ഇന്ത്യ ഇപ്പോൾ ഏഷ്യാ കപ്പ് 2025 ലക്ഷ്യമാക്കി കളിക്കുകയാണ്. ടീമിന്റെ ഉപനായകനായ ഗില്ലിന്റെ കടന്നുവരവ് തന്നെയായിരുന്നു സ്‌ക്വാഡ് പ്രഖ്യാപനത്തിലെ ഏറ്റവും വലിയ പ്രത്യേകത. ഇന്ത്യൻ ടീമിന്റെ ഭാവിയിലെ ഏറ്റവും വലിയ താരങ്ങളിൽ ഒരാളായി ഇപ്പോൾ തന്നെ എല്ലാവരും നോക്കി കാണുന്ന ഗിൽ, താൻ ഏറ്റവുമധികം ആരാധിക്കുന്ന രണ്ട് താരങ്ങളുടെ പേര് വെളിപ്പെടുത്തിയിരിക്കുകയാണ്.
ആപ്പിൾ മ്യൂസിക്കിലെ ഒരു പോഡ്‌കാസ്റ്റിൽ, തനിക്ക് രണ്ട് ആരാധനാപാത്രങ്ങളുണ്ടെന്ന് ശുഭ്മാൻ ഗിൽ വെളിപ്പെടുത്തി – സച്ചിൻ ടെണ്ടുൽക്കർ, വിരാട് കോഹ്‌ലി എന്നിവരാണ് അവർ. സച്ചിൻ തന്റെ പിതാവിന്റെ പ്രിയപ്പെട്ടവനായിരുന്നുവെന്നും മാസ്റ്റർ ബ്ലാസ്റ്റർ കാരണമാണ് താൻ ക്രിക്കറ്റിലേക്ക് പോയതെന്നും അദ്ദേഹം പറഞ്ഞു.
“എനിക്ക് രണ്ട് ആരാധനാപാത്രങ്ങളുണ്ട്. ആദ്യത്തേത് സച്ചിൻ ടെണ്ടുൽക്കറായിരുന്നു. അദ്ദേഹം എന്റെ അച്ഛന്റെ പ്രിയപ്പെട്ടവനായിരുന്നു, ഞാൻ ക്രിക്കറ്റിലേക്ക് വന്നത് അദ്ദേഹത്തിലൂടെയാണ്. 2013 ൽ അദ്ദേഹം വിരമിച്ചു, 2011–2013 ഓടെയാണ് ഞാൻ ക്രിക്കറ്റിനെ ശരിയായി മനസ്സിലാക്കാൻ തുടങ്ങിയത്. സ്കിൽ മാത്രമല്ല ക്രിക്കറ്റിന് മറ്റുള്ള വശങ്ങൾ ഉണ്ടെന്നും സച്ചിനിലൂടെയാണ് ഞാൻ പഠിച്ചത്” അദ്ദേഹം പറഞ്ഞു.
“2011-2013 കാലഘട്ടത്തിൽ ഞാൻ വിരാട് കോഹ്‌ലിയെ അടുത്തു പിന്തുടരാൻ തുടങ്ങിയ സമയമായിരുന്നു അത്. അദ്ദേഹം തന്റെ ബിസിനസ്സിൽ എങ്ങനെ മുന്നോട്ട് പോയി, കളിയോടുള്ള അദ്ദേഹത്തിന്റെ അതിയായ അഭിനിവേശം, ജയിക്കാനുള്ള ആഗ്രഹം എന്നിവ കാണാൻ എനിക്ക് വളരെ ഇഷ്ടമായിരുന്നു. നിങ്ങൾക്ക് എല്ലാ കഴിവുകളും എല്ലാ സാങ്കേതിക വിദ്യകളും പഠിക്കാൻ കഴിയും, പക്ഷേ വിരാടിനെ പോലെ ജയിക്കാനുള്ള വിശപ്പ് എല്ലാവർക്കും ഇല്ല. അത് എന്നെ ശരിക്കും പ്രചോദിപ്പിച്ചു,” ഇന്ത്യൻ ടെസ്റ്റ് ക്യാപ്റ്റൻ പറഞ്ഞു.
