വാഷിംങ്ടൺ; എന്നും എപ്പോഴും ഭൂമിയ്ക്ക് പുറത്ത് എന്ത് സംഭവിക്കുന്നു എന്നറിയാൻ മനുഷ്യന് കൗതുകമാണ്. അത് കൊണ്ട് തന്നെ ആകാശരഹസ്യങ്ങൾ അന്വേഷിച്ചുകൊണ്ടുള്ള മനുഷ്യകുലത്തിന്റെ പര്യവേഷണങ്ങൾക്ക് നൂറ്റാണ്ടുകളുടെ പഴക്കമുണ്ട്. ഓരോ പര്യവേഷണവും അമ്പരപ്പിക്കുന്ന കണ്ടെത്തലുകളിൽ ചെന്നാണ് നിൽക്കുന്നത്. വീണ്ടും ആ കണ്ടെത്തലുകൾ അപഗ്രഥിച്ച് മുന്നോട്ടു നീങ്ങുന്നതാണ് മനുഷ്യന്റെ രീതി.
ഭൂമിയെ പോലെ ജീവൻതുടിക്കുന്ന മറ്റേതെങ്കിലും ഗ്രഹമുണ്ടോ? നമ്മൾ തിരയുന്നത് പോലെ മറ്റേതെങ്കിലും കൂട്ടർ ഇങ്ങനെ പേടകങ്ങളുമായി ഉലകം ചുറ്റുന്നുണ്ടോ എന്നെല്ലാം മനുഷ്യൻ ചിന്തിച്ചു തുടങ്ങിയിട്ട് കാലങ്ങളായി. ജീവൻ ഉണ്ടാവാൻ സാധ്യതയുള്ള അന്യ ഗ്രഹങ്ങളുടെ പട്ടികയും ജലം ഉണ്ടാവാൻ സാധ്യതയുള്ളവയുടെ വിവരങ്ങളും നമുക്ക് ലഭിച്ചിട്ടുണ്ട്.
എന്നാൽ ഇപ്പോൾ പെന്റഗണിന്റെ മുൻ ചാരന്റെ വാക്കുകൾ ലോകത്തിന് ഞെട്ടലുണ്ടാക്കിയിരിക്കുകയാണ്. അന്യഗ്രഹജീവന്റെ അസ്തിത്വത്തെ കുറിച്ചുള്ള അവകാശവാദമാണ് ഇയാൾ നടത്തിയിരുന്നത്. തന്റെ അഭിമുഖത്തിൽ, അന്യഗ്രഹജീവികൾ ഭൂമിയിൽ ഇറങ്ങുക മാത്രമല്ല, പതിറ്റാണ്ടുകളായി അവയെക്കുറിച്ച് യുഎസ് സർക്കാരിന് അറിയാമെന്നും അദ്ദേഹം അവകാശപ്പെട്ടു. യുഎസിൽ നിന്നോ മറ്റേതെങ്കിലും രാജ്യത്തിൽ നിന്നോ അല്ലാത്ത ‘അജ്ഞാത ഉത്ഭവം’ ഉള്ള വാഹനങ്ങൾ അധികാരികളുടെ പക്കലുണ്ടെന്നും അദ്ദേഹം പറഞ്ഞു.
പതിറ്റാണ്ടുകളായി അമേരിക്കൻ ഗവൺമെന്റിന് അന്യഗ്രഹ ജീവികളെ കുറിച്ച് ‘അറിയാം’ എന്നാണ്. 1947 ലെ റോസ്വെൽ അപകടത്തിൽ നിന്ന് ‘അജ്ഞാത ഉത്ഭവം’ ഉള്ള ഒരു വാഹനം കണ്ടെടുത്തതായി തനിക്ക് സ്ഥിരീകരിക്കാൻ കഴിയുമെന്ന് യുഎഫ്ഒ ചാരൻ ലൂയിസ് എലിസോണ്ടോ വ്യക്തമാക്കി.തങ്ങൾ ഒറ്റയ്ക്കല്ലെന്നും സഹായത്തിന് അന്യഗ്രഹജീവികൾ ഉണ്ടെന്നുമാണ് ഇയാൾ പറഞ്ഞുവയ്ക്കുന്നത്.
