായിട്ടുണ്ട്.
കേസിൽ ഉൾപ്പെട്ട പ്രതികളുടെത് സംശയിക്കുന്ന രണ്ടുപേരുടെ രേഖാ ചിത്രം പോലീസ് പുറത്തുവിട്ടിരുന്നു. ഒരു സ്ത്രീയുടേതും ഒരു പുരുഷൻറേയും രേഖാചിത്രമാണ് പോലീസ് പുറത്തുവിട്ടത്. ഇവർക്കായുള്ള അന്വേഷണമാണ് ഇപ്പോൾ പുരോഗമിക്കുന്നത്. കുട്ടിയെ തട്ടിക്കൊണ്ടുപോയ സംഘത്തിലെ പ്രധാനി ഒരു സ്ത്രീയാണെന്ന സംശയം പോലീസിനുണ്ട്. പോലീസ് നല്ല രീതിയിലാണ് അന്വേഷണം മുന്നോട്ട് കൊണ്ടുപോകുന്നതെന്നും അന്വേഷണം വ്യാപിപ്പിച്ചതോടെ പ്രതികൾക്ക് പുറത്തിറങ്ങാൻ സാധിക്കാത്ത അവസ്ഥയുണ്ടായെന്നും മന്ത്രി പി.രാജീവ് പറഞ്ഞു.
