മുംബൈ ഇന്ത്യൻസിനെതിരായ ഐപിഎൽ 2026-ലെ ഏറ്റവും പുതിയ മത്സരത്തിൽ ചെന്നൈ സൂപ്പർ കിംഗ്സ് വിജയിച്ചെങ്കിലും, ടീം മാനേജ്‌മെന്റിന്റെ സെലക്ഷൻ തീരുമാനങ്ങൾക്കെതിരെ രൂക്ഷവിമർശനവുമായി മുൻ ഇന്ത്യൻ താരം സുബ്രഹ്മണ്യം ബദരീനാഥ്. ലേലത്തിൽ വലിയ തുക മുടക്കി വാങ്ങിയ താരങ്ങൾക്ക് മാത്രം മുൻഗണന നൽകുന്ന സിഎസ്‌കെ, ടീമിന്റെ വിജയപ്രക്രിയകളെ കാറ്റിൽപ്പറത്തുകയാണെന്ന് അദ്ദേഹം തന്റെ യൂട്യൂബ് ചാനലിലൂടെ തുറന്നടിച്ചു.
ഈ സീസണിൽ 4 മത്സരങ്ങളിൽ നിന്ന് 6 വിക്കറ്റുകൾ നേടി മികച്ച ഫോമിലായിരുന്ന ലെഫ്റ്റ് ആം സ്പിന്നർ അക്കീൽ ഹൊസൈനെ ചെന്നൈ അപ്രതീക്ഷിതമായി ടീമിൽ നിന്ന് ഒഴിവാക്കിയിരുന്നു. മുംബൈക്കെതിരെ വെറും 3 വിദേശ താരങ്ങളെ മാത്രം ഉൾപ്പെടുത്തിയ ചെന്നൈ, പകരം ഇന്ത്യൻ സ്പിന്നർ പ്രശാന്ത് വീറിനാണ് അവസരം നൽകിയത്. എന്നാൽ 2 ഓവറിൽ 25 റൺസ് വഴങ്ങിയ പ്രശാന്തിന് ഒരു വിക്കറ്റ് പോലും നേടാനായില്ല. ഐപിഎൽ ലേലത്തിൽ 14.20 കോടി രൂപയുടെ വമ്പൻ തുകയ്ക്കാണ് കാർത്തിക് ശർമ്മയ്ക്കൊപ്പം പ്രശാന്തിനെ സിഎസ്‌കെ സ്വന്തമാക്കിയത്.
“വലിയ തുക നൽകി ടീമിലെടുത്തത് കൊണ്ടാണ് അവർ ചില താരങ്ങളെ കളിപ്പിക്കുന്നത് എന്ന് തോന്നുന്നു. അതൊരു തെറ്റായ തീരുമാനമാണ്. സിഎസ്‌കെ ജയിച്ചു എന്നത് കൊണ്ട് മാത്രം എല്ലാ ടീം സെലക്ഷനും ശരിയായിരുന്നു എന്ന് പറയാനാകില്ല,” ബദരീനാഥ് പറഞ്ഞു. അക്കീൽ ഹൊസൈൻ ലഭ്യമായിരിക്കെ, ഐപിഎല്ലിൽ പന്തെറിഞ്ഞ് യാതൊരു മുൻപരിചയവുമില്ലാത്ത പ്രശാന്ത് വീറിനെ പവർപ്ലേയിലെ അഞ്ചാമത്തെ ഓവർ ഏൽപ്പിച്ചതിനെയും അദ്ദേഹം ചോദ്യം ചെയ്തു.
ടീമിലെ വിദേശ താരങ്ങളുടെ എണ്ണം മൂന്നായി ചുരുക്കിയിട്ടും, മോശം ഫീൽഡിങ് തുടരുന്ന ശിവം ദുബെയെ ഗ്രൗണ്ടിൽ നിലനിർത്തുന്നതിനെയും ബദരീനാഥ് വിമർശിച്ചു. “ശിവം ദുബെ എല്ലാ മത്സരങ്ങളിലും ക്യാച്ചുകൾ കൈവിടുന്നു. അവൻ വളരെ മോശം ഫീൽഡറാണ്. നാലാമത്തെ വിദേശ താരമായി അക്കീലിനെ ഉൾപ്പെടുത്തി ദുബെയെ ഫീൽഡിങ്ങിൽ നിന്ന് മാറ്റി നിർത്താമായിരുന്നു. അക്കീലിനെ പുറത്തിരുത്തി ദുബെയെ ഫീൽഡ് ചെയ്യിക്കാൻ സിഎസ്‌കെ എന്തിനാണ് ഇത്ര വാശിപിടിക്കുന്നത്?” അദ്ദേഹം ചോദിച്ചു.
മുംബൈ ഇന്നിംഗ്‌സിന്റെ തുടക്കത്തിൽ തന്നെ നമാൻ ധീറിന്റെ എളുപ്പമുള്ളൊരു ക്യാച്ച് ദുബെ താഴെയിട്ടിരുന്നു താരം പിന്നീട് അർദ്ധസെഞ്ചുറി നേടി. മുമ്പ് ബെംഗളൂരുവിനും ഹൈദരാബാദിനുമെതിരായ മത്സരങ്ങളിലും വിരാട് കോഹ്‌ലി, അഭിഷേക് ശർമ്മ എന്നിവരുടെ നിർണായക ക്യാച്ചുകൾ ദുബെ നഷ്ടപ്പെടുത്തിയിരുന്നു. ഈ രണ്ട് മത്സരങ്ങളിലും സിഎസ്‌കെ പരാജയപ്പെടുകയും ചെയ്തു.
ഭാഗ്യവശാൽ മുംബൈക്കെതിരായ മത്സരത്തിൽ ദുബെയുടെ പിഴവ് സിഎസ്‌കെയെ ബാധിച്ചില്ല. മികച്ച ബൗളിംഗ് പ്രകടനത്തോടെ മുംബൈയെ 159 റൺസിലൊതുക്കിയ ചെന്നൈ, 19-ാം ഓവറിൽ അനായാസം വിജയലക്ഷ്യം മറികടന്നു.
