കോഴിക്കോട്: അടിയന്തരമായി രക്തവും പ്ലേറ്റ്‌ലെറ്റുകളും ആവശ്യമുള്ള രോഗികളുടെ ബന്ധുക്കളുടെ നിസഹായത മുതലെടുത്ത് പുതിയ ഓൺലൈൻ തട്ടിപ്പ് സംഘം പിടിമുറുക്കുന്നു. രക്തം നൽകാമെന്ന് വാഗ്ദാനം ചെയ്ത് യാത്രാചെലവെന്ന പേരിൽ പണം ഓൺലൈനായി കൈപ്പറ്റിയ ശേഷം തട്ടിപ്പുകാർ ഫോൺ സ്വിച്ച് ഓഫ് ചെയ്ത് മുങ്ങുന്ന സംഭവങ്ങൾ വ്യാപകമാകുകയാണ്. ക്യാൻസർ രോഗികൾ ഉൾപ്പെടെ ഗുരുതരാവസ്ഥയിലുള്ള നിരവധി പേരുടെ ബന്ധുക്കൾ ഇതിനോടകം തന്നെ ഈ വഞ്ചനയ്ക്ക് ഇരയായിട്ടുണ്ടെന്നാണ് റിപ്പോർട്ടുകൾ വ്യക്തമാക്കുന്നത്.
സോഷ്യൽ മീഡിയ വഴിയും സന്നദ്ധ സംഘടനകളുടെ വാട്‌സ്ആപ്പ് ഗ്രൂപ്പുകൾ വഴിയും അടിയന്തര രക്ത ആവശ്യകതയെക്കുറിച്ച് വരുന്ന പോസ്റ്റുകളും നമ്പറുകളുമാണ് തട്ടിപ്പ് സംഘം ഇരകളെ കണ്ടെത്താൻ ഉപയോഗിക്കുന്നത്. പോസ്റ്റുകളിലുള്ള നമ്പറുകളിലേക്ക് നേരിട്ട് വിളിക്കുന്ന സംഘം, തങ്ങൾ രക്തം നൽകാൻ തയ്യാറാണെന്ന് അറിയിച്ച് വിശ്വസിപ്പിക്കും. തുടർന്ന് ആശുപത്രിയിൽ എത്തിച്ചേരാൻ യാത്രാചെലവിനോ ഇന്ധനമടിക്കാനോ ഉള്ള തുക ഗൂഗിൾ പേ വഴിയോ മറ്റ് യു.പി.ഐ (UPI) ആപ്പുകൾ വഴിയോ ഉടൻ അയച്ചു നൽകാൻ ആവശ്യപ്പെടും. പണം അക്കൗണ്ടിൽ എത്തുന്ന നിമിഷം ഇവർ ഫോൺ കോളുകൾ വിച്ഛേദിച്ച് മുങ്ങുകയാണ് പതിവ്.
കഴിഞ്ഞ ദിവസം എം.വി.ആർ ക്യാൻസർ സെന്ററിൽ ചികിത്സയിലുള്ള മഞ്ചേരി സ്വദേശിയായ രോഗിയുടെ ബന്ധുക്കളിൽ നിന്നും സമാനരീതിയിൽ പണം തട്ടിയെടുത്തിരുന്നു. ഇതേ തട്ടിപ്പുസംഘം മറ്റ് ചില രോഗികളുടെ ബന്ധുക്കളെയും ഒരുപോലെ ബന്ധപ്പെട്ടെങ്കിലും, സന്നദ്ധ പ്രവർത്തകരുടെ സമയോചിതമായ ഇടപെടൽ കാരണം അവർക്ക് പണം നഷ്ടമായില്ല. രക്തദാനത്തിന്റെ പേരിൽ യാത്രാചെലവിനോ മറ്റ് ആവശ്യങ്ങൾക്കോ മുൻകൂറായി പണം ആവശ്യപ്പെടുന്നവരുമായി ജാഗ്രത പാലിക്കണമെന്നും, വിവരങ്ങൾ കൃത്യമായി പരിശോധിച്ച ശേഷമേ നടപടികളിലേക്ക് കടക്കാവൂ എന്നും മുക്കം കേന്ദ്രീകരിച്ച് പ്രവർത്തിക്കുന്ന സന്നദ്ധ പ്രവർത്തകർ മുന്നറിയിപ്പ് നൽകുന്നു. വിഷയം പൊലീസിന്റെ ശ്രദ്ധയിൽപ്പെടുത്തിയിട്ടുണ്ടെന്നും ജനങ്ങൾ ജാഗ്രത പാലിക്കണമെന്നും അധികൃതർ അറിയിച്ചു.
