അമൃത്സർ: പഞ്ചാബിലെ രജ്പുരയിൽ ഓടിക്കൊണ്ടിരുന്ന ട്രെയിനിൽ വൻ തീപിടിത്തം. അമൃത്സറിലേക്ക് സർവീസ് നടത്തുകയായിരുന്ന കർമഭൂമി എക്‌സ്പ്രസ്സിലാണ് (12508) പെട്ടെന്ന് തീ പടർന്നുപിടിച്ചത്. അപകടത്തിൽ നാല് ബോഗികൾ പൂർണ്ണമായും കത്തിനശിച്ചെങ്കിലും സമയബന്ധിതമായ ഇടപെടൽ കാരണം യാത്രക്കാർ പരിക്കേൽക്കാതെ തലനാരിഴയ്ക്ക് രക്ഷപ്പെട്ടു.
പാട്യാല ജില്ലയിലെ രജ്പുര റെയിൽവേ സ്റ്റേഷന് സമീപത്തു വെച്ചാണ് അപകടമുണ്ടായത്. ട്രെയിന്റെ ബോഗിക്കുള്ളിൽ നിന്ന് കട്ടിയിൽ പുക ഉയരുന്നത് ശ്രദ്ധയിൽപ്പെട്ട ഉടൻ തന്നെ യാത്രക്കാർ ചങ്ങല വലിച്ച് ട്രെയിൻ നിർത്തുകയായിരുന്നു. ട്രെയിൻ നിന്നയുടൻ യാത്രക്കാർ അതിവേഗം പുറത്തേക്ക് ഇറങ്ങിയോടിയതിനാലാണ് വൻ ദുരന്തം ഒഴിവായത്. വിവരമറിഞ്ഞ് സ്ഥലത്തെത്തിയ അഗ്നിരക്ഷാ സേനയുടെ നിരവധി യൂണിറ്റുകൾ മണിക്കൂറുകൾ ശ്രമിച്ചാണ് തീ പൂർണ്ണമായും നിയന്ത്രണവിധേയമാക്കിയത്.
തീപിടിത്തത്തിന്റെ കൃത്യമായ കാരണം എന്താണെന്ന് ഇതുവരെ വ്യക്തമായിട്ടില്ല. റെയിൽവേ ഉദ്യോഗസ്ഥരും സാങ്കേതിക വിദഗ്ധരും സ്ഥലത്തെത്തി പരിശോധന നടത്തുകയാണെന്നും സംഭവത്തിൽ ഉന്നതതല അന്വേഷണത്തിന് ഉത്തരവിട്ടിട്ടുണ്ടെന്നും റെയിൽവേ അധികൃതർ അറിയിച്ചു. അപകടത്തെ തുടർന്ന് പാതയിലൂടെയുള്ള ട്രെയിൻ ഗതാഗതത്തിൽ ചെറിയ തടസ്സങ്ങൾ നേരിട്ടു.
